Ижкар+1 °C
21 -тӥ коньывуон 2021 Покчиарня
18+

10 сюрс кызъёс мерттозы Можга ёросын 17-тӥ коньывуонэ

  • 183
  • 0
Можга / Удмуртия
10 сюрс кызъёс мерттозы Можга ёросын 17-тӥ коньывуонэ
Туспуктэм: ЭКА движенилэн Удмуртиысь «Мертты нюлэс» программаезлэн пресс-службаез

17-тӥ коньывуонэ Можга ёросын «Мертты нюлэс» («Посади лес») огъяросси ӵектослэн сӥзьыл акциез улсын 10 сюрс кызъёс мерттозы. Ужрадэ пыриськыны вань мылкыд карисьёсты ӧтё. Со сярысь радъясьёсыз ивортӥзы.

Волонтёръёсын мерттӥськон – со тылпуослэсь, нымы-кибыослэсь но мукет шугадӟонъёслэсь курадӟем нюлэсъёслы выльысь ӝутскыны юрттон гинэ ӧвӧл. Сыӵе ӵектосъёс карын улӥсьёслы нюлэс экосистемаослэсь ненег луэмзэс, соосты утялтон но утён амалъёсты возьматон понна кулэ
Елена Горохова, «Мертты нюлэс» ӵектослэн кивалтӥсез

Мерттӥськон инты дорозь калыкез Ижкарысь автобусъёсын нуозы. Озьы ик ас машинаосын но мыныны луэ. Ужрадэ пыриськон понна одно ик 8-909-053-79-91 номеръя жингыртыса яке чӧлсконпусъя гожтыса регистрациез ортчоно.

Радъясьёс пусъё, нюлэс мерттыны мылкыд карисьёслы нимаз дасяськон, тодон-валанъёс но быгатонъёс кулэ ӧвӧл, ужрад кутскон азьын соос асьсэос мастер-класс ортчытозы. Писпуосты лесничествоосын дасям интыосы мерттозы, бӧрысь соос ик мерттосъёсты утялтозы.

Мерттӥськисьёслы куазез чакласа дӥсяськыны, сьӧразы резинка сапегъёс, перчаткиос, кружка, тусьты-пуньы кутыны ӵекто. Ужам бере ваньзэсты вегетариан пӧсь сиёнэн сюдозы. Со сяна, сьӧрын одно ик эм маска луыны кулэ. 

Пусъём, «Мертты нюлэс» ӵектос - ЭКА движенилэн нюлэсъёсты улӟытон понна коньдон люканъя краудфандинговой платформаез. Со 2015-тӥ арысен ужа. Вить ар ӵоже ӵектос улсын Россиысь 27 улосвылъёсын 960 сюрслэсь трос писпуос мерттӥзы ини. Удмуртиын гинэ – 100 сюрслэсь трос пужымъёс, кызъёс, кедръёс но тыпыос. 

Тодэ вайытом, куарусёнэ ӵектос улсын Якшур-Бӧдья ёросын 10 сюрс пужымъёс мерттӥзы. 



Наверх
Вниз