1-тӥ тулыспалэ Ижкарысь «Навеки с Россией» монумент дорын ньылетӥзэ «Удмурт йӧ» («Удмуртский лёд») фестиваль ужзэ мытоз. Отчы пыриськон понна 40-лэсь трос куриськонъёс вуизы ини. Со сярысь элькун тӧролэн но кивалтэтлэн пресс-службазы ивортӥз.
Туэ йӧлэсь скульптураосты «Ворота в будущее» тема улсын лэсьтозы. Радъясьёс кибашлыослэсь ужзэс нокызьы ӧз сюбегатэ, соин ик эскерисьёслы аспӧртэм но мур пуштросъем эскизъёс вуизы.
1-тӥ тулыспалэ кибашлыос йӧлэсь скульптураос лэсьтыны кутскозы, нош 7-тӥ тулыспалэ йӧ адӟытонэз учкисьёслы усьтозы, соку ик усточиосты но пусъёзы.
Ижкарын пӧртэм капкаосын адӟытон радъяны малпанэн суредась Энвиль Касимов потӥз вал. Солэсь малпанзэ азинтыса но сое буре вайыса (Энвиль Касимов 2020-тӥ арын пӧсьтолэзе улонысь кошкиз), радъясьёс сое йӧлэсь лэсьтыны кариськизы.
Пусъём, Удмуртиын «Удмурт йӧ» фестиваль нырысьсэ 2018-тӥ арын Иж тыметлэн ярдураз ортчиз вал. Нош 2020-тӥ арын фестивалез Удмуртилэн кунлыкезлы 100 ар тырмонлы сӥзизы но скульптураосты «Навеки с Россией» монумент вӧзын лэсьтӥзы.
Тодэ вайытом, та дыре Ижкарын кылчинъёслы но архангелъёслы сӥзем йӧ скульптураосты адӟыны луэ.