Ижкар-18 °C
26 -тӥ тулыспал 2021 Удмуртарня
18+

«Кватчи табань» шулдыръяськон ортчоз Можга ёросын

  • 506
  • 0
Кватчи / Удмуртия
«Кватчи табань» шулдыръяськон ортчоз Можга ёросын
Туспуктэм: Григорий Фомин

7-тӥ южтолэзе Можга ёросысь Кватчи гуртын «Кватчи табань» шулдыръяськон ортчоз. Со сярысь ивортодэтъя «Удмуртия» агентстволэн корреспондентэзлы ужрадлэн кураторез Валентина Берёзкина вераз.

Туэ «Кватчи табань» шулдыръяськон мукет калыкъёсын пӧраськись «эшъёссэ» люканы тыршоз. Озьы ужрадэ пыриськисьёс удмурт табанез сяна, ӟуч мильымез, грузин хачапуриез, армян матнакашез но мукетъёссэ веръяны быгатозы.

Сцена вылын «Табань non-stop» концерт мыноз. Пӧртэм калыкъёслэн кырӟанъёссы чузъяськозы, эктонъёссы но калык шудонъёссы луозы.Нош йӧ площадкаын «Кватчи тёрлинг» шудозы.

Со сыӵе кёрлинг по-кватчински шуиськом ми. Калыкысь мукет аръёсы бичам вал ини чайникъёс, отчы йӧ кынтыса, соосты кёрлинг амалэн лэзьяськом
Валентина Берёзкина, «Кватчи табань» шулдыръяськонлэн кураторез

Тужгес трос калык «Табань кросс» ужрадэ люкаськоз шуыса чаклало. Отчы пичиос но, мӧйыос но, нылкышноос но, воргоронъёс но пыриськыны быгатозы.

Соос киязы таба кутозы, табазэс берыкъяса, табаньзэс, озьы бызьылыны кулэ луозы. Соослы нимысьтыз кышетъёс но айшетъёс вуриськом, мед чебер адӟиськозы шуыса
Валентина Берёзкина, «Кватчи табань» шулдыръяськонлэн кураторез

Озьы ик ужрад улсын пӧртэм мастер-классъёс ортчозы, «Катар» студия, нылпиослы площадка ужалозы, мылкыд карисьёсты валэн но снегоходэн ворттылытозы.

Туэ кватчиос куноослы магнитъёс но синпельлы кузьымъёс дасяло. Азьло аръёсы та бордын ӧз на ужаллялэ вал.

Одӥг куномы но ми дорысь сютэм но кузьымтэм медаз кошкы шуиськом
Валентина Берёзкина, «Кватчи табань» шулдыръяськонлэн кураторез

Туэ «Кватчи табань» ньылетӥзэ радъяськоз ини.

Одно ик пусъеммы милям туэ потэ, «Кватчи табань» со ӟуч «Масленица» ӧвӧл шуыса. Со чын-чын калык ужрад. Малы ке шуоно, тани та Кватчи, Можга палъёс ӵапак та вакытэ ортчыто вылэм «Кубо сюан»
Валентина Берёзкина, «Кватчи табань» шулдыръяськонлэн кураторез

Нылкышноос, толбыт черсон ужзы бырем бере, кубозы вылэ пуксьыса, гурезьысь нискылало, кубооссэс кутыса, коркась корка ветлыса ик, кырӟаса, эктыса ветло вылэм. Котькуд коркан кузё-нылкышноос соосты пӧртэм табанен куноятылӥллям: кин ке но сугонэн, кин ке губиен, кин ке ӵӧж сӥлен. Соин ик ужрадлэн валтӥсь тодметъёсыз табань но кубо луо. Соос удмурт нылкышнолэсь киужлы но, пӧраськыны но усточи луэмзэ возьмато.

Валентина Берёзкиналэн верамезъя, ужрадэ трос гинэ куноос люкаськыны кулэ. Кылсярысь, азьло аръёсы 2 сюрс 500-лэсь трос пыриськисьёс лыдъяськизы. Туэ но можгаос мылкыд каро ини. Соос понна нимысьтыз автобус радъямын луоз. Озьы ик Пермь улосвылысь но лыктыны мылкыд карисьёс вань. 

Тодэ вайытом, Ижкарын «Пельняньлэн дунневыл нуналэз» фестивальлэн йылпумъян нуналаз пӧртэм ужрадъёсы 40 сюрс адями пыриськиз, соос 10 тонна пельнянь сиизы. 



Наверх
Вниз