Ижкар+1 °C
9 -тӥ толсур 2021 Покчиарня
18+

Финн-угор дуннелэсь лулчеберет шоркарзэ сӥё-дано усьтӥзы Эстониын

  • 4396
  • 0
Таллин / Эстония
Финн-угор дуннелэсь лулчеберет шоркарзэ сӥё-дано усьтӥзы Эстониын
Туспуктэм: flickr.com (Таави Бергманн)

13-тӥ тулыспалэ Эстониысь 1 сюрс пала улӥсен Абья-Палуоя карлы финн-угор дуннелэн лулчеберетъя шоркарезлэсь пуссэ сётӥзы. Со сярысь ивортодэтъя «Удмуртия» агентстволы  ужрадэ пыриськись, Таллинын улӥсь удмурт гожъясь Муш Нади (Надежда Пчеловодова) ивортӥз.

Туэ толсур толэзёзь та пичи кар быдэс финн-угор дуннелы – 25 миллион адямилы – шоркар луоз
Муш Нади, Таллинын улӥсь удмурт гожъясь

Абья XIX даурын Пярну но Вальга бадӟым каръёсты огазеясь чугун сюрес вылысь Палуоя трактир-сиськон инты дорысь склад инты вылэм. Татын сӥзьыллы быдэ бадӟым пудо базар радъяськем. 1890-тӥ аръёсы вузкарисьёслэн но киуж ужасьёслэн гуртсы кылдэм. 1914-тӥ арын Абьяын Эстониын одӥг гинэ луись етӥн фабрика ужаны кутскиз. 1993-тӥ арын Абья-Палуоя город луиз. 

Абья-Палуоя Мульги музъемлэн шоркарез луэ. Мульги музъем туала Эстонилэн Вильянди но Вальга ёросъёсаз интыяськемын. Со кунысь лулчеберетъя но историяя улосвыл луэ, татчы вить вашкала кихельконд (яке приход) музъемъёс пыро: Турвасту, Пайсту, Халлистэ, Каркси, Хельме гуртъёс котырысь музъемъёс. Мульгимаа шуыса нимаськись музъемез XIX даурозь мульги кылъя тодманы луэ вылэм.

Мульги калык дӥсь удмурт адямилы туж мусо адӟиське, удмурт куншет буёлъёслы луыса, вылды. Мульги историез эскерон, кылэз но лулчеберетэз утён но азинтон понна кылдытэмын «Мульги лулчеберет институт» огазеяськон. Мульги музъемлэн порталэз вань. Со ужа эстон, мульги, англи но латви кылъёсын
Муш Нади, Таллинын улӥсь удмурт гожъясь

Быдэс ар ӵоже Мульги музъем вылын пӧртэм ужрадъёс ортчозы. Соос пӧлын нылпи фольклор фестиваль, киужъёсъя толэзь, туризмлы сӥзем ужрадъёс, кино фестиваль, семья шудонъёс. Куартолэзь пумын куатетӥез Мульги юмшан ортчоз, отын базар, нылпиослэн концертсы, пӧртэм дышетскон ужрадъёс радъяськозы.

Тодэ вайытом, финн-угор дуннелы лулчеберет шоркарез арлы быдэ быръё. 2014-тӥ арын нырысетӥез шоркар Удмуртиысь Шаркан ёросысь Быгы гурт луиз. Собере дано нимез Эстониысь Сету музъемысь Обиница (2015), Венгриысь Иськасентдьёрдь гурт но Веспрем кар (2016), Карелиысь Вокнаволок (2017), Марий Элысь Шоруньжа (2019), Башкириысь Мишкино пор гурт (2020) нуллӥзы. Тямысэтӥзэ шоркарез быръён кылем арын инвожое ортчиз. Мульги кар сяна, вожвылъяськонэ Мордовиысь Подлесная Тавля эрзя гурт пыриськиз.

Ватсалом, 16-16 инвожое Эстониысь Тартуын Финн-угор калыкъёслэн VII дунневыл конгрессы ортчоз



Наверх
Вниз