Ижкар+9 °C
16 -тӥ куарусён 2021 Покчиарня
18+

Выль фермер возёсъёс кылдытыны оглом 80 миллион манет пала грантъёс сётозы Удмуртиын

  • 222
  • 0
Ижкар / Удмуртия
Выль фермер возёсъёс кылдытыны оглом 80 миллион манет пала грантъёс сётозы Удмуртиын
Туспуктэм: Руслан Нуриахметов

Удмуртиын «Агростартап-2021» программая грантъёс понна вожвылъяськонлы йылпумъянъёс лэсьтӥзы. Озьы, выль фермер возёсъёс кылдытыны туэ оглом 79,6 миллион манет висъялозы. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Грантъёс 22 адямилы сётозы. Соос укмыс ёросъёсын ас ужзэс азинтозы

Тужгес трос грантъёс Алнаш ёросэ кошкозы – вить. Кутскись фермеръёссы будосъёс будэтон но сӥльлы пудо вордон борды басьтӥськозы. Ньыльзэ грантъёсты Дэри ёросын уже кутозы. Татын будосъёс будэтон, йӧллы но сӥльлы пудо вордон бордын ужалозы. Нош Сьӧлта ёросын кеч йӧл поттон бордын тыршись нырысетӥез возёс кылдоз.

Грантъёсты куарусён пумозь висъялозы

Коньдонэз басьтон понна кутскись фермеръёс одно ик уж интыос кылдытыны кулэ. Озьы, ар пумозь та программалы луыса гуртъёсын 30 пала выль уж интыос ватсаськозы. Соос борды семья фермаос но гурт возёс кооперативъёс ватсаськозы. Соослэсь грантъёс басьтыны куриськонъёссэс 16-тӥ куарусёнозь кутозы на. Туннэ нуналлы куриськонъёссэс ньыль семья фермаос но кык гурт возёс кооперативъёс келязы ни.

Пусъём, та дыре Удмуртиысь гурт возёсъя министерство «Агростартап» программа улсын эшшо 11 грант сётыны улосвыл коньдэтысь 30,1 миллион манет тыр юрттэт возьма на.

Тодэ вайытом, кылем арын «Агростартап» программалы луыса 33 выль фермер возёсъёс усьтӥськизы. 



Наверх
Вниз