Ижкар+5 °C
21 куарусён 2019 Кӧснунал
16+

73 процентсэ бусыосты утялтӥзы Удмуртиын

  • 424
  • 0
Ижкар / Удмуртия
73 процентсэ бусыосты утялтӥзы Удмуртиын
Туспуктэм: Григорий Фомин

Удмуртиысь гурт возёсъёс ю тысь кутсан ужъёсты йылпумъяло. Куд-ог ёросъёс уборказэс быдтӥзы ини. Со сярысь Удмуртиысь гурт возёсъя но сиён-юонъя министерстволэн пресс-службаез ивортэ.

Кӧс но шундыё куазь рос-прос ужаны луонлык сётӥз. Толэз потыны ичизэ 550 сюрс тонна кутсано, нош гуртоос 6-тӥ куарусёнлы 400 сюрс тонна ю люказы ини. Утялтэмын 73 процентэз бусыос, со зоръёсын сэрен бырем гектаръёсты но (73, 1 сюрс гектар) лыдэ басьтыса
Удмуртиысь гурт возёсъя но сиён-юонъя министерстволэн пресс-службаез

Улосвылын котькуд гектарысь шорлыдын 24,8 центнер ю тысь басьто. Кылем арын та вакытлы 20,8 центнер вал. Котькинлэсь трос урожай потто Вавож ёросын – котькуд гектарысь 36,2 центнер. Озьы ик умой лыдпусъёс возьмато Эгра ёросын – 31,5 центнер, Можга ёросын – 29,8 центнер.

Нимаз ёросъёсты учконо ке, Вавож ёросысь «Удмуртия» возёсын гектарысьтыз 40 центнер ю тысь басьто. Тужгес удалтэмын йыдызы – гектарысьтыз 52 центнер люкаське.Чабейзы бусыосысьтызы быдэсак утялтэмын ӧвӧл на, но «Гранни» сортсы али ик гектарысьтыз 67 центнерен усе ини. Удалтонлыкезлы луыса гуртоос сое берло 10 арзэ кизё ини, ю тысьтэм ӧз кыльылэ на. 

Выль рекорд пуктӥзы артысь Мичурин нимо предприятиын. Татын уборказэс йылпумъязы ни, котькуд гектарысь 44,1 центнер люказы. 2015-тӥ но 2017-тӥ арын 40 центнер ю бичаны быгатӥзы вал. Берло 2 арзэ тужгес ӟеч урожай сётэ Йолдыз чабей - гектарысьтыз 52 центнер люкаськиз, куд-ог участокъёсын 70 центнерозь но вуылӥз. Пусйыны кулэ созэ но: 44,1 центнер - со бырем бусыосты лыдэ басьтыса.
Удмуртиысь гурт возёсъя но сиён-юонъя министерстволэн пресс-службаез
 

Можга ёросысь бусыосын та дыре 53-55 комбайнъёс тыршо. Тужгес трос ю тысь «Россия» возёсын потто – котькуд гектарысь 40,9 центнер. Солэсь трослы ик уг кыльы «Родина» возёс но – гектарысьтыз 39,6 центнер басьтэ. Со сяна, ёросысь эшшо ньыляз возёсъёсын – «Держава», «Трактор», «Югдон» но «Заря» возёсъёсын – котькуд гектарысь 30-лэсь трос центнер ю тысь люкало.

Пичи Пурга ёросын ужзэс нырысетӥ йылпумъязы «Восход» возёсын. Гуртоос 1 сюрс 500 тонналэсь трос ю тысь кутсазы, котькуд гектарысь 30 центнерлэсь трос урожай басьтӥзы. 

Тодэ вайытом, азьвылгес Удмуртиысь гурт возёсъя но сиён-юонъя министр Ольга Абрамова элькунын тысё юосты утялтон алама куазен сэрен куарусён пумозь кыстӥськоз шуыса вераз вал.

Наши партнеры

Наверх
Вниз