Удмуртиысь 17 фермеръёс но гурт кооперативъёслэн кивалтӥсьёссы грантлы сертификатъёс басьтӥзы

  • 334
  • 0
Ижкар / Удмуртия
Удмуртиысь 17 фермеръёс но гурт кооперативъёслэн кивалтӥсьёссы грантлы сертификатъёс басьтӥзы
Туспуктэм: Удмуртиысь тӧролэн но кивалтэтлэн пресс-службазы

Туннэ, 9-тӥ гудырикошконэ, «AGRO.PRO» улосвылкуспо фестиваль улсын Удмуртилэн тӧроезлэн резиденцияз гурт возёсъя потребкооперативъёсты, семья фермаосты но кутскись фермеръёсты быръёнъя улосвыл вожвылъяськонын вормисьёсын пумиськон ортчиз. Элькун тӧроез Александр Бречалов 17 фермеръёслы но гурт кооперативен кивалтӥсьёслы грантъёс басьтыны сертификатъёс сётӥз. Со сярысь улосвыл тӧролэн но кивалтэтлэн пресс-службазы ивортэ.

Грантъёслэн быдӟалазы одӥг но ӝыны миллион манетысен 15 миллион манетозь 

Коньдон басьтӥсьёс пӧлы сизьым кутскись фермеръёс, семьяен ферма возись куать адями но потребкооперативъёслэн ньыль кивалтӥсьёссы пыризы.

Мон шумпотӥсько туннэ тӥледын пумиськемелы. Элькунмылэн агропром огъетаз фермеръёс но гурт возёс кооперация бадӟым инты басьто. Валамон ини, улосвыллэн экономикаез понна та ужбергатонлэн интыез но кулэлыкез будэ
Александр Бречалов, Удмуртилэн тӧроез

Грант басьтӥсьёс пӧлын Эгра ёросысь Мувыр гуртысь фермер возёсэн кивалтӥсь Александр Корепанов но вал. 1981-тӥ арын Мувыр гуртэз азинскисьтэм лыдъязы но вань картаосысь ӵушизы. Озьы ке но, 1993-тӥ арын Александр Корепанов бусые пуктэм выль коркаяз улыны выжиз. Бӧрысь вӧзаз выль коркаос ӝутыны кутскизы, фермер возёс ужаны кутскиз. Со ас коньдонэныз сюрес лэсьтӥз, ву гумыос кыскиз, электротылэн шуг-секытъёсты сэрттӥз-пертчиз. 2009-тӥ арын Россиысь кивалтэтлэн тӧроез пуктэмъя Мувыр гуртлы улон инты инлыксэ берыктӥзы. Возёс но калленэн паськыта – техника басьтӥзы, парсьёсты, ыжъёсты, кунянъёсты будэтыны гидъёс пуктӥзы. Вань ю тысьсы, асьсэлэн ю тысь куасьтонзы, изонзы – быдэс пудо уллёзэ фермер аслаз пудо сиёнэныз сюдэ. Мувыр котырысь 1 сюрс гектарлэсь трос музъем гыриське-кизиське. 2019-тӥ арын выльысь улӟытэм Мувырлы 10 ар тырмиз. Ваньмыз со Александр Корепановлэн тыршемезлы луыса.

Озьы ик пумиськонэ пыриськисьёс пӧлын Наталья Усманова вал. Со семьяен ужбергатӥсьёс пӧлысь огез яркытэз адями, куать нылпиослэн анайзы луэ. Усмановъёслэн быдэс семьязы ужбергатоназы тырше – соос сыр лэсьто. Наталья Усманова Тверь улосвылысь частной сыроварняе дышетскыны ветлӥз, Италиысь куать сыроварняосын стажировка ортчиз. Та дыре семьяын 10 пӧртэм сыръёс потто. Азьланяз 500 литр йӧлэз уже кутон понна вузпӧрзэс паськытатыны малпало, со 50 килограмм пала сыр сётоз. 15 миллион манет тыр грантлы луыса семья 40 йырлы чаклам гид но сыръёс поттыны минисыроварняос, озьы ик фермаын но сыроварняын ужаны тӥрлык басьтыны малпа.

Улосвыл тӧро дорын пумиськонын грант басьтӥсьёс ас ӵектосъёсынызы тодматӥзы, ужзэс азинтыны луонлыкъёс сярысь веразы.

Александр Бречалов фермеръёслы но гурт кооперативъёслэн кивалтӥсьёссылы ужзэ яратэмзы, секыт, но туж кулэ ужын нуналысь нуналэ тыршемзы понна тау кариз.

Мон туж оскисько, ӵектосъёсты улонэ пыӵалозы но азинтӥськозы шуыса. Со понна тӥледлы «Удмурт Элькунэз азинтонъя корпорация» но юрттоз, со пӧлын экспорт ласянь но. Вузкарон интыяз уг сылы. Тӥ вазиське, ми маркетинг упаковкаен юрттомы. Озьы ик тӥ юристъёслэсь но бухгалтеръёслэсь дунтэк визь-кенеш басьтыны быгатӥськоды.
Александр Бречалов, Удмуртилэн тӧроез
 

Пусъём, 2019-тӥ ар кутсконлы Удмуртиын 1 сюрс 103 крестьян фермер возёсъёс пусъемын вал. Соос борды 130 сюрс гектар музъем юнматэмын.

Фермер возёсъёс сӥль, йӧл, курегпуз, ыжгон, ю тысь, картофка но емыш будэто. Соос гурт удысын поттэм ваньбурлэсь 5-6 процентсэ сёто. Со пӧлын тысё но пуртэсо юос – 15,8 процент, картофка – 16,5 процент, бакча сиёнъёс – 9,3 процент

Туэ толшорысен пӧсьтолэзёзь фермеръёсмы 353 сюрс 400 тонна пудо но тылобурдо сӥль, 760 сюрс курегпуз поттӥзы, огъя 19 сюрс 524 тонна пала йӧл кыскизы. Туннэ нуналлы фермер возёсъёсын 21 сюрс 128 йыр таза сюро пудо вордо.

Крестьян-фермер возёсъёслы но гурт возёс кооперативъёслы кутскыны но азинскыны юрттон вылысь грантъёсъя программа умой быдэсъяське. 2012-тӥ арысен сое улонэ пыӵатон улсын грантэн юрттэт 218 фермеръёслы но укмыс кооперативъёслы сётӥзы. Пичи возёсъёслы грантэн юрттэт понна 620 миллион манет быдтӥзы, со пӧлысь 422 миллионэз – федерал коньдэтысь. Туэ та ужъёслы 108 миллион манет висъязы, сое конкурс быръёнъёсъя 17 грантлы люкизы

Озьы ик туэ Россилэн азьмуртэныз Владимир Путинэн кичӧлтэм «Малое и среднее предпринимательство и поддержка индивидуальной предпринимательской инициативы» йӧскалык ӵектос улсын Удмуртиын выль фермер возёсъёс кылдытыны 154 миллион манет висъямын вал. Грантъёсты фермер луон сюресэз быръем 43 муртъёс басьтозы.

Тодэ вайытом, 26-тӥ пӧсьтолэзе Удмуртиысь фермеръёс ӧнер нуналзэс пусйизы

Наши партнеры

Наверх
Вниз