Ижкар+20 °C
24 гудырикошкон 2019 Кӧснунал
16+

Удмурт Гидрометцентрлэн кивалтӥсез: тулыс ву тудӟон элькунын южтолэзь пумын кутскоз

  • 306
  • 0
Ижкар / Удмуртия
Удмурт Гидрометцентрлэн кивалтӥсез: тулыс ву тудӟон элькунын южтолэзь пумын кутскоз
Туспуктэм: Алексей Арзамасцев

Гидрометеорологияя но инкуазез чакланъя Верхне-Волжской управленилэн чакланъёсызъя, туэ Удмуртиын тулыс тудву южтолэзь пумын кутскоз. Кызьы со ортчоз, вераны вазь на, шуиз ивортодэтъя «Удмуртия» агентстволы Удмурт Гидрометцентрлэн кивалтӥсез Алексей Бердников. Солэн кылъёсызъя, тудвулэсь сямзэ кӧня ке тодметъёсъя чакланы луэ.

Нырысь ик, со лымы шобретлэн ӝуждалаез, со вулэсь кӧня луэмзэ возьматэ. Зор-кот, лымы усён азьын вулэн музъеме пыӵамез, солэн (музъемлэн – ред.) мускытэз но кынмемезлэн мурдалаез. Тужгес валтӥсез фактор – куазь. Шуак шуныт луиз ке, ваньмыз шунаны кутскоз
Алексей Бердников, Удмурт Гидрометцентрлэн кивалтӥсез

Со пусйиз, тулыспалэ но южтолэзе лымы но зор усёзы на шуыса чаклало. Со лымылэсь мускытсэ будэтоз.

Кылем арын 200 процентлэсь ятыргес вал, но ваньмыз огсямен ортчиз, малы ке шуоно мукет тодметъёс эсэпъёслы тупамон вал. Нош туннэ милям 100 процент котырын, кӧня ке тросгес, запас вань на
Алексей Бердников, Удмурт Гидрометцентрлэн кивалтӥсез

Алексей Бредниковлэн верамезъя, нырысь-вылысь чакланъёсъя, тулыспалэ температура та дырлы тупась эсэпъёсъя возиськоз (-11…-13 градус), зор-котъёс шоро-куспо лыдпуслэсь ӧжытгес луозы.

Пусъём, Удмуртиын тудвулы дасяськон улсын тыметъёсысь вуэз лэзьыны кутскизы.

Тодэ вайытом, 2018-тӥ арын оштолэзе тудву азьын Удмуртиын вылӥ дасьлыко югдур юнматӥзы. Ву ӝутскемен валче Кизнерын но Можгаын шуэрес югдур ялӥзы. Эграын 67 юртъер котыр ву улэ шедиз. Озьы ик Ижкарысь 30 коркаослэн кузёоссы азбаразы ву пыриз шуыса ӝожтӥськизы.

Наши партнеры

Наверх
Вниз