Ижкар+19 °C
7 -тӥ пӧсьтолэзь 2020 Пуксён
16+

Гурт возёс пудоез онлайн амалэн адӟытонлы йылпумъянъёс лэсьтӥзы Удмуртиын

  • 86
  • 0
Ижкар / Удмуртия
Гурт возёс пудоез онлайн амалэн адӟытонлы йылпумъянъёс лэсьтӥзы Удмуртиын
Туспуктэм: vk.com (Управление по развитию сельских территорий)

Удмуртия нырысетӥез Росси улосвылъёс пӧлын гурт возёс пудоен адӟытонэз онлайн амалэн ортчытӥз. Элькунысь гурт возёсъя но сиён-юонъя министерствоын арня ӵоже кыстӥськем ужрадлы йылпумъянъёс лэсьтӥзы. Со сярысь удысэтлэн пресс-службаез ивортэ.

Ми онлайн амалэн ортчем адӟытон-вожвылъяськон сярысь трос гинэ вазиськонъёс басьтӥм. Ми понна со выль вал, кунамы но таӵе ужрад нырысьсэ ортчиз. «Витьлы» пӧрмиз
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр
 

Пудоез видео вылэ пуктыса возьматонэ Россиысь вить улосвылъёс пыриськизы - Удмуртия сяна, Татарстанысь, Тверь, Свердловск но Челябинск улосвылъёс. Соос пӧртэм номинациосын 148 пудоез возьматӥзы. Элькунысьтымы 43 гурт возёсъёс асьсэлэсь азинсконъёссэс возьматӥзы. Скалъёсты, ошъёсты но ветылъёсты США-ысь но экспертъёс - Пи-Джей Бадлер но Майк Крик - дунъязы. 

Удмуртиысь тужгес устоез скал Дэри ёросысь «Путь Ильича» племзаводысь Чайка нимо скал луиз, со нуналаз 42 килограмм йӧл сётэ. 

Ас выжыысьтыз туж усто скал – выжылэн вань ӟечлыкъёсыз адӟисько! Валтӥсез, солэн йӧл сётон сӧзнэтэз туж умой азинскемын, вераез вожвылъяськыны быгатӥсь – со сыӵе идеал, кудзэ ми вань возьматонъёс дыръя утчаськом
Майк Крик, США-ысь гурт возёс пудоя эксперт

Сӥлё выжыез возьматон ӧрын Пичи Пурга ёросысь Надежда Чушъяловалэн крестьян-фермер возёсысьтыз Майя нимо ветыл котькинэ азьпалтӥз. Пусъём, кутскись фермер 2019-тӥ арын гинэ «Агростартап» программая 3 миллион манет тыр грант утӥз но Пермь улосвылысь нырысетӥ пудозэ басьтӥз вал.

Озьы ик адӟытон улсын сӥльлы сюро таза пудоез эскеронъя нырысетӥез улосвылкуспо смотр-конкурс ортчиз. Вормисе Тверь улосвылысь «Кашин луг» племрепродукторысь кык ареслэсь бадӟым Лего-Драйф нимо ошез бырйизы.

Предприятилэн кивалтӥсез Станислав Горянский та ужрадэ пыриськон туж тунсыко но пайдалыко вал шуыса пусйиз.

Милям предприятимылэн валтӥсь ӧрез Россиын но, кунгож сьӧрын но племенной ужен герӟаське. Соин ик калыккуспо судьяослэсь дунъет басьтон ми понна туж дуно. Ми адӟим, ог-огмылэсь кыдёкын луыса но огазеяськыны но пудо вордон удысысь валтӥсь ужпумъёсты ӵошен сэрттыны-пертчыны луэ шуыса
Станислав Горянский, «Кашин луг» предприятилэн кивалтӥсез

Ужрадлы озьы ик вылӥ дунъет «Союзмолоко» но, герефорд выжыез будэтӥсьёслэн йӧскалык ассоциацизы но сётӥзы.

«Союзмолоко» огазеяськонлэн кивалтӥсез Артём Белов Удмуртия берло аръёсы Россилэн огез йӧл поттон шоркарез луэ ини шуыса пусйиз.

Тӥ понна та ужрад азинскыны луонлык сётоз, озьы ик оскисько, со эшшо но эшшо вӧлмоз, йӧскалык инлык басьтоз. Удмуртия сярысь ваньзы кужмоез йӧл поттон инты луэ шуыса верало ини – тӥляд юн, азинскись, кужмо переработкады, ӟеч выжыысь пудо вордонын генетика ласянь рос-прос уж кутске. Ваньмыз со Россиысь йӧл поттон удысэз азинтыны бадӟым луонлык сётоз
Артём Белов, «Союзмолоко» огазеяськонлэн кивалтӥсез

Калыккуспо судьяос азьланяз но Удмуртиен кусып возьыны дась луэмзэс веразы.

Тӥляд пудодылэн вань ӟечлыксы, кудӥз соослы вожвылъяськыны бадӟым луонлык сётэ. Улэпкын но адӟеме потэ, кызьы пудодылэн ӟечлыкез будэ но генетика ласянь ужды умоятске. Асэныды но синмысь синме вераськеме потэ. Тӥляд адӟытонады пыриськыны но судья луыны мон понна туж бадӟым дан
Майк Крик, США-ысь гурт возёс пудоя эксперт

Тодэ вайытом, Удмуртиын радъяськись адӟытонын туэ нырысьсэ мукет улосвылъёс но пудозэс возьматӥзы.



Наверх
Вниз