Ижкар-4 °C
5 -тӥ толсур 2021 Воскресенье
18+

2021-тӥ арын Удмуртиын гурт возёс удысысь 252 ужасьёс одӥг пол сётӥськись тыронъёсты басьтӥзы ни. Со понна 20 миллион 100 сюрс манет висъязы, ивортӥз элькунысь гурт возёсъя но сиён-юонъя министерстволэн пресс-службаез.

11 толэзь ӵоже «подъёмнойёс» басьтӥзы 74 трактористъёс, 63 скал кыскисьёс, куинь осеменаторъёс но вылӥ, шор ёзо дышетскемен но заочной амалэн дышетскем 112 ӧнерчиос.

Юрттэтлы элькунысь вань ёросъёсысь егитъёс вазиськизы. Туннэ нуналлы коньдон басьтэмъёс тужгес трос пусъемын Дэри ёросын – 29 адями. Можга ёросын 22, Алнаш ёросын 21, Вавож но Ува ёросъёсын быдэн 18 муртлы «Подъёмной» сётӥзы.

Ужам стажез лыдэ басьтыса, мерлыко тыриськонъёсты кык пол сёто. Кылсярысь, очной амалэн дышетскись егит ӧнерчиос гурт возёсын одӥг ар ужамзы бере 70 сюрс манет басьтыны быгато, куинь ар ужамзы бере – эшшо 180 сюрс манет. Заочной амалэн дышетскись но ужась егитъёслы 100 сюрс манет тырыны чакламын, трактористъёслы, скал кыскисьёслы но осеменаторъёслы – 140 сюрс манет.

Оглом туэ егит ужасьёслы 29 миллион 620 сюрс манет тырыны чакламын. Куриськонъёсты гурт возёсъя министерствоын 15-тӥ толсурозь кутозы.

Тодэ вайытом, «подъёмнойёслэсь» быдӟалазэс 2020-тӥ арын будэтӥзы. Кылем арын Удмуртиысь агропром огъетын тыршись 292 егит ӧнерчиослы 27 миллион манет тыр одӥг юрттэт висъязы.

Ижысь гурт возёсъёсъя кун академиысь ветеринаръёслэн «Спасатели» студотрядзы «Животноводство» ӧрын Россиын устоез луиз. Гурт возёс удысысь вылӥ дышетсконниосысь студентъёслэн отрядъёссылэн 2021-тӥ арын ужамзылы йылпумъянъёс онлайн-слётын лэсьтӥзы. Со сярысь Россиысь студотрядъёслэн огазеяськонзылэн улосвыл ёзэтэзлэн пресс-службаез ивортӥз.

Таяз арын «Спасатели» отрядысь егитъёс улосвылкуспо отрядэн Ярославль улосвылысь гурт возёсын ужазы, озьы ик Удмуртиысь гурт возёсъёсын. Та дыре элькунамы ветеринаръёслэн одӥг гинэ отрядзы кылдытэмын. Солэн мереткылэз: «Верность отряду – верность профессии».

Тодэ вайытом, кылем арняе Удмуртиын куинь выль пудо гидъёс усьтӥзы.  

Удмуртиысь мушкасьёслы бырем мушъёссы понна компенсаци тырыны элькун коньдэтысь 2 миллион 500 сюрс манет висъязы. Куриськонъёсты 29-тӥ шуркынмонысен кутыны кутскозы. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Субсидиосты пестицидъёсын шугмыса бырем мушъёслэн кузёоссылы сётозы. Туэ чечы люкан вакытэ сыӵе учыръёсты Глаз, Дэри, Сарапул, Сьӧлта, Сюмси, Ува ёросъёсын пусйизы.

Куриськон сёто понна мушбакчалэн ветеринар паспортэз луыны кулэ. Озьы ик мушбакчаез эскерон сярысь но мушъёслэн бусыосы пазям хими суретъёс сэрен быремзэс зэматӥсь ужкагазъёсты сётоно луоз.

Тыронлэн быдӟалаез одӥг муш семья понна 5 сюрс манетлэсь кӧня ке тросгес.

Мушкасьёслы нырысетӥ субсидиосты 2020-тӥ арын висъязы. Соку 24 адями куриськон сётӥз, соослы оглом 1 миллион 210 сюрс манет тыризы.

Туэ куриськонъёсты 20-тӥ толсурозь кутозы. Куронъёсын татаын тодматскыны луоз.

Тодэ вайытом, Удмуртиын мушъёсты утьыны юрттӥсь сервис кылдытӥзы.  

