Ижкар+22 °C
8 -тӥ гудырикошкон 2020 Кӧснунал
16+

30 выль фермер возёсъёс кылдыны кулэ Удмуртиын 2019-тӥ арын

  • 256
  • 0
Ижкар / Удмуртия
30 выль фермер возёсъёс кылдыны кулэ Удмуртиын 2019-тӥ арын
Туспуктэм: Григорий Фомин

Агропром огъетэз азинтонъя йӧскалык ӵектосэз быдэсъян улсын 2019-тӥ арын Удмуртиын 30 выль фермер возёсъёс кылдыны кулэ. Со сярысь 19-тӥ толсуре журналистъёслы вераз элькунысь гурт возёсъя но сиён-юонъя министр Ольга Абрамова.

2019-тӥ арын ми кылдытыны кулэ 30 ӟечлыко, пусйисько та кылэз, фермеръёсты, кудъёсыз грантъёсты басьтэм но уже кутэм гинэ ӧвӧл, басьтозы, уже кутозы но асьсэ ужпӧрзэс азинтозы
Ольга Абрамова, Удмуртиысь гурт возёсъя но сиён-юонъя министр

Грантъёсты федерал коньдэтысь «Развитие фермерства» ӧръя висъялозы. Солэн куронъёсызъя, 2019-тӥ арын кылдытэм крестьян но фермер возёсъёс гурт удысын ужзэс нуыны луонлык сётӥсь стартапсэс улонэ пыӵатон понна коньдон басьтыны быгатозы.

Кыкетӥез ӧр компетенциосъя центръёсты азинтон луоз. Удмуртиын со Гурт возёсъя визь-кенеш сётон центр бордын ужаны кутскоз.

Компетенциосъя центр покчи возёсъёслы визь-кенеш сётон ужен выроз: крестьян но фермер возёсэз кылдытыны ужкагазъёсты дасян, кредит басьтыны ужкагазъёсты дасян бордысен кутскыса, кизён ужез радъян, экономикаез чотан, субсидиосъя отчётъёс дасян дорозь
Ольга Абрамова, Удмуртиысь гурт возёсъя но сиён-юонъя министр

Нимысьтыз вуоно фермеръёс понна улосвылын бизнес-акселератор кылдытозы, со улсын агропром огъетын ужаны мылкыд карись адямиосты быръёзы. Соосты технологиослы, кивалтонлы, экономикалы дышетозы, озьы ик улосвылысь фермерствоез кылдытон ласянь тужгес устоосыныз но тужгес лябъёсыныз ӵектосъёсын тодматозы но быръем удыссыя вузпӧрын ортчытэм эскеронъёсты киязы сётозы.

Сыӵе ужлэн емышез котькуд куриськисьлэсь йылпумъян ӵектос луоз, со асьме министерствоын утиськоз но грант басьтон понна нюръяськоз. Адями басьтэ грант, мынэ ужаны, ми солы вить ар ӵоже юрттӥськом
Ольга Абрамова, Удмуртиысь гурт возёсъя но сиён-юонъя министр

Ӵектосъёс пӧртэм ӧръёсъя луыны быгато, со пӧлын гурт удысын поттэм ваньбурез переработать карон. Грантлэн быдӟалаез 4 миллион манет луоз.

Кун ласянь юрттэтлэн куинетӥез ӧрез - потребкооперативъёслы субсидиос висъян.

Кооперативлэн ёзчиосызлэсь ужзэс радъяны потребкооперативен быдтэм коньдонлэсь 25 процентозь люкетсэ берыктозы. Мукет сямен вераса, вить крестьян но фермер возёсъёс йӧлэз переработать каронъя кооператив кылдытӥзы. Сое кылдытонлы, быдэстонлы, переработкалы быдтэм коньдонъя субсидия висъяны быгатозы
Ольга Абрамова, Удмуртиысь гурт возёсъя но сиён-юонъя министр

Вань со амалъёслы луыса 2019-тӥ арын гурт возёс удысын поттэм ваньбурлэсь 10 процентсэ фермеръёс сётыны кулэ.

Ольга Абрамова пусйиз, йӧскалык ӵектос али чаклам кун юрттэтэн огдыре быдэсъяськоз. 



Наверх
Вниз