Ижкар-4 °C
5 -тӥ толсур 2021 Воскресенье
18+

Зарни медален пусйизы Удмуртиысь ёросэз гурт интывылъёсты азинтонын умой ужамез понна

  • 197
  • 0
Москва / Россия
Зарни медален пусйизы Удмуртиысь ёросэз гурт интывылъёсты азинтонын умой ужамез понна
Туспуктэм: Удмуртиысь тӧролэн но кивалтэтлэн пресс-службазы

Россиысь гурт возёсъя министерство Шаркан ёросысь администрациез гурт интывылъёсты котыр ласянь азинтон ужез умой быдэсъямез понна зарни медален пусйиз. Данъетэз Москва улосвылын ортчись гурт возёсъя «Золотая осень» огъяросии адӟытонын сётӥзы. Со сярысь элькун тӧролэн но кивалтэтлэн пресс-службазы ивортӥз.

Кун программалэн нырысетӥ ужан араз ик ёросын трос ӵектосъёсты улонэ пыӵатӥзы. Валтӥсез но тужгес бадӟымез соос пӧлысь – Шарканысь Лулчеберетъя но шутэтсконъя центр. Солэн быдӟалаез 2,4 сюрс квадрат метр луиз. Ужъюртэ 40-лэсь трос кружокъёс, куара гожтон студия, 400 учкисьлы зал, кузпалъяськон зал интыяськизы. 2021-тӥ арын укмыс толэзь ӵоже гинэ ужрадъёсазы но занятиосазы 10 сюрслэсь трос адямиос ветлӥзы

Ужъёс туэ но азьланьтӥсько. 2021-тӥ арын «Гурт интывылъёсты котыр ласянь азинтон» кун программалэн «Гурт интывылъёслэн туала туссы» ӧрезъя лэсьтӥськись тужгес бадӟымез ӵектос Ува ёросысь Нылга черкогуртын пуктӥськись шутэтскон центр луыны быгатоз. Сое вуттыны оглом 150 миллион манетлэсь трос коньдон кутозы. Кизнер каргуртын школаез выльдон ужъёс мыно, солы коньдэтысь 150 миллион манет висъязы. Нош Можга ёросысь Пичи Сюга гуртын чагыр эстӥськон сӧзнэтэз паськытатон ужъёсты йылпумъязы.

Озьы ик туэ Глаз но Сарапул ёросъёсын выль микрорайонъёс пуктонъя кык ӵектосъёсты йылаз-пумаз вуттӥзы. Со сяна, Сарапул ёросын куинетӥзэ со выллем ӵектосэз улонэ пыӵато на. Ужъёс оглом 46,1 миллион манет тыр усёзы шуыса чаклало.

2021-тӥ арын элькунын нырысьсэ мерлыко найм улсын гуртъёсын коркаос пуктозы. Соосты гурт возёс удысын ужасьёслы висъялозы. Оглом 15 коркаос вуттозы. Пусъём, туэ улон интыоссэс гуртъёсын улӥсь 19 семьяос умоятӥзы ини. Соослы Удмуртиысь гурт возёсъя министерство улон интылы сертификатъёс сётъяз.

Бадӟым уж нуиське кун программалэн гурт интывылъёсты умоятон ӧрезъя но. Туэ гудырикошконэ Удмуртия федерал центрысь ватсаса 465,4 миллион манет басьтӥз. Со 90 ӵектосъёсты улонэ пыӵатыны луонлык сётоз.

Пусъём, 2021-тӥ арын Удмуртия кун программалэн оглом сизьым ӧръёсаз пыриське. Вань ужпумъёсты быдэстон понна пӧртэм коньдэтъёсысь 768,4 миллион манет кутэмын луоз.

 



Наверх
Вниз