Иворъёс

Таяз арняе Удмуртиын куинь выль гидъёс усьтӥзы. Кыкез со пӧлысь бадӟым огазеяськонъёсын, огез — фермер возёсын. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Вавож ёросысь Мичурин нимо возёсын 864 йыр пудолы чаклам бадӟым огъет пуктӥзы. Отчы кык гид пыре: огез 600 йыр кысконо скалъёслы чакламын, мукетыз — кунян ваёно 264 скалъёслы. Корпусъёс ог-огенызы переходэн герӟамын.

Скалъёсты кыскыны «Ёлочка» установка пуктӥзы. Пудоез цифровой система пыр чакласа возё. Солы луыса пудо вордӥсьёс скалъёслэн тазалыксы, йӧл сётэмзы сярысь ивортодэт ялан басьто. Сӧзнэт ачиз котькуд скаллэсь историзэ базае пыртэ, графикъёс, отчётъёс кылдытъя, висёнъёссы ӧвӧл-а эскере.

Огъетэз коньывуон пумын уже кутӥзы. Отчы Венгриысь голштин-фриз выжыысь 291 ветылъёс басьтӥзы. Уллёез куинь гинэ операторъёс утялто

Возёслэн тӧроезлэн Владимир Капеевлэн кылъёсызъя, 2023-тӥ арын лэсьтӥськон ужъёссылэсь кыкетӥ люкетсэ кутскозы. Эшшо 600 йырлы скал гид но кунян ваён кыкетӥ висъет лэсьтозы. Скалъёсты кыскыны азинлыкозэгес тӥрлык пуктозы – «Карусель» платформа. Нош «Ёлочкаын» нырысьсэ кунянам яке шугъяськытӥсь скалъёсты гинэ кыскозы на.

Кыкетӥзэ гидэз, 500 йырлы, Можга ёросысь Пазялын «Родина» огазеяськонын усьтӥзы. Со куать толэзёзь кунянъёслы чакламын. Гидын соосты «кезьыт амалэн» будэтозы. Кунянъёсты сюдыны йӧлэз шунтӥсь но пастеризовать карись нимысьтыз тӥрлык басьтӥзы.

Со сяна, та арня кутсконын 300 йырлы эшшо одӥг ферма усьтӥзы. Сое Красногорск ёросысь Гаинцы гуртысь Мусаев фермеръёс пуктӥзы. Скал гидзэс усьтэмен семья ог 10 пала ужан инты кылдытӥз.

Тодэ вайытом, туэ Удмуртиын 900 сюрс тонналэсь трос йӧл кыскыны чаклало. 


2021-тӥ арын Удмуртиын 910 сюрс тоннаозь йӧл кыскыны чаклало. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Удмуртия 2016-тӥ арысен ини араз 1 миллион тонна йӧл кыскон ужпумез быдэстыны тырше. Нырысь-валысь чакланъёсъя, 2021-тӥ арын гуртын тыршисьёс солы эшшо 33 сюрс тонналы матэктозы. Миым сярысь ӵапак сомындалы йӧлзы йылыны кулэ вань категориосысь возёсъёсын.

Гурт возёсъёс но фермер возёсъёс  туэ толшорысен коньывуонозь 716,6 сюрс тонна йӧл кыскизы ини. Кылем арен ӵошатыса, со 6,3 процентлы тросгес. Йӧлэз вузан 6,7 процентлы будӥз - йӧллэсь сиён-юонъёс поттӥсь заводъёсы 656,3 сюрс тонназэ келязы.

Йӧл поттонын азьветлӥсьёс пӧлын Вавож, Шаркан но Можга ёросъёсысь возёсъёс. Ар кутсконысен соос оглом 185,5 сюрс тонна йӧл кыскизы. 1-тӥ шуркынмонлы лыдпусъёсъя, со элькунамы огъя поттэм йӧллэн ог ньыльмос люкетэз луэ. 

Тодэ вайытом, 2021-тӥ арын Удмуртиын 9 сюрс гектар пала музъемъёсты гурт возёсэ берыктӥзы.

2021-тӥ арын Удмуртиын 9 сюрс гектар пала музъемъёсты гурт возёс уже берыктӥзы. Со сярысь улосвыллэн тӧроез Александр Бречалов «ВКонтакте» мерлыко вотэсысь бамаз ивортӥз.

Гурт возёсын ужасьёсмы таяз арын 8 сюрс 700 гектарлэсь трос музъемъёсты уже берыктӥзы. Валан понна – со Сарапуллэн интывылэз быдӟа луэ
Александр Бречалов, Удмуртилэн тӧроез

Туэ гурт возёсъёслы элькун коньдэтысь 44 миллион манет висъязы. Тужгес трос музъемъёсты улӟытӥзы Сарапул ёросын – 3 сюрс 300 гектар котыр.

