Ижкар+19 °C
2 -тӥ пӧсьтолэзь 2020 Покчиарня
16+

Удмуртиын агропром огъетын ужъёс коронавирус вӧлмон вакытэ огсыр мыно

  • 109
  • 0
Ижкар / Удмуртия
Удмуртиын агропром огъетын ужъёс коронавирус вӧлмон вакытэ огсыр мыно
Туспуктэм: Удмуртиысь гурт возёсъя но сиён-юонъя министерстволэн пресс-службаез

Удмуртиын агропром огъетын ужъёс коронавирус вӧлмон вакытэ огсыр но дугдылытэк мыно. Предприятиосын ужасьёслэсь тазалыксэс утьыны кулэ луись арбериоссы кык-ньыль арнялы тырмыт. Со сярысь 28-тӥ куартолэзе мерлыко вотэсъёсын меӵак эфирез дыръя элькун кивалтэтлэн тӧроезлэн воштӥсез, улосвылысь гурт возёсъя но сиён-юонъя министр Ольга Абрамова вераз, ивортэ удысэтлэн пресс-службаез.

Выль коронавирус инфекци вӧлмемен герӟаськем санитарно-эпидемиологической югдур элькунысьтымы агропром огъетысь предприятиослэн оштолэзе-куартолэзе ужамзы вылын зол ӧз шӧдӥськы. Милям номыр ӧз воштӥськы – ваньзы дышем сямъя ужало, одӥг огазеяськон но ужзэ ӧз дугдыты, вуз поттонзэ ӧз кулэсты
Ольга Абрамова, элькун кивалтэтлэн тӧроезлэн воштӥсез, улосвылысь гурт возёсъя но сиён-юонъя министр

Сыӵе югдурез элькунысьтымы гурт возёсъёсын коронавирусэн черлан ньыль учыръёс шараямын вал ке но утьыны луиз. Со понна огазеяськонъёсын кивалтӥсьёслы тау кароно – соос вакчи дыр куспын кулэ луись ужрадъёс ортчытӥзы: ужасьёс пӧлысь висисен кусып возем муртъёсты шараязы, ваньзэсты ик доразы келязы, тестъёс ортчытӥзы.

Ольга Абрамова вераз, кемалась ик ӧвӧл, мерлыко вотэсъёсысь коронавирус шараям предприятиосын поттэм вузъёсты сиён-юонэ кутыны уг яра шуыса гожтэмез лыдӟиз шуыса но пусйиз, со веран шонер ӧвӧл.

Валаны кулэ, вуз поттонъя предприятиос ас ужзэс кышкытлыклэсь утиськонъя чурыт куронъёсты быдэсъяса лэсьто. Туннэ нуналлы коронавирус инфекцилэсь палэнтӥськонъя ужрадъёсты агропром огъетысь вань предприятиосын чаклало. Астэ утён арбериос но дезинфекци лэсьтон суретъёс 100 процентлы тырмыт. Кызьы возьматэ ортчытэм мониторингмы, запасъёссы кык-ньыль арнялы дась
Ольга Абрамова, элькун кивалтэтлэн тӧроезлэн воштӥсез, улосвылысь гурт возёсъя но сиён-юонъя министр

Туннэ нуналлы Удмуртиысь агропром огъетын 37 сюрс 600 пала адями ужа. Со пӧлысь 23 сюрс 700-эз – гурт возёс производствоын, 12 сюрс 300-эз – сиён вузъёс поттонын, 1 сюрс 600-эз – юонъёс поттонын. Ужасьёс но ӧнерчиос ӧжытэзтэк сю процентлы тырмо. 

Тодэ вайытом, элькунысь агропром огъетлы пандемия вакытэ огсыр ужаны сётон понна ватсаса 320 миллион манетлэсь трос коньдон висъялозы



Наверх
Вниз