Ижкар+18 °C
24 гудырикошкон 2019 Кӧснунал
16+

Музъемлэн бадӟым мускытлыкеныз валче шуэрес югдур ялозы Удмуртиын

  • 179
  • 0
Ижкар / Удмуртия
Музъемлэн бадӟым мускытлыкеныз валче шуэрес югдур ялозы Удмуртиын
Туспуктэм: Григорий Фомин

15-тӥ гудырикошконысен Удмуртиын музъемлэн бадӟым мускытлыкеныз валче шуэрес югдур ялыны быгатозы. Улосвыл тӧрлы сыӵе куронэн вазиськыны пумкылян элькун кивалтэтлэн Шимучыръёсты алонъя но бервылзэс утялтонъя но тылпулэсь утиськонъя ӧрилэн азьвыл чакламтэ кенешоназ кутӥзы. Со сярысь Удмуртиысь тӧролэн но кивалтэтлэн пресс-службазы ивортэ.

Улосвыл кивалтэтлэн тӧроез Ярослав Семёнов кивалтэм улсын ортчем кенешонэ Россиысь МЧС-лэн элькунъя валтӥсь управлениезлэн кивалтӥсез Пётр Фомин, министерствоослэн но удысэтъёслэн ыстэм муртъёссы пыриськизы. Видеогерӟетъя вераськон борды итӥськизы элькунысь вань ёросъёс.

Удмуртиысь Гидрометцентрлэн кивалтӥсез Алексей Бердников верамъя, туэ будосъёслэн будон вакытазы куазь кезьыт улӥз, трос зориз. Соин валче тысё юослы кисьман, турынъёсты но юосты утялтон понна секыт югдур кылдӥз

Гурт возёсын кылдэм сюлмаськонъёс но музъем укыр мускыт луэмен сэрен шуэрес югдур ялонлэн кулэлыкез сярысь Удмуртиысь гурт возёсъя но сиён-юонъя министр Ольга Абрамова вераз.

Кема дыр ӵоже кыстӥськись ужъёс бусы ужъёсты туж ӝегатӥзы. Кӧс турын чакламлэсь 60 процентлы дасямын (кылем арын – 93 процент), силос чакламезлэсь 51 процент (кылем арын – 72 процент). Одӥг пудо йырлы 25 центнере сиён дасяны пуктэмын вал ке, туннэ 18,9 центрен гинэ дасямын

Сюлмаськытӥсь югдур кылдэмын ю-нянез утялтон ласянь но. 12-тӥ гудырикошконлы тысё юосты утялтыны 13 гинэ ёросъёс кутскизы. Тысё но пуртэсо юосты 343,1 сюрс вылысь утялтыны кулэ ке, та дырлы 3,8 сюрс гектарез гинэ кутсамын (2018-тӥ арын – 43,3 сюрс гектар), пудо сиёнлы 1,4 сюрс гектар утялтэмын (миым 4,7 сюрс гектар). Со чакламлэсь 2 процентэз гинэ луэ (2018-тӥ арын – 11 процент).

Туннэ гектарысь шорлыдын 24 центнерен ю тысь басьтыса, оглом 9 сюрс 200 тонна гинэ люкамын, кылем арын 77,9 сюрс тонна жильдэмын вал. Миымлэсь удалтэмгес юос бусыосы ик кылёнлы кышкытлык вань. Озьыен толйись юосты кизьыны выль кидыс уз луы, озьы ик вуоно арлы но тырмыт кидыс уз дасялэ.

Ольга Абрамовалэн верамезъя, толйись юос кезьыт вакытэз умой мед потозы шуыса, кизён дырез чакланы кулэ, но туннэ элькунысь куинез гинэ ёросъёс – Глаз, Камбарка но Юкаменск – толйись юосты кизьыны потӥзы.

14-тӥ гудырикошконлы сётэтъёсъя, музъемлэн бадӟым мускытлыкез сэрен шугадӟонэ шедизы Удмуртиысь 736 возёсъёс, со пӧлын 455 крестьян (фермер) возёсъёс

Удмуртиысь кивалтэтлэн тӧроез Ярослав Семёнов ёрос тӧроосты гурт возёс огазеяськонъёслэсь ыштонъёссэс рос-рос лыдъяны но ужкагазъёсты элькунысь гурт возёсъя министерствое келяны куриз. Собере, зоро куазь шугадӟонэ шедем гурт возёсъёслы ватсаса юрттэт курыса, Россиысь гурт возёсъя министерствое вазиськозы. 

Наши партнеры

Наверх
Вниз