Аналтэм музъемъёсты гурт возёсэ берыктон борды Удмуртиын 2017-тӥ арын рос-прос басьтӥськизы. Со дырысен 35 сюрс гектар вылын ю-нянь но бакча сиёнъёс будыны кутскизы.

Улосвыл тӧролэн кылъёсызъя, та дыре элькунын 200 сюрслэсь трос гыроно музъемъёс уже уг кутӥсько.

Тодэ вайытом, 2020-тӥ арын Удмуртиын 7 сюрс 602 гектар мында аналтэм гурт возёс музъемъёсты уже берыктӥзы.

Удмуртиысь бакча сиёнъёслэсь чипсы «Вкусы России – 2021» вожвылъяськонын 10 устоосыз сиёнъёс пӧлы шедиз. Конкурслы йылпумъянъёсты 15-тӥ шуркынмонэ шараязы. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Улосвылымы вожвылъяськонэ 15 сиёнъёссэ ӵектӥз вал. Чипсыосты «Вкус без границ» номинациын висъязы Отын экспортлы бадӟым луонлыкъёсын вузъёсты пусйизы, нош вормисе Астраханьысь эксэйчорыглэн мызез, Ямалысь пужей сӥль но Томскысь кедр йӧл потӥзы.

Вожвылъяськон Россиысь ваньмысьтыз сямен улосвылъёсысь 720 брендъёс пӧлын тямыс номинациосын мынӥз. Вормисе 24 сиёнъёс потӥзы. «Нас выбирают» номинациын куара сётонэ 1 миллион 200 сюрслэсь трос адями пыриськиз.

Тодэ вайытом, 2020-тӥ арын вожвылъяськонын 10 устоосыз сиёнъёс пӧлы перепеч шедиз вал.

Удмуртиысь сизьым ёросъёсысь эшшо 11 кутскись фермеръёслы «Агростартап» конкурс улсын коньдонэн юрттэт сётозы. Со понна элькун коньдэтысь ватсаса 30,1 миллион манет висъязы, ивортӥз гурт возёсъя но сиён-юонъя министерстволэн пресс-службаез.

Грант басьтозы:

  • Александр Бичурин, Пичи Пурга ёрос (ыж вордон);
  • Александр Гарасимив, Дэри ёрос (тылобурдо вордон);
  • Евгений Ермолович, Сарапул ёрос (будос будэтон);
  • Валерий Загребин, Якшур-Бӧдья ёрос (картофка будэтон);
  • Игорь Коростин, Каракулино ёрос (теплицаын будос будэтон);
  • Майя Полунина, Вотка ёрос (емыш будэтон, боры);
  • Люция Мингазетдинова, Пичи Пурга ёрос (теплицаын будос будэтон);
  • Ильдар Хакимянов, Сарапул ёрос (будос будэтон);
  • Ирина Овчинникова, Дэри ёрос (теплицаын будосъёс будэтон);
  • Надежда Шадрина, Кияса ёрос (тылобурдо будэто);
  • Василий Чернышев, Дэри ёрос (будосъёс будэтон).

Али соосын тупанкылъёс юнмато.

Пусъём, 2021-тӥ арын куарусёнэ «Агростартап» конкурс улсын оглом 79,6 миллион манет тыр 22 грантъёс сётӥзы ни вал. Али соосты басьтӥсьёс ужзэс азинтон бордын тыршо.

Озьы, Сьӧлта ёросысь Павел Обухов 3 миллион манет грантэзлы Нижний Новгород улосвылысь 100 йыр кечъёс, йӧл кыскон тӥрлык но йӧлэз сӥятӥсь танк басьтӥз ни. Со ёросазы кеч вордон борды басьтӥськем нырысетӥез фермер луэ.

Пичи Пурга ёросысь Игорь Поздеев йӧл поттыны пудо вордон борды басьтӥськиз. 5 миллион манет тыр грантсэ 18 йыр ветылъёс, сиён люкылӥсь миксер, МТЗ трактор но фронтальной погрузчик басьтыны быдтӥз.

Можга ёросысь Екатерина Сари-Меликян сизьым огмет машинаос но агрегатъёс басьтӥз ни: трактор, погрузчик, пресс-подборщик, мажес, сиён люкылӥсь миксер но мукет. Кылемзэ коньдонзэ сӥлё выжыысь 50 ошпиос басьтыны кутоз.

Алнаш ёросысь Владимир Сергеев 15 миллион манет грант утӥз. Соин экскаватор-погрузчик но кунян ваён юрт басьтӥз. Тупатъян ужъёс бере отчы сӥльлы будэтоно пудоез интыялозы.

