Ижкар-18 °C
26 -тӥ тулыспал 2021 Удмуртарня
18+

Тракторен биатлон ортчоз Удмуртиын 6-тӥ южтолэзе

  • 1336
  • 0
Вотка / Удмуртия
Тракторен биатлон ортчоз Удмуртиын 6-тӥ южтолэзе
Туспуктэм: Руслан Нуриахметов

6-тӥ южтолэзе Удмуртиысь Вотка ёросысь туризмъя «Камские дали» огъетын «Тракторен биатлон» усьтэм калыккуспо шудонъёс ортчозы. Туэ ӵошатсконъёс паськытгес но тунсыкогес луыны , со сяна, пыриськисьёсты выльдӥськонъёс возьмало. Со сярысь элькунысь гурт возёсъя но сиён-юонъя министерстволэн пресс-службаез ивортӥз.

Та дыре гурт возёс техника понна могӟетъёсын выль трасса лэсьто, со кузьгес но тунсыкогес луоз

Ӵошатскисьёс, азьло аръёсы сямен ик, МТЗ-82 тракторъёсын вожвылъяськозы. Жюрилэн ёзчиосыз руль бергатыны быгатонлыксэс, могӟетъёсты ортчон ӝоглыксэс, сылыса но выдыса ыбылӥськыны быгатэмзэс но мукетсэ лыдэ басьтоз.

Та дыре ӵошатсконъёсы пыриськыны мылкыд каремзэс Татарстанысь, Пермь шаерысь, Свердловск улосвылысь трактористъёс веразы ини. Соос борды элькунысьтымы ёросъёсысь быдэн кык трактористъёс итӥськозы. Нялтас вераса, вормон понна нюръяськыны нылкышноос но дась.

Озьы ик радъясьёс бускель кунъёсысь но пыриськисьёсты витё. Кылсярысь, кылем арын Белоруссиысь тракторъёс поттӥсь заводысь огазеяськонлэн ыстэм муртъёсыз вуылӥзы. Со сяна, радъясьёс Екатеринбургысь тракторен тодмо ӵошатскисез Александр Малярез туж возьмало.

Со тракторен Крыме вуылӥз, 22 нунал ӵоже 8 сюрс иськемез ортчиз. Но тросгес ты вылысь йӧ вылын тракторен экстрим возьматыса тодмо луиз
Вотка ёрос администрацилэн пресс-службаез

Пусъём, нырысетӥосыз «Тракторен биатлон» ӵошатсконъёс Удмуртиын Вотка ёросысь Бадӟым Кивар гуртын 2018-тӥ арын ортчизы. Сое ортчытыны кичӧлтонэн гуртын улӥсь Павел Кузнецов потӥз. 2019-тӥ арын воргоронлэн малпанэзлы Удмуртиысь гурт возёсъя но сиён-юонъя министерство дурбасьтӥз но, ужрад паськытгес луиз. 2020-тӥ арын Павел Кузнецовез Удмуртилэн тӧроезлэн «Признание» премиеныз пусйизы.

Тодэ вайытом, 2019-тӥ арын ӵошатсконъёсы 30 адями пыриськиз.



Наверх
Вниз