Ижкар+11 °C
28 -тӥ куарусён 2020 Вордӥськон
18+

Йӧл кыскон удысын выль рекорд пуктӥзы Удмуртиын

  • 322
  • 0
Ижкар / Удмуртия
Йӧл кыскон удысын выль рекорд пуктӥзы Удмуртиын
Туспуктэм: Григорий Фомин

Удмуртиын йӧл поттон удысын выль рекорд пуктӥзы – нунал ӵоже котькуд скаллэсь 20 килограмм йӧл кыскизы (11-тӥ куартолэзьлы Россияя лыдпус – 18 килограмм 300 грамм вал). Со сярысь элькунысь гурт возёсъя но сиён-юонъя министерстволэн пресс-службаез ивортэ.

Азьвыл элькунамы йӧл кыскон удысын тужгес бадӟымез огъя лыдпус 19 килограмм 300 грамм вал. Сое 2019-тӥ арын инвожое пусйизы. 20 килограммозь Удмуртия ноку ӧз сузьтӥськылы

Нуналаз котькинлэсь трос йӧл Вотка ёросысь «Мир» огазеяськонын кыско – скаллэсь 34 килограмм 900 грамм. Предприятиын нуналаз оглом 60 сюрс килограмм йӧл потто. Кыкетӥ интыын Шаркан ёросысь «Кипун» огазеяськон – татысь скалъёс нуналаз 32 килограмм 500 грамм йӧл сёто. Куинетӥ – Пичи Пурга ёросысь «Радуга-Агро» огазеяськон – 28 килограмм 600 грамм.

Нуналаз йӧл кысконъя рейтинге озьы ик Глаз ёросысь куинь возёсъёс пыризы: «Чура» огазеяськон (28 килограмм 300 грамм), «Коммунар» гурт возёс (27 килограмм 200 грамм) но «Парзинский» гурт возёс (27 килограмм 100 грамм). Берпуметӥез мында ик Вавож ёросысь «Колос» возёсын кыско. Эгра ёросысь «Рассвет» огазеяськонысь скалъёс 26 килограмм 600 грамм сёто, Шаркан ёросысь «Восход» огазеяськонысь – 26 килограмм 500 грамм. Озьы ик 10 устоосыз пӧлы Вавож ёросысь Мичурин нимо колхоз но пыриз – отысь пудо вордӥсьёс котькуд скаллэсь 26 килограмм 200 грамм йӧл кыскизы.

Оглом учконо ке, Удмуртиысь йӧл поттон удыс азинске - 2020-тӥ ар кутсконысен 5,4 процентлы тросгес йӧл поттӥзы. Толшор-оштолэзь ӵоже 262 сюрс 800 тонна йӧл кыскизы, 2019-тӥ арен ӵошатыса, 13 сюрс 600 тонналы тросгес. Йӧлэз вузан но 6,8 процентлы йылӥз – 240 сюрс 400 тонна луиз (кылем арын 224 сюрс 900 тонна вал). 

Котьку сямен ик, элькунын йӧл поттон удысэз Вавож ёрос валтэ. Туэ ньыль толэзь ӵоже ёросысь предприятиосын 25 сюрс 200 тонна йӧл кыскизы, со пӧлысь 23 сюрс 600 тонназэ вузазы

Йӧлэз басьтон дунъёс но огсыр возисько. Туннэ нуналлы Удмуртиын килограмм йӧлэз шорлыдын 24 манет 18 коньыен вузало.  Со дун туэ толшорысен ӧз вошъяськы. Нош кылем арын куартолэзе йӧлэз 22 манет 64 коньыен вузаллязы. 

Тодэ вайытом, туэ куинь толэзь ӵоже Удмуртиысь гурт возёсъёс йӧл вузанэз 9,5 процентлы йылэтӥзы



Наверх
Вниз