Оглом туэ фермеръёслы но гурт возёс

Читать полностью

28-тӥ коньывуонэ Вотка ёросысь гурт возёсэ Даниысь 295 йыр сюро таза пудо вуиз. Со сярысь Россельхознадзорлэн Киров улосвылъя, Удмурт Элькунъя но Пермь шаеръя управлениезлэн пресс-службаез ивортӥз.

Голштин выжыысь ветлыъёсты Россельхознадзорлэн лэземезъя ветеринар ужкагазъёсын вайизы. Эскерем бере пудоез карантинэ пуктӥзы.

2021-тӥ арын Удмуртие Нидерландыысь, Венгриысь, Даниысь 1 сюрс 57 йыр сюро таза пудо вуттӥзы ни.

Тодэ вайытом, Пичи Пурга ёросысь возёсын скалзы куиньмо кунян вайиз

Удмуртиын «Школа фермера» ӵектос ужзэ азьланьтӥз. Таяз ардэ отын «Ремесленное сыроделие» но «Сити-фермерство» ӧръёсъя дунтэк дышетозы. Ивортодэтъя «Удмуртия» агентстволэн корреспондентэз нырысетӥ пумиськонэ вуылӥз.

Мон та ӵектослэсь бадӟым луонлыкъёссэ адӟисько. Со тӧрлыкез, дышетонэз, коньдонэз но ужбергатонэз гуртэз азинтон ужпумез быдэстон понна огазеяз. Ӵектосэ вань пыриськисьёслэн тыршеменызы, соослэн мыло-кыдо луэменызы Удмуртиысь гурт возёс азинскоз
Андрей Брацихин, Ижысь гурт возёсъя кун академилэн кивалтӥсез

Школае шедён понна вожвылъяськонэ 35 куриськон вуиз, жюри 25-сэ бырйиз. 10 адями «Сити-фермерство (овощеводство)» программая дышетскоз, 15 мурт – сыр лэсьтыны дышетскоз. Пыриськисьёс пӧлын академиысь куинь студентъёс но вань, соос гурт возёсын ужен тодмо ини.

Дышетон гурт возёсъя академиын но Россельхозбанклэн «Своё фермерство» платформаяз онлайн амалэн мыноз. Практика элькунысь валтӥсь гурт предприятиосын но фермер возёсъёсын ортчоз. Курс бизнес-планъёсты утёнэн йылпумъяськоз.

Милемлы тунсыко зэмос ужбергатонэн ужаны, эшшо валаны, мар тунсыко кутскись ужбергатӥсьёслы но ваньбур поттӥсьёслы, кытчы ӵектосэ пыриськисьёс ветлозы. Со милемлы ужъюгдурез валан но студентъёсмылэсь кулэяськонъёссэс быдэсъян понна кулэ
Александр Брацихин, Ижысь гурт возёсъя кун академилэн кивалтӥсез

Одӥг адямиез дышетон 60 сюрс манет котыр усе. Но ваньзэ ас вылаз банк басьтэ.

Оскисько, дышетон дыръя басьтэм тодон-валанъёссы тунсыко ӵектосъёс кылдытыны юрттоз, соосты утьыны но улонэ пыӵатыны луоз. Министерство вань сэзь но выль кутсконъёслы юрттыны дась
Елена Шутова, Удмуртиысь гурт возёсъя министерствоысь ёзэтлэн кивалтӥсез

Таиз дышетон курс 24-тӥ толсурозь мыноз. Выпускникъёс кун дипломъёс но Россиысь гурт возёсъя министерстволэсь юрттэт басьтон понна вожвылъяськонэ пыриськыны луонлык басьтозы.

Тодэ вайытом, ӵектослэн нырысетӥ курсаз пыриськем куинь муртлы быдэн 345 сюрс манет тыр грантъёс сётӥзы

18-тӥ коньывуонэ Удмуртиын гурт возёс по переработка удысн ужасьёсты ӧнер нуналэнызы ӟечкылазы. Агропром огъетэз азинтонын тужгес усто тыршисьёсты кун но удысэт данъетъёсын пусйизы. Сӥё-дано ужрад онлайн амалэн ортчиз, ивортӥз элькунысь гурт возёсъя но сиён-юонъя министерстволэн пресс-службаез.

