Ижкар-18 °C
26 -тӥ тулыспал 2021 Удмуртарня
18+

«Вала монэ», «Удмурт ветыллы – удмурт ним» но мукет акциос ортчыто Пичи Пургаын Анай кыллэн калыккуспо нуналэзлы

  • 333
  • 0
Пичи Пурга / Удмуртия
«Вала монэ», «Удмурт ветыллы – удмурт ним» но мукет акциос ортчыто Пичи Пургаын Анай кыллэн калыккуспо нуналэзлы
Туспуктэм: vk.com (Надежда Степанова)

Пичи Пурга ёросын Анай кыллэн калыккуспо нуналэзлы «Удмурт ветыллы – удмурт ним» но мукет акциос ортчыто. Со сярысь ивортодэтъя «Удмуртия» агентстволэн корреспондентэзлы «Удмурт Кенеш» огазеяськонлэн ёросысь ёзэтэзлэн тӧроез Надежда Степанова вераз.

Удмурт кылэз кутон удысэз котькыӵе но амалэн паськытатыны луэ шуыса, «Удмурт ветыллы – удмурт ним» акция ортчытӥм. Милям вань «Югдон» нимо эштосмы Иваново-Самарск (Муниципал кылдытэтын - ред.), отын Кабыста гуртын кылем арын кунян вордон туала ёзэтэз усьтӥськиз. Ветыл кунян вае ке, солы одно ик ним сётыны кулэ. Табере соослы туннэ нуналысен тырозы удмурт ним
Надежда Степанова, «Удмурт Кенеш» огазеяськонлэн Пичи Пурга ёросысь ёзэтэзлэн тӧроез

Сыӵе ӵектонзылы «Югдон» эштослэн тӧроез Фёдор Верёвкин но дурбасьтӥз. Кунянъёслы нимъёс асьсэос ик «Удмурт Кенеш» огазеяськонлэн ёзэтэзлэн азьветлӥсьёсыз ӵектӥзы. Туннэ нуналлы ог 30 нимъёсын лыдмет кылдытӥзы ни. Надежда Степанова пусйиз, нимъёс шедьтыны капчи ик вылымтэ.

Учким чебер нимъёс. Зорай но, Зоринча но, сяська нимъёс но чебересь вань, Лызгырлы но, Инвожо но, Купанча но, Киначача но, Инсьӧр но малы уд нима кадь. <…> Мон малпасько фермаын ужасьёс но та уже пыриськозы. Удмурт гурт бере со, соос пумит ӧз луэ, шумпотӥзы
Надежда Степанова, «Удмурт Кенеш» огазеяськонлэн Пичи Пурга ёросысь ёзэтэзлэн тӧроез

Кылсярысь, тани толон гинэ эштосысь ветылзы кунян ваем. Солы возёслэн нимызъя ик Югдон ним сётӥзы.

Со сяна, Пичи Пурга ёросын «Вала монэ» ӝӧквыл шудонъя чемпионат ялӥзы. Надежда Степановалэн верамезъя, шудонэз Удмуртиысь йӧскалык политикая министерствоын ог 5 ар талэсь азьло поттӥзы вал но библиотекаосы келязы. «Вала монэ» шудон ӟуч «Крокодиллы» тупа.

Соин командаен шудыны луэ. Пӧртэм амалъёсын кылъёслэсь пуштроссэс валэктыны луэ: яке суредаса, яке кылын вераса, яке возьматыса. Шудыны луэ пичиослы но, бадӟымъёслы но. Туж тунсыко, азартной шудон пӧрме вылэм
Надежда Степанова, «Удмурт Кенеш» огазеяськонлэн Пичи Пурга ёросысь ёзэтэзлэн тӧроез

18-тӥ тулыспалэ пургаос ёросысьтызы Вуж Мӧнья гуртысь гурт библиотекае интыяськем Удмурт но пор лулчеберетъя шор юртэ «Кылъя десантэн» потазы. Отчы удмурт, пор но ӟуч азьветлӥсьёс люкаськылӥзы. Ужрад улсын ик «Вала монэ» шудонэн но шудыса утчазы.

Шудӥмы куинь командаен. Ёросысьтымы «Удмурт Кенешлэн» командаез нырысь шудӥз Вуж Мӧнья командаен. Собере вормисез калыккуспо командаен шудӥз. Валамон ини, вормиз эшъяськон
Надежда Степанова, «Удмурт Кенеш» огазеяськонлэн Пичи Пурга ёросысь ёзэтэзлэн тӧроез

Ужрадын ик Пичи Пурга ёросын удмурт кылэз азинтон сярысь кенешизы но матысь дыре пӧртэм ужпумъёсъя ёрос тӧро доры ветлыны вераськизы.

Потэ вылэм вань ёрос ужрадъёсын одно ик кык кыл мед кутӥськоз, удмурт кылъя ужрадъёс нимысьтыз тросгес мед луозы. Кык кыл одно ик мед кутӥськоз баннеръёсын. Пӧртэм программаосы ӵектосъёсын ке пыриськиськомы, муниципал кылдытэтъёслэн ӵектосъёссы но озьы ик кык кылын гожтэмын мед луозы
Надежда Степанова, «Удмурт Кенеш» огазеяськонлэн Пичи Пурга ёросысь ёзэтэзлэн тӧроез

Со сяна, ёросын азьвыл аръёсы мытэм акциоссэс азинто. Кылсярысь, «Нуллы аслэсьтыд, лыдӟы аслэсьтыд» акцизэс, нош пиналъёс понна «Шудком» ортчытӥзы. 

Тодэ вайытом, Яр ёросын Анай кыллэн калыккуспо нуналэзлы «Бадӟым удмурт диктант Яр сямен» но «День в этно стиле» ужрадъёс ортчытӥзы. 



Наверх
Вниз