Ижкар-18 °C
26 -тӥ тулыспал 2021 Удмуртарня
18+

Вашкала алангасаръёслэн музъем вылазы улӥсьёслы сӥзем выль книга потӥз Удмуртиын

  • 410
  • 0
Ижкар / Удмуртия
Вашкала алангасаръёслэн музъем вылазы улӥсьёслы сӥзем выль книга потӥз Удмуртиын
Туспуктэм: Константин Вознесенских

«Удмуртия» издательство «Удмурты» сериысь выль книгазэ поттӥз – «Вашкала алангасаръёслэн музъем вылазы» (12+). Кызьы вераз ивортодэтъя «Удмуртия» агентстволы издательстволэн валтӥсь редакторез, книгаез люкась-радъясь Георгий Грязев, отчы удмурт калыклэн вашкала дырысеныз туннэ нуналозь вакчияк улон сюресэз пыртэмын.

Татын пыкиськемын трос ужъёс вылэ. Таӵегес книга поттылӥз ни вал ас вакытаз Владимир Емельянович Владыкин. Отысь трос фактъёссэ басьтӥм, кудӥз уката историен герӟаськемын. Но, со вылын ужаса, асьмелэсь выльзэ пуктыса, туала стилен туала дизайнэн карыса, туспуктэмъёсын карыса, тани таӵе аспӧртэмлыко книга пӧрмиз
Георгий Грязев, «Удмуртия» издательстволэн валтӥсь редакторез, книгаез люкась-радъясь

Тросэз ивортодэт удмуртъёс сярысь, но вунэтэмын ӧвӧл со калыкъёс но, кудъёсыз трос лэсьтӥзы удмурт калык, Удмуртия но быдэс Россия понна, пусйиз Георгий Грязев. Соос пӧлын тодмо конструкторъёс, архитекторъёс, спортсменъёс, артистъёс.

Валамон, алангасаръёс сярысь дауркылъёс но палэнэ ӧз кыле. Нялтас вераса, куд-ог тодосчиослэн малпамзыя, алангасар кыл кык калыкъёслэн нимъёссылэсь пӧрмемын – алан но хазар, нош аланъёс – со туала осетинъёс. Сое малпаса, книгаез радъясьёс осетин калыклы нимысьтыз саклык висъяны малпазы.

Пуктӥм Удмуртиын улӥсь дано осетин адямиез, кудӥз трос лэсьтӥз удмурт калык понна – со «Андан» коллективлэн кивалтӥсез Феликс Хубецов. Вань улонзэ со улэ татын, «Андан» коллективеныз быдэ дуннеез ортчиз ни. Отын со возьматэ удмурт калыклэсь культуразэ, удмурт калыклэсь эктонзэ, солэсь чеберлыксэ, сое нокызьы но люкыны уг луы ни удмурт музъемлэсь, удмурт калыклэсь
Георгий Грязев, «Удмуртия» издательстволэн валтӥсь редакторез, книгаез люкась-радъясь

Пусйымон, книга кык кылын лэсьтэмын – ӟуч но удмурт. Озьы ӟуч лыдӟисьёс но удмуртъёс сярысь тросгес тодыны быгатозы, нош удмуртъёс асьсэ сярысь анай кылынызы гожтэм ивортон шедьтозы. Со сяна, книгалэн пумаз ньыль бам вылын англи кылын текст сётэмын на.

Тани Москвае но мукет сыӵе интыосы ветлӥськомы ке, кунгож сьӧрысь адямиослэн но туж тунсыкъяськемзы потэ, кин со удмуртъёс, ма соос каро, кытысь потэмын, маин тунсыкъясько, маин аспӧртэмлыко луо. Соин ми книгалэн пумаз нимысьтыз текст сётӥмы англи кылын
Георгий Грязев, «Удмуртия» издательстволэн валтӥсь редакторез, книгаез люкась-радъясь

Георгий Грязев пусйиз, текстъёс туж капчи, валамон кылын гожтэмын, соин ик книга школаын дышетскись пиналъёслы но, бадӟымъёслы но тунсыко потоз. Сое издательстволэн вузкаронниысьтыз басьтыны луоз.

Тодэ вайытом, «Удмуртия» издательстволэн куинь книгаез 2019-тӥ арлы йылпумъянъёсъя улосвыл издательстволэн 50 устоосыз книгаоссы пӧлы пыризы



Наверх
Вниз