2021-тӥ ар капчи ӧй вал. Озьы ке но, асьме возёсъёс ваньбур поттонзэс будэтыны быгатӥзы. Азьпалан нырысетӥ миллион тоннамы (йӧл – ред.), оскисько, миллион тонна ю тысь но басьтыны тыршомы. Элькунысь ваньмызлы гурт возёс удысын ужасьёслы ӧнерзылы сюлэмзэс сётэмзы понна тау карисько
Ольга Абрамова, Удмуртиысь кивалтэтлэн тӧроезлэн воштӥсез - гурт возёсъя но сиён-юонъя министр

Туннэ Удмуртия Россиын нырысетӥ инты басьтэ етӥн улэ висъя музъемъёслэн быдӟалазыя (7 сюрс гектар), ньылетӥ инты - одӥг улӥсьлы йӧл поттонъя (587,5 килограмм), витетӥ инты – нӧкы вӧй поттонъя (12,1 тонна), куатетӥ – юон йӧл поттонъя (202,7 сюрс тонна), укмысэтӥ – сыр но сыр выллем сиёнъёс лэсьтонъя но одӥг улӥсьлы курегпуз поттонъя (730 штука)

Элькунысь агропром огъетын валтӥсь инты басьтэ йӧл поттон, та удысын оглом 13 сюрс адями ужа. Удмурт йӧлэз быдэс Россиын, озьы ик Белоруссиын, Армениын, Казахстанын, Узбекистанын, Китайын но США-ын юо. Удыслэн ӵуказе нуналэз сярысь малпаськыса, ӧнерчиос кунын нырсетӥосыз пӧлын трос йӧл сётӥсь скалъёслэсь генетика банксэс кылдытыны кутскизы.

Гурт возёсын ужасьёслэн лыдзыя Удмуртия Россиысь агропром огъетын 14-тӥ инты басьтэ (5,1 процент)

Таяз арын 120 ужасьёслы «Удмуртиысь гурт возёс удысысь дано ужась» ним сётӥзы. «Россиысь агропром огъетысь дано ужась» ним Сарапул ёросысь «АгроНива» огазеяськонлэн быдэсъясь кивалтӥсез Андрей Глухов, Шаркан ёросысь «Кипун» огазеяськонысь пудо эмъясь фельдшер Нина Бутолина, Пичи Пурга ёросысь «Югдон» гурт возёсысь тракторист-машинист Иван Иванов басьтӥзы.

Ю-нянез утялтонъя вожвылъяськонын вормисьёсты Удмуртилэн тӧроезлэн таукоронъёсыныз пусйизы. Лымшор палан нырысетӥ инты басьтӥз Вавож ёрос, уйпалан – Эгра ёрос. Вераны кулэ, Вавож ёрос котыр ласянь азьмынӥсь луэ. 2021-тӥ ар кутсконысен тужгес трос йӧл кыскизы – 66 сюрс тонналэсь ятыр. Ӟеч выжыысь сюро таза пудоез вордонэн ньыль заводъёс но кык репродукторъёс выро. Ньыль возёсъёс ӟечлыко кидыс будэтон бордын ужало. Гурт возёс техниказэс 200 миллион манет тыр выльдӥзы. Ар пумозь ёросын 864 йырлы выль скал гид но пудо

Читать полностью

18-тӥ коньывуонлы Удмуртиын тулыс кизёнлы 77 сюрс тонналэсь трос кидысъёс дасязы ни. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Туэ гужем куазь кӧс улӥз ке но, тысё юослэн кидысъёссы чакламлэсь 2 процентлы вылтӥ кисьтэмын ни – 67,7 сюрс тонна интые 69,1 сюрс (кылем арын та дырлы 69,4 сюрс тонна вал.

Тулыс кизёнзэс сюлмаськытэк кутскыны быгатозы Балезино ёросын. Отысь возёсъёс кулэезлэсь 48 процентлы тросгес кидыс дасязы. Озьы ик Шаркан ёросын – 42 процентлы но Кез ёросын – 39 процентлы. Толйись юослэн кидысъёссы 21 процентлы тросгес кисьтэмын – 7,7 сюрс тонна

Та дыре трос аръем турынъёслы гинэ кидыс тырмыт ӧвӧл на – кулэезлэсь 77 процент дасямын, нош етӥн – 72 процентлы. Та кидысъёсты дасян азьланьтӥське на.

Тодэ вайытом, 2021-тӥ арын укмыс толэзьскын Удмуртиын йӧл кысконэз 6,5 процентлы будэтӥзы.

2021-тӥ арын укмыс толэзьскын Удмуртиын оглом 647 сюрс 700 тонна йӧл кыскизы. Кылем арысь та вакытэн ӵошатыса, со 39,5 сюрс тонналы яке 6,5 процентлы тросгес. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Йӧл поттон удысын нырысетӥ инты басьто Вавож ёросысь пудо вордӥсьёс. Соос кысконъя но, вузанъя но азьпалан мыно. Ар кутсконысен отын 66 сюрс 800 тонна йӧл кыскизы но 62 сюрс 400 тонна молокозаводъёсы келязы.

