Кизён ужъёс чакламезлэсь 23 процентлы быдэстэмын Удмуртиын

11-тӥ куартолэзьлы Удмуртиын кизён ужъёс чакламезлэсь 23 процентлы быдэстэмын. Туннэ нуналлы тысё но пуртэсо юос 71,3 сюрс гектар музъеме согемын, ивортэ элькунысь Гурт возёсъя но сиён-юонъя министерстволэн пресс-службаез. Кизён ужъёс вань ёросъёсын мыно ни.

Ваньмызлэсь азьпалан — Вавож ёросысь возёсъёс. Татын валэс юэз 6,5 сюрс гектар музъеме кизизы ни (чакламлэсь 41 процент). Шаркан ёросысь возёсъёс кыкетӥ интыын — татысь гуртоос 6,7 сюрс гектар кизизы (39 процент). Кизнер ёросысь возёсъёс куинетӥ интыын — 2,4 сюрс гектар (34 процент).

Туэ тулыс Удмуртиын тысё но пуртэсо валэс юэн 265,1 сюрс гектар музъемез кизьыны чакламын

Пусъём, кылем арын 11-тӥ куартолэзьлы вазь вуись юосын 39 процент музъем киземын вал ни — со 120,6 сюрс гектар.

Ватсалом, валэс юосты кизем сяна, одӥг аръем но трос аръем турынъёсты но етӥнэз кизён азьланьтӥське. Туэ уйпал буртчинлы улэ 4 сюрс 363 гектар висяъмын.