100 лет государственности Удмуртии
Ижкар+19 °C
31 -тӥ куартолэзь 2020 Воскресенье
16+

Тулыс ву кошкон Удмуртиын оштолэзьлэн нырысетӥ декадаяз кутскоз

  • 112
  • 0
Ижкар / Удмуртия
Тулыс ву кошкон Удмуртиын оштолэзьлэн нырысетӥ декадаяз кутскоз
Туспуктэм: Алексей Арзамасцев

Туэ Удмуртиын тулыс ву кошкон оштолэзьлэн нырысетӥ декадаяз - кыкетӥез кутсконын ӧдъялоз. Вулэсь тужгес зол ӝутскемзэ 20-29 оштолэзе возьмало. 16-тӥ южтолэзе улосвыл тӧро дорын ортчем аппарат кенешонын элькун кивалтэтлэн тӧроез Ярослав Семёнов ву тудӟонлы дасяськон ужъёс сярысь вераз.

Ву тудӟонэз чаклан вылысь омырысь температураез, музъемлэсь кынмемзэ, лымылэсь ӝуждалазэ, лымыысь мускытэз но толэзь ӵоже усем лымыез эскеро.

Гидрометцентрлэн нырысь-валысь чакланъёсызъя южтолэзе шоро-куспо температура трос аръем шоро-куспо лыдпусъёслэсь 2 градуслы вылӥынгес луоз (Эсэпез -4,-6 градус). Музъем пӧртэм интыосын одӥг кадь кынмемын ӧвӧл: 15 сантиметрысен Воткаын но Эграын (эсэплэн 20 процентэз), 63 сантиметрозь Ижкарын (эсэплэн 64 процентэз), нош элькунъя шоро-куспо лыдпус – 31 сантиметр (эсэплэн 37 процентэз).

Лымылэн ӝуждалаез шорлыдын 50 сантиметр, со азьвыл аръёсы мындагес ик. Нош лымыын мускытэз эсэсплэсь 20 процентлы тросгес. Со сяна, тулыспалэ лымы трос усиз.

Ваньзэ сое лыдэ басьтыса, туэ тудву трос азьвыл аръёсы кадь луоз, но одно ик омырлэсь температуразэ чакланы кулэ, вераз Ярослав Семёнов.

Со шуак ӝутскиз ке, югдур, кызьы шуо, азьвыл гожтэмъя кадь уз мыны. Та дыре асьмелэн югдур лякыт. Тужгес лек вакытаз тудву, азьвыл аръёсын ӵошатыса, 20-70 сантиметрлы улӥынгес луоз шуыса чакласькомы
Ярослав Семёнов, Удмуртиысь кивалтэтлэн тӧроез

Озьы ик со Удмуртиысь пичи шуръёслэсь усьтӥськемзэс 1-тӥысен 15-тӥ оштолэзёзь возьмало шуыса ивортӥз. Тужгес урод югдурын ву улэ 33,15 квадрат километр быдӟа интыос ву улэ шедьыны быгатозы.

Ву ӝутскемен сэрен инфраструктуралэсь палэнэ кыльыны быгатӥсь улон интыос элькунын ӧвӧл
Ярослав Семёнов, Удмуртиысь кивалтэтлэн тӧроез

Тудву сэрен ыштонъёсты кулэстон вылысь Удмуртиын нимысьтыз ужанрадлык кылдытӥзы. Соя элькунысь Иж, Вотка, Камбарка но Пудэм тыметъёсысь вуэз нуналаз 1-3 сантиметрлы лэзё, со уж 25-тӥ южтолэзёзь мыноз. Кивалтон ёзъёслэсь, кужымъёслэсь вутудӟонлы дасьлыксэс эскерон вылысь 19-20 южтолэзе дышетонъёс ортчытозы.

Со сяна, ӵыпетъёсты тупатъян, возён понна кылем арын 14 миллион манет быдтӥзы, соосты рос-прос выльдыны но проектно-сметной ужкагазъёсты дасяны 31 миллион манет висъязы.

Таиз арлы но вуоноосызлы 53 миллион манет чакламын ни.

Улосвыл кивалтэтлэн тӧроез верамъя, та дыре элькунын 216 ӵыпетъёс (гидротехнической сооружениос) лыдъясько, 43-ез соос пӧлысь кышкытлык вайыны быгато, 80-эз тупатъямез кулэ каро, тямысэзлэн кузёоссы ӧвӧл.

Асьмеос ваньмы валаськомы, секыт югдурын ыштонъёсты кулэстон понна ужрадъёсты вакчи дыр куспын быдэстыны кулэ. Валтӥсез – калыкез но пӧйшуръёсты, озьы ик ваньбурез кышкыттэм интые поттон. Та дырлы эвакуаци маршрутъёс чакламын ни, транспорт но калыкез интыяны интыос дасямын, 8 сюрс 265 адямилы чаклам огдырлы интыяськон 27 пунктъёс дась
Ярослав Семёнов, Удмуртиысь кивалтэтлэн тӧроез

Озьы ик калыклы ивор вуттон сӧзнэт кылдытэмын.

Азьвыл аръёсты чакласа но али быдэстӥськись ужез лыдэ басьтыса, асьмеос тудвулы дась шуыса оскисько, озьы ке но, гань-гань кариськыны уг яра. Куд-ог юанъёс вань на
Александр Бречалов, Удмуртилэн тӧроез

Со Ярослав Семёновез тудву кошконэз герӟаськем ужпумъёсты но ужрадъёсты нуналлы быдэ чакласа возьыны куриз.  



Наверх
Вниз