Шаркан ёросысь возёсъёс 54 сюрс 400 тонна йӧл кыскизы, переработкае 50 сюрс 400 тонназэ лэзизы.

Йӧл кысконъя но вузанъя вить устоосыз пӧлы пыро Можга ёрос (46 тонна но 43 тонна), Алнаш ёрос (42,5 тонна но 38,8 тонна), Ува ёрос (40 тонна но 35,9 тонна).

Укмыс толэзьскын йӧс кысконзэс тужгес трослы будэтӥзы Кияса ёросын – 15,6 процентлы. Молокозаводъёслы вузанэз йылтонъя азьпалан Сарапул ёрос – 15,3 тонна.

Кыскем йӧллэн мындалаезъя туннэ Удмуртия Россиын ньылетӥ инты басьтэ. Элькунын котькуд улӥсь асьме йӧллэсь лэсьтэм 248 килограмм сиён-юонъёсты сие-юэ

2021-тӥ ар кутсконысен гурт возёсъёс скал уллёзэс 290 йырлы будэтӥзы, фермер возёсъёс – 932 йырлы. Та дыре Удмуртиын 118 сюрс 903 кысконо скалъёс лыдъясько.

Тодэ вайытом, 2020-тӥ арын элькунын 870 сюрс 800 тонна йӧл кыскизы, азьвыл арен ӵошатыса, со 5,3 процентлы тросгес. Нош куинез возёсъёс Россиысь 100 устоосыз йӧл поттӥсьёс пӧлы шедизы.

Удмуртиын сӥзьыл бусы ужъёс йылпумъян пала вуо. Берпуметӥ гектаръёссэс етӥн, картофка но бакча сиён будэтӥсьёс бушато. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Етӥн 98 процентэз утялтэмын, 150 гектар пала музъем вылын кылемын на Юкаменск ёросын гинэ.

Картофкаез 4 сюрс 800 гектар вылысь копазы, со мерттэмлэн 86 процентэз. Отысь 67 сюрс тонна пала картофка люкаськиз, тросэз толалтэ возьыны интыямын. «Кыкетӥ нянь» гектарысь 141 центнерен усиз (кылем арын 161,3 центнер вал). Кӧс куазь дыръя тужгес ӟеч емыш сётӥзы Дэбес но Юкаменск ёросъёсысь бусыос – гектарысь 241 но 200 центнерен.

Бакча сиёнъёсты 4 сюрс 700 гектар вылысь утялтӥзы. Кубиста оглом 3 сюрс тонна бичазы (кылем арын та дырлы 2,2 сюрс тонна). Гордкушман 736 тонна люказы (миым 935 тонна), ӵужкушман – 848 тонна (миым 867 тонна). Та дырлы 26 процентэз бакча сиёнъёс утялтымтэ на.

Валэс пульдостурын (рапс) 87 процентэз кутсамын, отысь 9 сюрс тонна тысь басьтӥзы – гектарысь шорлыдын 7,6 центнер (миым 14 центнер). Пумен кукуруза бусыос но бушало, туннэ нуналлы солэсь 783 сюрс 500 тонна силос дасязы.

Кӧс куазь вань будосъёслэн удалтонлыксы вылын шӧдӥськиз. Рапс 5 сюрс 300 гектар вылын быриз, бусыын будӥсь бакча сиёнъёс – 25 гектарын. Картофка 290 гектар вылын ӧз буды, соин ик туэ 82 сюрс тонна гинэ люкаськоз шуыса чаклало (миым 108 сюрс 800 тонна). Етӥн 874 гектар вылын пашмиз, оглом 2 сюрс 690 тонна люканы малпало (миым 3 сюрс 390 тонна). 

Удмуртиын гуртысь егитъёслэсь нырысетӥ форумзэс мукет нуналъёслы выжтӥзы. Со сярысь Россиысь гурт егитъёслэн огазеяськонзылэн элькунъя ёзэтэзлэн «ВКонтакте» мерлыко вотэсысь бамаз ивортӥзы.

Форум 2021-тӥ арын 3-5 толсуре ортчоз

Сыӵе пумкылъян коронавирус инфекци вӧлмонэз алон понна выль сюбегатонъёс кужымазы пыремен кутӥзы.

Куриськонъёсты чӧлсконпусъя сётыны луэ.

Тодэ вайытом, форум Удмуртиын «Гуртлэн арез» улсын 15-17 коньывуонэ ортчыны кулэ вал. Отчы гуртъёсысь 16-35 аресъем егитъёс пыриськыны быгато. 

