Ува ёросысь Бызара (Узей-Тукля) гуртысь Киужъёсъя юртлэн кивалтӥсезлэсь Геннадий Сидоровлэсь «Возрождённые ремёсла рода Тукля» книгазэ поттӥз «Удмуртия» издательство. Кызьы вераз кибашлы ивортодэтъя «Удмуртия» агентстволы, книгаез дасян бордын ар пала ужазы. Со Юртлэн ужамезлы аспӧртэм памятник, нош кибашлыоссылы Выль ар азьын усто кузьым.
Туж шумпотко, таӵе чебер книга Дом ремёсел ас кужмыныз быгатӥз поттыны шуыса. Ми понна бадӟым вормон со! Со быдэс бадӟым реклама, мон малпасько: яке интернет пыр учкиськод, яке улэп книгаез. <…> Бадӟым тау карон кылъёс мынам верам потэ издательстволы – быдэс ар ужаммылэн емышез туж ческыт, чебер пӧрмиз. Мон лӧптэмын!
Тукля воршудлэн киужъёсызлы сӥзем книга потӥз Удмуртиын
Тукля воршудлэн киужъёсыз мукетъёсызлэсь чылкак пӧртэм шуыса вераны уг луы, пусъе Геннадий Сидоров. Но ачиз со выжыысь потэмын бере, книгалы но ас воршудэзлэсь нимзэ сётэмез потӥз. Книга вӧлмиз ке, мукет воршудъёс но адӟем карозы, оло.
70 воршуд бере Удмуртиын, котькуд воршуд аслэсьтыз сайкатысал ке историзэ, герӟасал ке та улонэн, ас выжыеныз, исторической выжыеныз, пӧртэм книгаос но сям-йылолъёс кылдысалзы ке, Удмуртиямы асьмелэн туж, мон малпасько, лулчеберетъя пушйысал, адӟем карымон луысал быдэс Россиялы, быдэс дуннелы
25 ар талэсь азьло куиськон бордысен кутскыса, туннэ Бызараысь Киужъёсъя юрт 13 ӧръёсты азьланьтэ. Со пӧлын пуэз вӧлон, кызьпу туен ужан, гобелен, буёлъёсын суредан, дӥськут вурон но мукетыз.
Горд сюен али ӧжытгес ужаны кутским, малы ке шуоно начаргес горд сюй – обжиг бӧрсьы пилиське то мар, но, мон малпасько, сое ми одно азьланьтом. Гырккес пуклёослэсь лэсъяськом пӧртэм выӵкыос, шалькыос, йӧл шукконъёс но мар. Токарной, столярной ремеслоосмы вань. Ваньмыз 12-13 люкаське, туэ тани 13-зэ усьтӥм – со войлокен, гынэн, ужан. Пӧртэм шляпаос, али Выль арлы пӧртэм сувениръёс лэсьяськом
Со сяна, кибашлыос пиналъёсты но мӧйыосты киужъёслы дышето. Ува ёросын пересьёслэн куиськемъёсынызы огазеям адӟытон но радъяллязы ни.
Тодэ вайытом, 2020-тӥ ар кутсконын «Удмуртия» издательство удмуртъёслэн киужъёссы но кибашлыос сярысь книга поттӥз.