Ижкар+2 °C
28 -тӥ коньывуон 2021 Покчиарня
18+

Виктор Астафьевлэн романэзъя моноспектакль дася Удмуртиысь йӧскалык театрысь артист

  • 1188
  • 0
Ижкар / Удмуртия
Виктор Астафьевлэн романэзъя моноспектакль дася Удмуртиысь йӧскалык театрысь артист
Туспуктэм: Руслан Нуриахметов

Удмуртиысь кун йӧскалык театрысь артист Максим Григорьев ӟуч гожъясьлэн Виктор Астафьевлэн «Прокляты и убиты» романэзлэн нырысетӥ книгаезъя «Чёртова яма» моноспектакль дася. Кызьы вераз со ивортодэтъя «Удмуртия» агентстволэн корреспондентэзлы, та ужаз ачиз ик режиссёр но, сценарист но луиз.  

Виктор Астафьевлэн йылаз-пумаз вуттымтэ «Прокляты и убиты» романэз кык книгаен гожтэмын – «Чёртова яма» но «Плацдарм». Нырысетӥ люкетаз Новосибирск палась Бердск кар вӧзысь запасной 21-тӥ стрелковой полкын 1942-тӥ арын сӥзьыл но 1943-тӥ арын толалтэ кылдэм югдур сярысь вераськон мынэ. Моноспектакль ӵапак соя луоз

Мон нырысь сое лыдӟи, малпатэк гинэ, куке но сое лэсьто, пукто шуыса. Лыдӟи но арня пала малпаськыса ветлӥ, тани тае кызьы ке но пуктыны кулэ шуыса, сое ваньзы мед тодозы шуыса
Максим Григорьев, Удмуртиысь кун йӧскалык театрысь артист

Максим Григорьев пусъе, Виктор Астафьев котькуд солдатлэн аслаз ожез шуыса вера вал. Кинлэн ке капчи, нош кинлэн ке – романын возьматэм кадь: сютэм, кезьыт но лек.

Та роман со… кызьы шуо, «победителей не судят», но ож асьмелэсь умой но, урод но палъёсмес усьтэ. Тани та моноспектакль вералоз, кызьы совето солдатъёсты возизы, кызьы соос дышетскизы, кызьы соос сиськизы. Ми тани кино учкиськом, киноын вань солдатъёс чебересь, тыр кӧтоесь, сӥлё-вироесь, льӧль бамоесь, но атакае ура! кесяськыса мыно, нош сыӵе ведь ӧй вал
Максим Григорьев, Удмуртиысь кун йӧскалык театрысь артист

Артист спектаклез быдэсак огназ возьматоз. Мадёнэз авторлэн нимыныз нуоз.

Моноспектакль жанр Максим Григорьев понна выль ӧвӧл ини. 2018-тӥ арын со аслэсьтыз нырысетӥ ужзэ – «1900-й. Легенда о пианисте» спектакльзэ – возьматӥз.

Артистлэн кылъёсызъя, моноспектаклез шудонлэн аслаз аспӧртэмлыкъёсыз: ог ласянь капчи кадь, нош мукет ласянь секыт.

Тон нокытчы уд ватскы, нокыӵе декорация, кулиса сьӧры уд пегӟы, тон ваньзэ сое огнад возьматыны, вераны кулэ. <…> Мыным потэ, актёр татын котьма ласянь усьтӥське. Огшоры спектакльын ваньзэ возьматыны уг луы. Нош татын актёр кык час ӵоже вань быгатонлыкъёссэ поттэ
Максим Григорьев, Удмуртиысь кун йӧскалык театрысь артист

Со «1900-й. Легенда о пианисте» спектакльзэ пуктон со понна бадӟым эскерон вал шуыса пусъе: пӧрмоз-а, уз-а. Нош «Чёртова яма» эскерон ӧвӧл ини – сюлэм висёнэныз калыкен люкиськон. Соин ик та спектакль учкисьлы шутэтскон, серекъян понна ӧвӧл, со нырысь ик сое малпаськытыны, со вакытэ улонэз мургес валатыны малпамын. Театре лыктӥсьёс но валаны кулэ, кытчы мынэмзэс, мае учкемзэс.

«Чёртова яма» моноспектаклез нырысетӥ возьматонъёс 18-тӥ но 19-тӥ  южтолэзе йӧскалык театрлэн пичи залаз ортчозы. Спектакль ӟуч кылын мыноз.



Наверх
Вниз