Россиысь гурт возёсъя министерство Шаркан ёросысь администрациез гурт интывылъёсты котыр ласянь азинтон ужез умой быдэсъямез понна зарни медален пусйиз. Данъетэз Москва улосвылын ортчись гурт возёсъя «Золотая осень» огъяросии адӟытонын сётӥзы. Со сярысь элькун тӧролэн но кивалтэтлэн пресс-службазы ивортӥз.

Кун программалэн нырысетӥ ужан араз ик ёросын трос ӵектосъёсты улонэ пыӵатӥзы. Валтӥсез но тужгес бадӟымез соос пӧлысь – Шарканысь Лулчеберетъя но шутэтсконъя центр. Солэн быдӟалаез 2,4 сюрс квадрат метр луиз. Ужъюртэ 40-лэсь трос кружокъёс, куара гожтон студия, 400 учкисьлы зал, кузпалъяськон зал интыяськизы. 2021-тӥ арын укмыс толэзь ӵоже гинэ ужрадъёсазы но занятиосазы 10 сюрслэсь трос адямиос ветлӥзы

Ужъёс туэ но азьланьтӥсько. 2021-тӥ арын «Гурт интывылъёсты котыр ласянь азинтон» кун программалэн «Гурт интывылъёслэн туала туссы» ӧрезъя лэсьтӥськись тужгес бадӟымез ӵектос Ува ёросысь Нылга черкогуртын пуктӥськись шутэтскон центр луыны быгатоз. Сое вуттыны оглом 150 миллион манетлэсь трос коньдон кутозы. Кизнер каргуртын школаез выльдон ужъёс мыно, солы коньдэтысь 150 миллион манет висъязы. Нош Можга ёросысь Пичи Сюга гуртын чагыр эстӥськон сӧзнэтэз паськытатон ужъёсты йылпумъязы.

Озьы ик туэ Глаз но Сарапул ёросъёсын выль микрорайонъёс пуктонъя кык ӵектосъёсты йылаз-пумаз вуттӥзы. Со сяна, Сарапул ёросын куинетӥзэ со выллем ӵектосэз улонэ пыӵато на. Ужъёс оглом 46,1 миллион манет тыр усёзы шуыса чаклало.

2021-тӥ арын элькунын нырысьсэ мерлыко найм улсын гуртъёсын коркаос пуктозы. Соосты гурт возёс удысын ужасьёслы висъялозы. Оглом 15 коркаос вуттозы. Пусъём, туэ улон интыоссэс гуртъёсын улӥсь 19 семьяос умоятӥзы ини. Соослы Удмуртиысь гурт возёсъя министерство улон интылы сертификатъёс сётъяз.

Бадӟым уж нуиське кун программалэн гурт интывылъёсты умоятон ӧрезъя но. Туэ гудырикошконэ Удмуртия федерал центрысь ватсаса 465,4 миллион манет басьтӥз. Со 90 ӵектосъёсты улонэ пыӵатыны луонлык сётоз.

Пусъём, 2021-тӥ арын Удмуртия кун

Читать полностью

Удмуртиын 77 процентсэ картофкаез утялтӥзы ни. Оглом 4 сюрс гектар бусыосты бушатӥзы. Со сярысь элькунсь гурт возёсъя но сиён-юонъя министерстволэн пресс-службаез ивортӥз.

4-тӥ коньывуонлы картофка утялтонзэс йылпумъязы ни Вотка, Грак, Кизнер, Кияса, Сюмси, Юкаменск ёросъёсын.

Та дырлы возёсъёс 57 сюрс 800 тонна картофка люказы. Кылем арын та вакытлы ик 3 сюрс 700 гектар вылысь 67 сюрс 500 тонна басьтӥзы вал. Таяз арын «кыкетӥ нянь» 290 гектар вылын быриз.

Элькунысь бусыосын мукет ужъёс но азьланьтӥсько на. Инбам улын будэтэм бакча сиёнъёс 43 процентэз утялтэмын, етӥн 86 процентэз сэстэмын.

Тодэ вайытом, та нуналъёсы Удмуртиысь агпропром огъетэз «Зарни сӥзьыл» огъяросси адӟытонын возьматозы.

Удмуртиысь агропром огъетэз «Зарни сӥзьыл – 2021» («Золотая осень – 2021») 23-тӥ огъяросси агровыставкаын возьматозы. Ужрад 5-8 коньывуонэ Москва улосвылын ортчоз. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Пыриськисьёслы но куноослы элькунлэн гурт возёсысьтыз валтӥсь ӧръёсты возьматозы. Одӥгез кужмоез соос пӧлын – тыметын чорыг будэтон. Озьы ик Удмуртия пудо вордон удысэныз данъяськыны быгатэ. Йӧл кысконъя элькунмы Россиысь вить устоосыз улосвылъёс пӧлы шеде. Таяз радэ геномной селекция сярысь вераын малпало, та ӵектосэз 2020-тӥ арын быдэсъяны кутскизы. Озьы ик экофермаын поттэм сыръёсын тодматозы, фермеръёслэн азинсконъёссы сярысь вералозы.

