Ижкар-1 °C
26 -тӥ толшор 2021 Пуксён
18+

Квест, видеофлешмоб, пельнянь кутӥсьёслэн нюръяськонзы ортчозы пельнянь фестиваль улсын Удмуртиын

  • 85
  • 0
Ижкар / Удмуртия
Квест, видеофлешмоб, пельнянь кутӥсьёслэн нюръяськонзы ортчозы пельнянь фестиваль улсын Удмуртиын
Туспуктэм: Руслан Нуриахметов

2021-тӥ арын «Пельняньлэн дунневыл нуналэз» фестиваль улсын Удмуртиын квест, видеофлешмоб, туспуктэмъёсъя вожвылъяськон, пельнянь кутӥсьёслэн нюръяськонзы ортчозы. Со сярысь фестивалез радъясьёс ивортӥзы.

Фестиваль 8-13 тулыспалэ ортчоз. Но «Ческыт сюрес» квестэ (0+) толэзь азьвыл ик пыриськыны луоз ни. 3-31 толшоре радъясьёс «ДаУР» ӵектослэн интыостӥз ортчыны ӵекто, соос пӧлын «Лудорвай» музей, «Живица», «Бобровая долина» этнокомплексъёс но мукет пусйымон интыос. Котькудаз квестлэн табличкаеныз туспуктэм лэсьтоно но отчы ветлэмды сярысь мерлыко вотэсъёсы гожтоно, #Ческытсюрес #Вкусныйпуть #пельменьфест хештегъёс пуктоно. Озьы ик интыосын удмурт сиён-юонъёсты веръяны быгатоды.

«Блюдо моей семьи» видеофлешмобез (6+) радъясьёс али ик кутскыны ӵекто ни. Отчы пыриськон понна мерлыко вотэсъёсы пельнянь кутэмдэс возьматӥсь видеороликъёсты #блюдомоейсемьи, #пельменьфест, #ВсемирныйДеньПельменя хештегъёсын поттыны кулэ. Клипын семьяяды утиськись аспӧртэм рецепт мед луоз.

Нош собере «Удмуртия в моей тарелке» фотоконкурсэ (6+) но пыриськыны луоз. Пӧрам пельняньдэс #УдмуртияВмоейТарелке, #Пельменьфест, #МиннацУР, #домдружбынародовУР хешетегъёсын мерлыко вотэсъёсы поттэ. Радъясьёс ассэ сиёнэз, вылтуссэ, аспӧртэмлыксэ дунъялозы.

Озьы ик фестиваль улсын устоосыз пельнянь кутӥсьёс ӧнер устолыкъя вожвылъяськонын (18+) быгатонлыкъёссэс возьматозы.

Ресторанъёсын но кафеосын удмурт кухняен тодматозы (0+). Азьвыл аръёсы пельнянь кутонъя мастер-классъёс радъяло ке вал, туэ пӧртэм сиёнъёсты возьматозы

«Пельняньлэн дунневыл нуналэз» фестивальлэн йылпумъясь но валтӥсь ужрадэз 13-тӥ тулыспалэ Ижкарысь Киров нимо паркын ортчоз. Куноосты фолк-фестиваль, анимаци площадкаос но фотозонаос, Удмуртиысь сиён-юонлы сӥзем ужрадъёсын тодматон, пельнянь СЪЕСТ, маскара пельнянь бызьылон, пельнянен вузкарон но быдэс арлы тырмымон пельнянь понна шудон (розыгрыш) возьма.

Тодэ вайытом, 2020-тӥ арын «Пельняньлэн дунневыл нуналэз» фестиваль «Ческыт выжыкыл» ним улсын радъяськиз. 31-тӥ толшорысен 8-тӥ тулыспалозь быдэс Удмуртиын 160-лэсь трос ужрадъёс ортчизы, отчы 30 сюрс адями пыриськиз.



Наверх
Вниз