2020-тӥ арын Удмуртиын туристъёслэн лыдзыя азьпал радэ Дэри ёрос потӥз. Со сярысь журналистъёслы элькунысь экономикая министерствоысь туризмез азинтонъя но туризм ужъя управленилэн кивалтӥсез Юлия Железняк вераз.
Кылем арын Дэри ёросэ 76 сюрслэсь трос адями вуылӥз. Ӵапак отын туризмъя тужгес трос объектъёс интыяськемын. Кылсярысь, «Лудорвай» музей-заповедник, хаски пуныослэн гуртсы, пужей вордон ферма, агротуризмъя объектъёс но нылпиосын шутэтскон понна интыос. Юлия Железняк верамъя, сыӵе азинсконлы «ДаУР!» квест но юрттӥз.
Туристъёслэн лыдзыя кыкетӥ инты басьтӥз Вотка кар – 66 сюрс 710 адями. Собере мыно Шаркан ёрос – 25 сюрс 120 адями, Сарапул ёрос – 18 сюрс 950 адями, Глаз ёрос – 18 сюрс 780 адями.
Юлия Железняк пусйиз, вылӥ верам муниципал кылдытэтъёс выль луонлыкъёс шедьтӥзы, выль турмаршрутъёс кылдытӥзы, аспӧртэм ӵектонъёс дасязы но, вань шугъяськонъёс шоры учкытэк, тросгес куноосты пумитаны быгатӥзы.