Ижкар-1 °C
26 -тӥ толшор 2021 Пуксён
18+

Удмуртиысь киужъёсъя 22 юртъёсын ужасьёс ӧнеръя акселераторын дышетскизы

  • 65
  • 0
Ижкар / Удмуртия
Удмуртиысь киужъёсъя 22 юртъёсын ужасьёс ӧнеръя акселераторын дышетскизы
Туспуктэм: Николай Кузнецов

Удмуртиысь киужъёсъя 22 юртъёслэн ыстэм муртъёссы ӧнеръя акселераторын дышетсконзэс йылпумъязы. Кык толэзь ӵоже соос ужъёссэ онлайн-вузкаронниос пыр вӧлмытонъя тодон-валанъёс люказы. Со сярысь элькун тӧролэн но кивалтэтлэн пресс-службазы ивортӥз.

Акселераторлэн ужъемышъёсыз дышетскон дыръя ик адӟиськизы. Кылсярысь, киужъёсъя юртъёслэн вузкаронзы паськытаз. Табере Удмуртиысь кибашлыослэсь ужъёссэс Санкт-Петербургын, Якутскын, Томскын басьтыны луэ. Со сяна, выль ӵектосъёс кутскемын – интернет-вузкаронни, маркетплейсъёс (Ebay, Aliexpress, Udm.market), «Нечкино» курортэн синпельёъсъя валче ужан. Матысь дыре Глазкарысь киужъёсъя ёзэтын лэсьтэм гамакъёсты но дӥськутлы вылшобретъёсты (чехол) «Леруа Мерлен» вузкаронниысь басьтыны луоз.

Йылпумъясь ужрадын дышетсконэ пыриськисьёс огазеяськонзэс воштӥськонъёсты но выль ужпумъёсты лыдэ басьтыса азинтонъя стратегиоссэс утизы. Нырысетӥ инты Сарапул ёросысь туризмъя но киужъёсъя «Высокий берег» центр басьтӥз, кыкетӥ инты – Глазкарысь шаертодонъя музейлэн чеберлыко киужъёсъя ёзэтэз, куинетӥ инты – Сьӧлтаысь киужъёсъя юрт

2021-тӥ арын Удмуртиысь киужъёсъя юртъёслэсь табышсэс 2-3 поллы йылэтыны чаклало. Ужпумез быдэстыны элькунысь Туризмъя но киужъёсъя йӧскалык центрлэн элькунысь ёросъёсы кибашлыос доры турмаршрутъёсты кылдытонэн но вузанэн герӟаськем ужез юрттоз. Озьы ик мукет улосвылъёсысь но кунгож сьӧрысь кунъёслэн (Прибалтикаысь, Финляндиысь, Венгриысь) рынокъёсы потыны малпало. Со сяна, вуоно арысен киужъёсъя юртъёс коммерци луисьтэм автономной огазеяськон луозы, со грантъёсъя вожвылъяськонъёсы пыриськыны но киуж туризмез азинтыны ватсаса коньдон кыскыны луонлык сётоз.

Туннэ туризм удысын туж бадӟым вожвылъяськон, со выль ӧръёсты, выль кулэяськисьёсты утчаны куре. Киужъёс лэсьтон искусство Удмуртиын туж пӧртэмлыко, солэн туризмъя ӵектонъёс пӧлы пырыны, озьы ик интывыллэсь брендзэ азинтыны но солэсь вожвылъяськыны быгатонлыксэ будэтыны вань луонлыкъёсыз вань
Юлия Железняк, Удмуртиысь экономикая министерстволэн туризмез азинтонъя управлениезлэн кивалтӥсез

Тодэ вайытом, 2020-тӥ арын Удмуртиын туристъёслэн лыдзыя азьпал радэ Дэри ёрос потӥз.



Наверх
Вниз