Ижкар+20 °C
9 -тӥ гудырикошкон 2020 Воскресенье
16+

Фермерлэсь нуналзэ пусйизы Удмуртиын

  • 51
  • 0
Лудорвай / Удмуртия
Фермерлэсь нуналзэ пусйизы Удмуртиын
Туспуктэм: Удмуртиысь гурт возёсъя но сиён-юонъя министерстволэн пресс-службаез

30-тӥ пӧсьтолэзе «Лудорвай» музей-заповедниклэн интывылаз Фермерлэсь нуналзэ пусйизы. Туэ со Удмуртиын нырысетӥ фермер возёсъёсты кылдытэм дырысен 30 ар тырмонлы сӥземын вал. Со сярысь элькунысь гурт возёсъя но сиён-юонъя министерстволэн пресс-службаез ивортэ.

Нокыӵе шугъяськонъёс шоры учкытэк, ми тодӥськомы, мар понна ми улӥськом. Милемыз ярато но валтӥсез – ми кунлэсь юрттэтсэ шӧдӥськом!
Михаил Лебедев, Удмуртиысь фермер возёсъёслэн огазеяськонзылэн тӧроез

30 ар ӵоже фермеръёс бадӟым кужымлы пӧрмизы. Егитъёс но пумен ӵемгес улонзэс гурт удысэн герӟаны мылкыд каро. Туэ «Агростартап» грантлы вожвылъяськонэ 140 адями куриськон сётӥз. Оглом ньыль программаосъя - «Семьяен ужан ферма», «Кутскись фермер», «Агростартап» но гурт кооперативъёслэсь ваньбурзэс азинтон – 47 фермеръёс грантъёс утӥзы. 2020-тӥ арын Удмуртиын та удыслы 205 миллион манет висъязы.

Котырес дырпусэн валче устооссэ фермеръёсты пӧртэм данъетъёсын пусйизы. Россиысь крестьян (фермер) возёсъёслэн но гурт кооперативъёслэн ассоциацизылэсь (АККОР) вылӥ данъетсэ – тодосчи агроном Терентий Мальцев нимо медалез – Дэбес ёросысь «Темп» возёслэн кивалтӥсез Татьяна Перевозчикова басьтӥз.

«Россиысь дано фермер» медаль Дэри ёросысь «Захаров и компания» фермер возёслэн кивалтӥсезлы Виктор Захаровлы, Красногорск ёросысь «Колос» возёслэн кивалтӥсезлы Сергей Аникинлы но Дэри ёросысь фермерлы Виктор Поздеевлы сётӥзы.

Огазеяськонлэсь Данъян грамотазэ Пичи Пурга ёросысь Ирина Медведева но Алнаш ёросысь Юрий Степанов басьтӥзы.

Нош Можга ёросысь тодмо фермерез Галина Белорозёроваез «Всероссийская книга Почёта» федерал реестре пыртӥзы.

«Всероссийская книга Почёта» федерал реестр 2008-тӥ арын кылдытэмын но 2013-тӥ арысен арлы быдэ тырмытӥське. Отчы пӧртэм удысын ужась тужгес йӧно огазеяськонъёсты пырто, кудъёсыз асьсэ уженызы ёросысьтызы, улосвылысьтызы мерлык но экономика удысъёсты азинтыны но ас удыссылэсь пайдалыксэ будэтыны юртто

Тодэ вайытом, туннэ нуналлы Удмуртиын 1 сюрс 62 фермер возёсъёс но нимаз ужбергатӥсьёс пусъемын. Элькунысь гурт возёс удысын поттэм вань вузъёслэсь 36 процентсэ соос сётӥзы. 



Наверх
Вниз