Ижкар-18 °C
22 -тӥ толшор 2021 Удмуртарня
18+

Ольга Абрамова: агропром огъет Удмуртия понна одӥгез валтӥсь ӧр луэ

  • 99
  • 0
Ижкар / Удмуртия
Ольга Абрамова: агропром огъет Удмуртия понна одӥгез валтӥсь ӧр луэ
Туспуктэм: Удмуртиысь тӧролэн но кивалтэтлэн пресс-службазы

2020-тӥ арын экономика но эпидемиологи ласянь секыт югдурын но Удмуртиысь агропром огъет огсыр ужа но ваньбур поттонэз будэтэ. 20-тӥ коньывуонэ элькунлэн тӧроеныз Александр Бречаловен видеоконференци амалэн кенешонын удыслэн ужамезлы нырысь-валысь йылпумъянъёс лэсьтӥзы. Со сярысь улосвыл тӧролэн но кивалтэтлэн пресс-службазы ивортэ.

2020-тӥ ар ми понна зэмзэ но выль луонлыкъёсын ар луиз. Валамон, улосвылмы понна агропром огъет одӥгез валтӥсь ӧр луэ – туннэ гуртын 508 сюрс адями улэ, 37 сюрсэз гурт возёсын ваньбур поттон бордын ужало. 2020-тӥ арын Удмуртиысь агропром огъетэз азинтонэ котькудӥз муниципал кылдытэт, котькудӥз коллектив аслэсьтыз кужымзэ сётӥз
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Таяз арын элькунысь гурт возёсъёс 703 сюрс 500 тонна ю тысь жильдӥзы, гектарысь шорлыдын 22,4 центнер усиз. Кылем арен ӵошатыса, туэ 40 сюрс 600 тонналы тросгес ю нянь люкаськиз. Гуртоос вуоно арлы но ӟеч инъет кылдытон сярысь сюлмасько – толйись юос улэ висъям музъемъёслэсь быдӟалазэс 10 сюрс гектарлэсь трослы будэтӥзы.

Удмуртстат ивортэмъя, ар кутсконысен элькунын 664 сюрс 500 тонна йӧл кыскизы. Кылем арысь та вакытэн ӵошатыса, со 4,8 процентлы тросгес. Озьы ик мукет ӧръёсъя но ваньбур поттон йылэ: курегпуз 830 миллион бичазы, сӥльлы 113 сюрс 700 тонна пудо но тылобурдо будэтӥзы.

Улосвылын гурт возён ужпӧрлэн выль ӧръёсыз но азинскыны кутскизы: сӥлё выжыысь пудо вордон, сити-фермерство, йӧло выжыысь кечьёсты но валъёсты будэтон, курка вордон, муш вордон

Удмуртиысь гурт возёс ваньбур поттӥсьёс кунгож сьӧрысь вузпӧръёсы но потыны тыршо. 2020-тӥ ар кутсконысен экспортлэн быдӟалаез миым сярысь 62 процентлы будӥз но 1-тӥ коньывуонлы 3 миллиард 100 миллион долларозь вуиз.

Нырысьсэ Удмуртиын но Россиын генетикая ӵектосэз кутскизы. Со пудо-животлэсь ӟечлыксэ, калыккуспо куронъёсты лыдэ басьтыса, умоятон ужез нуыны луонлык сётоз.

Со сяна, нырысьсэ пудо-животэз возьматонъя онлайн-вожвылъяськон ортчиз, дунъясьёс пӧлын калыккуспо экспертъёс вал. Удмуртиысь кивалтэтлэн юрттэменыз агропредприятиос понна нырысетӥзэ «Made in Udmurtia» экспертной акселераторез кутскизы. Кунгож сьӧры вузан понна вузъёс поттыны интыосты радъяны элькун коньдэтын нырысьсэ 57 миллион манет тыр грантъёс чаклазы. Озьы ик элькун Россиысь гурт возёсъя министерстволэн гурт интывылъёсты котыр ласянь азинтонъя кун программаяз мыло-кыдо пыриське.

Ватсалом, Удмуртиысь гурт возёсъя но сиён-юонъя министерство улосвылысь агропром огъетэз 2025-тӥ арозь азинтонъя выль кун программаез кылдытон борды басьтӥськиз

Тодэ вайытом, 2021-тӥ арез Удмуртиын Гуртлэн ареныз ялӥзы.



Наверх
Вниз