100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Таиз тол Ижкарын куазез эскерыны кутскем дырысен тужгес шунытэз луиз

  • 801
  • 0
Ижкар / Удмуртия
Таиз тол Ижкарын куазез эскерыны кутскем дырысен тужгес шунытэз луиз
Туспуктэм: Руслан Нуриахметов

Куазез эскерыны кутскем дырысен таиз тол, толсурысен тулыспалозь, Ижкарын тужгес шунытэз луиз. Со сярысь улосвыл Гидрометцентрысь куазез но инкуазез эскеронъя ёзэтлэн азьвыл кивалтӥсез Алла Шумихина.

Кылем арын салкым но зоро гужем бере шуныт сӥзьыл но вакытэзлы тупасьтэм шуныт тол вуизы. 2019/2020 аръёсы Ижкарын тол тужгес шунытэз луиз. Шоро-куспо температура -5,5 градус вал, эсэпез (1981-2010 аръёсы) -11,6 градус
Алла Шумихина, Удмурт Гидрометцентрысь куазез но инкуазез эскеронъя ёзэтлэн азьвыл кивалтӥсез

Шуныт луэмезъя кыкетӥ интыын 2015-2016 аръёсысь тол: шорлыдын -7,4 градусэн, куинетӥ интыын 1982-1983 аръёсысь тол

Алла Шумихиналэн верамезъя, куинь тол толэзьёс ӵоже Ижкарын ньыль нунал гинэ температура -20 градуслэсь улӥын вал: одӥг нунал толсуре, кык нунал толшоре но одӥг нунал тулыспалэ. 30 градуслэсь кезьыт нуналъёс чик ӧй вал: 29-тӥ толшоре -24,1 градус пусйизы.

Таяз толалтэ куазь 27 нунал шуныт улӥз (нуназе ноль градуслэсь вылӥын), ӵемысьгес тол ӵоже сизьым сыӵе нуналъёс луыло. Кема шуныт возиськон толйись юос вылын уродэн шӧдӥськыны быгато, но мынам со сярысь ивортонэ ӧвӧл
Алла Шумихина, Удмурт Гидрометцентрысь куазез но инкуазез эскеронъя ёзэтлэн азьвыл кивалтӥсез

Тол мускыт вал, лымы 138 миллиметр усиз (эсэпъёсъя 81 миллиметр). Ӵемысь кот лымы учкиз, зорен суро лымыяз, кыдыртӥз. Соин валче лымы шобретлэн зӧкталаез сокем ӧз буды. Электроезъёс борды кот лымы няняськемен, энергетикъёслэн но мукет ӧнерчиослэн ужазы шугъяськонъёс кылдылӥзы. Озьы ик сюрес вылын югдур секыт вал. 




Наверх
Вниз