Ижкар-12 °C
7 -тӥ южтолэзь 2021 Воскресенье
18+

«Умой йылпумъям»: Удмуртись гурт возёсъя министерство ю-нянь утялтонлы йылпумъянъёс лэсьтӥз

  • 393
  • 0
Ижкар / Удмуртия
«Умой йылпумъям»: Удмуртись гурт возёсъя министерство ю-нянь утялтонлы йылпумъянъёс лэсьтӥз
Туспуктэм: Григорий Фомин

Удмуртиысь гурт возёсъя но сиён-юонъя министр Ольга Абрамова 2019-тӥ арын ю-нянь утялтонлы йылпумъянъёс лэсьтӥз. 1-тӥ коньывуонлы лыдпусъёсты со журналистъёсын пумиськонын шараяз. Пресс-конференцие ивортодэтъя «Удмуртия» агентстволэн корреспондентэз но вуылӥз.

Ю-нянь утялтонэз ми умой йылпумъям. Со дыре ик, кызьы верам вал ини, милям али ке но вань возёсъёсмы, кытын кизем ю-няньзы 15 процентэз гинэ утялтэмын
Ольга Абрамова, Удмуртиысь гурт возёсъя но сиён-юонъя министр

Улосвыллэн уйпал ёросъёсаз вань на возёсъёс, кытын гуртоос алама куазен сэрен бусыосы потыны но ужъёссэс йылаз-пумаз вуттыны уг быгато. Лымшор ёросъёсысь возёсъёс аран-кутсан ужзэс йылпумъязы, отын юос удалтэмын вал, возёсъёс трос ю тысь жильдӥзы.  

Озьы туннэ нуналлы ю тысь оглом 628 сюрс тонна люкаськиз, со пӧлысь 610 сюрс тоннаез умой ӟечлыкен. Кылем арын та дырлы ик 672 сюрс тонна ю тысь басьтӥзы

Таяз арын одӥг гектарысь 24,6 центнер ю тысь уськытӥзы, кылем арын арын 20 центнер вал. Министрлэн верамезъя, Шаркан ёросысь одӥг интыын гектарысь 80 центнер потӥз.

Озьы ик туэ картофка удалтӥз. Кылсярысь, Вотка ёросын гектарысь 550 центнер бичазы. Ольга Абрамова пусйиз, элькунмылы ӟеч лыдпусэн лыдъяське гектарысь 450 центнер, нош шоро-куспо удалтонлык – гектарысь 200 центнер.

Толйись юосты чаклам мында кизьыны ӧз вуттэ. Кылем арын та дырлы 70 сюрс гектар вылэ киземын вал ке, туэ 40 сюрс гектар гинэ

Озьы ик кын улэ гырон ужъёсты но дыраз уг вутто. 2019-тӥ арын 300 сюрс гектар гырыны ужпум пуктэмын, та бордын лымы шобрет кылдытозь ужалозы. Со сяна, матысь дыре элькунамы кукурузаез утялтыны кутскозы.

Тодэ вайытом, Удмуртиысь гурт возёсъя но сиён-юонъя министр Йӧскалыккуспо форуме удмурт дӥсен пыриськиз.



Наверх
Вниз