Ижкар-18 °C
22 -тӥ толшор 2021 Удмуртарня
18+

Тыметын чорыг будэтонэз куинь поллы йылтыны малпало Удмуртиын

  • 78
  • 0
Ижкар / Удмуртия
Тыметын чорыг будэтонэз куинь поллы йылтыны малпало Удмуртиын
Туспуктэм: Григорий Фомин

Удмуртиын тыметын чорыг будэтонэз куинь поллы йылтыны малпало. Элькунысь гурт возёсъя но сиён-юонъя министерство та удысэз азинтонъя нимысьтыз программа дасяны кутскиз. Со сярысь удысэтлэн пресс-службаез ивортӥз.

2025-тӥ арозь программаез улонэ пыӵатыны 349 миллион 400 сюрс манет висъяны чаклало. Со тыметын чорыг будэтонэз араз туала 1 сюрс 200 тоннаысь 3 сюрс 500 тоннаозь вуттыны луонлык сётоз

Туннэ Удмуртиын 1 сюрс 188 тыметъёс лыдъясько. Со пӧлысь 268-эз вить сюрс гектарлэсь бадӟым – соос чорыг будэтыны тужгес тупало. Тросэз сыӵе тыметъёс Алнаш, Дэри, Красногорск, Можга, Сьӧлта, Ува, Якшур-Бодья ёросъёсын интыяськемын. Со сяна, 1-5 гектар быдӟа 920 тыметъёс вань. Озьыен, вань кытын ужаны.

Та дыре элькунын чорыглы дефицит 26 сюрс тонна пала луэ. Одӥг адями араз шорлыдын 12 килограмм чорыг сиё, эм эсэпъёсъя ӧжытсэ 22 килограмм луыны кулэ

Чорыг будэтонэз азинтон программалы коньдон элькун бюджетысь висъялозы. Улосвыл министерство чорыг поттӥсьёслы 20 процентсэ быдтэм коньдонзэс берыкыты малпа. Удыс борды выль кутскись возёсъёслы грантъёс но чакламын луозы.

2020-тӥ арын Удмуртиын чорыг будэтыны 52 инты висъямын, та дырлы арендае тямысэз сётэмын. Удыс борды басьтӥськыны мылкыд карисьёс ӧжыт ӧвӧл, пусъё министерствоын. Дышетскыны но вань кинлэсь –Вотка ёросысь «Пихтовка» возёсэ карп будэтонъя тодон-валанъёс басьтыны 27 улосвылъёсысь вуыло. Отысь ӧнерчиос вуоно ужъюлтошъёссылы курсъёс радъяны, вечи чорыген юрттыны дась. Соослэн верамзыя, элькунысь тыметъёсын пӧртэм чорыгъёсты будэтыны луэ, со пӧлын амур, толстолобик, пелядь но форель.

Будэтэм чорыгез вузаны но сьӧрлось чорыген вожвылъяськыны кооперация юрттоз. Чорыг вордон кластер кылдытонъя схема дасямын ни. Со понна пусйыны кулэ, кыӵе ӧрын ужалоз котькудӥз ёрос - кин вечи чорыгез одӥг арозь будэтоз, кин кык арозь, нош кин чорыгез вузан дорозь сюдоз. Озьы ужаны капчигес но, пайдаёгес но луоз, пусъё улосвылысь гурт возёсъя но сиён-юонъя министерствоын. Элькунлы окмымон луымон вечи чорыг будэтон понна 17 тыметъёс кылдытыны тырмыт луоз.

Тодэ вайытом, Удмуртиысь фермеръёс кеч йӧллэсь француз сыр поттыны дышизы



Наверх
Вниз