Палэнэ уз кыльы гурт туризм но. 2022-тӥ арысен федерал министерство покчи гурт возёсъёслы «Агротуризм» грантъёс сётъяны чакла. Удмуртия выль программа борды итӥськыны дась. Озьы ик элькун Гурт интывылъёсты котыр ласянь азинтонъя кун программае мыло-кыдо пыриське. Кылсярысь, со улсын 2020-тӥ арын Шарканын лулчеберетъя усьтӥзы.

Огъяросси адӟытон улсын котыре ӝӧк сьӧрын кенешонъёс, мастер-классъёс чакламын. Тӧрлык ёзэсъёслэн ыстэм муртъёссы, ужбергатӥсьёс, экспертъёс но ӧнерчиос агропром огъетэз азинтонъя валтӥсь ужпумъёсты эскерозы

«Зарни сӥзьыл» гурт возёс удысын ужасьёслэн ӧнер нуналзылы сӥзем бадӟым концертэн йылпумъяськоз, со коньывуонлэн кыкетӥ арнянуналаз пусйиське – туэ 10-тӥ коньывуонэ.

Тодэ вайытом, Удмуртиысь семья фермаос но гурт возёс кооперативъёс оглом 145 миллион манетлэсь трос грантъёс басьтозы

Удмуртиын толйись юосты кизён ужъёсты йылпумъязы. Соос оглом 71,2 сюрс гектар музъемез басьтӥзы (чакламын вал 59,3 сюрс гектар). Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Ӟегез 55,9 сюрс гектаре кизизы, чабеез – 14,9 сюрс гектаре, рапсэз – 2,9 сюрс гектаре, тритикалеез – 350 гектаре

Кын улэ тужгес трос Сарапул ёросын кизизы – 8,2 сюрс гектаре. Кыкетӥ интыын Можга ёрос – 5,9 сюрс гектар, куинетӥ – Вавож ёрос 5,1 сюрс гектарен. Со вакытэ ик тужгес трос минерал ватсэтъёс бусыосазы вавожъёс поттӥзы – гектаре 15,3 килограмм пазьгизы. Нош кизем кидыссылэн ӟечлыкезъя азьветлӥсьёс пӧлын Алнаш, Пичи Пурга, Каракулино, Красногорск но Сарапул ёросъёс. Таослэн вань кизем кидыссы ГОСТ-лы тупа. Элькунъя та лыдпус 86 процент луиз.

2020-тӥ арын сӥзьыл кизён ужъёсты 91 процентлы быдэстӥзы вал – 59,4 сюрс гектар интые 54,2 сюрс гектарез кизизы

Тодэ вайытом, Ижкарысь Шор площадьын гурт возёс удысын ужасьёслэн туспуктэмъёсынызы кыкетӥез адӟытон ужа.


Удмуртиысь семья фермаос но гурт возёс кооперативъёс оглом 145 миллион манетлэсь трос грантъёс басьтозы. Тужгес бадӟымез грант 20 миллион манет луоз. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Юрттэтлы луыса элькунысь вить ёросъёсын куать выль семья фермаос кылдозы. Со понна быдэн 15 миллион манет висъялозы. Фермаос йӧл но сӥль поттон бордын тыршозы.

Озьы, грантъёс басьтозы:

  • Лидия Поздеевалэн фермер (крестьян) возёсэз, Пичи Пурга ёрос;
  • Владимир Сергеевлэн фермер (крестьян) возёсэз, Алнаш ёрос;
  • Алёна Сафиуллиналэн фермер (крестьян) возёсэз, Сарапул ёрос;
  • Алексей Матеровлэн фермер (крестьян) возёсэз, Вавож ёрос;
  • Павел Киселёвлэн фермер (крестьян) возёсэз, Шаркан ёрос;
  • Пичи Пурга ёросысь фермер возёс.

Озьы ик ас ужзэс азинтыны луонлык гурт возёс кооперативъёс но басьтӥзы. Соослы туэ оглом 56,1 миллион манет висъязы (кылем арын 25,9 миллион манет вал).

Соос пӧлын:

  • «Нива», Вавож ёрос;
  • «Мустанг», Алнаш ёрос;
  • «Агро», Алнаш ёрос;
  • Воткаысь 3 номеро райпо.

Тодэ вайытом, Удмуртиын «Школа фермера» дышетон ӵектослэн кыкетӥ потоказ пыриськыны куриськонъёсты кутон азьланьтӥське



Наверх
Вниз