Ижкар-3 °C
24 -тӥ тулыспал 2020 Вордӥськон
16+

Сӥльлы пудо вордонэз 11 поллы будэтыны чакла Удмуртия 2030-тӥ арозь

  • 520
  • 0
Ижкар / Удмуртия
Сӥльлы пудо вордонэз 11 поллы будэтыны чакла Удмуртия 2030-тӥ арозь
Туспуктэм: Алексей Арзамасцев

Удмуртия сӥльлы пудо вордонэз 2030-тӥ арозь 11 поллы йылэтыны чакла. Со сярысь элькунысь гурт возёсъя но сиён-юонъя министерстволэн пресс-службаез ивортэ.

Туннэ улосвылын сӥльлы ярась 906 йыр пудо лыдъяське. Элькунысь гурт возёсъя но сиён-юонъя министерство матысь дас ар ӵоже лыдпусэз 10 сюрсозь вуттыны но араз 1 сюрс 400 тонна мраморной лыдъяськись кунян сӥль поттыны ужпум пуктэ

2020-тӥ арысен Удмуртиын пудо вордыны басьтӥськись возёсъёслы субсидиос сётъялозы, одӥг пудо йырлы 5 сюрс манет. Элькун коньдэтын со ужпумлы 2 миллион 500 сюрс манет висъямын. 

Элькунысь гурт возёсъя но сиён-юонъя министрлэн воштӥсезлэн Наталья Шавшуковалэн верамезъя, матысь дыре фермаосты паськытатон, ӟеч выжыысь пудо уськытон, сӥль поттон но переработка ужпумъёсты сэрттоно-пертчоно луоз.

2020-2021 аръёсы улосвылын пудо куайытонъя но переработкая нырысетӥосыз площадкаос кылдыны кулэ, отын ик пудо вандон цехъёс ужалозы.

Нырысетӥ объектъёс ужзэс мытӥзы ни. Кылсярысь, Алнаш черкогуртысь «Тойма» гурт кооператив сӥль поттонъя комбинатсэ паськытатэ, пудо вандон цехсэ туэ инвожое усьтыны малпа
Наталья Шавшукова, Удмуртиысь гурт возёсъя но сиён-юонъя министрлэн воштӥсез

Та дырозь Удмуртиын кунян куайытонэн 15 гинэ возёсъёс выро, тросэз соос пӧлысь фермеръёс. 

Шаерысьтымы калыкез 31 процентлы гинэ тырмымон асьме кунян сӥлен сюдӥськомы. Ар куспын оглом 18 сюрс 700 тонна люкаське, со улэп пудоез санэ басьтыса. Соин ик элькунамы сӥль поттыны луонлыкъёс бадӟымесь
Наталья Шавшукова, Удмуртиысь гурт возёсъя но сиён-юонъя министрлэн воштӥсез

Нялтас вераса, 2020-тӥ арын Удмуртиын фермеръёслы грантъёслэн быдӟалазы будоз.  

Тодэ вайытом, Удмуртиысь гурт но фермер возёсъёс кылем арын 758 сюрс 900 тонна йӧл кыскизы, со миымлэсь 8,2 процентлы тросгес. 

Наши партнеры

Наверх
Вниз