Ижкар+2 °C
26 -тӥ коньывуон 2021 Пуксён
18+

«Удмурт калыклы гожтэт» книга потӥз Удмуртиын

  • 613
  • 0
Ижкар / Удмуртия
«Удмурт калыклы гожтэт» книга потӥз Удмуртиын
Туспуктэм: Руслан Нуриахметов

«Удмуртия» издательство элькунлэн кунлык басьтэмез дырысен 100 ар тырмонлы но улосвыл кивалтэтлэн юрттэменыз «Удмурт калыклы гожтэт» книга поттӥз. Солэн пуштросэз, кулэлыкез но отчы пырем авторъёс сярысь ивортодэтъя «Удмуртия» агентстволэн корреспондентэзлы книгаез люкась-радъясь, издательстволэн валтӥсь редакторез Георгий Грязев вераз.

Книгае ужкагазъёс, статьяос, кылбуръёс, проза, гожтэтъёс пыризы. Георгий Грязевлэн верамезъя, ваньмыз со ужъёс кылем даур кутсконын улэм адямиослэсь, автономия кылдытон бордын тыршем удмурт азьветлӥсьёслэсь мылкыдъёссэс, дунне шоры учконъёссэс возьмато.

Оглом 14 авторъёслэн ужъёссы люкаськизы. Соос пӧлын Иосиф Наговицын, Трокай Борисов, Степан Барышников, Кузебай Герд, Даниил Майоров, Ашальчи Оки, Иван Яковлев, Константин Яковлев, Максим Прокопьев но мукетъёсыз. Книгаез люкась-радъясьлэн кылъёсызъя, шонерезъя, соос трослы уногес луыны кулэ вал.

Мынам малпамея, татчы пырыны кулэ вал ваньмыз со адямиос, кудъёсыз пыриськизы удмуртъёслэн нырысетӥ съездазы. Отын пӧртэм-пӧртэм сямен улӥсь, пӧртэм-пӧртэм сямен дунне шоры учкись адямиос люкаськемын: отын купечьёс но, отын черко ужасьёс но, отын коммунистъёс но, эсеръёс но. Ваньмыз соос огазе люкаськизы удмурт автономия кылдытон понна
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Книга ньыль люкетлы люкемын. Нырысетӥяз удмурт автономия кылдытонлэн историез сярысь вераськон мынэ. Истори тодосъя докторлэн Кузьма Куликовлэн статьяез пыр со вакытысь шуг-секытъёс, ужпумъёс тупен-тупен усьтӥсько.

Кыкетӥ люкетаз сётэмын со исторической документъёс, кудъёсыз возьмато со вамышъёсты, кызьы кылдытӥзы, нырысь кызьы ужаны кутскиз, собере кызьы юнматэмын вал, собере кызьы тани, шуом, Глазкарысь шоркармес но выльысь Ижкаре берыктӥзы. Тӥни сыӵе ужкагазъёс возьмато, кызьы мынӥз та уж асьме элькунамы
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Куинетӥ люкетаз 14 авторъёслэн ужъёссы пыризы. Георгий Грязевлэн кылъёсызъя, котькуд чурысьтызы туала удмуртъёслы вазиськонзэс, маке вераны тыршемзэс шӧдыны луэ.

Валаны луэ, малы, шуом, Ашальчи Окилэн ик мӧзмыт кылъёсыз, малы Кузебай Герд шумпотэ «пеймытысь югытэ потӥм» ини шуыса. Котькуд чурез лыдӟиськод ке, со вакытысь адямилэсь мылкыдзэ шӧдӥськод, со асьмелы кыӵе ке ужпумез кельтэ кадь, мар лэсьтыны кулэ, ма карыны кулэ, удмурт калык медаз быры шуыса, автономия басьтӥз бере, азьланяз мед мыноз шуыса
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Куинетӥ люкетлэн шорсюлмыз Кузебай Гердлэн статьяосыз луо. Со удмурт но, ӟуч но кылъёсын гожъяз, кызьы улонамы ӟуч кыл пырыны кулэ, кызьы удмурт кыл нылпи садъёсын, мер улонын кутӥськыны кулэ, кызьы удмурт кыл мукет кылъёсын одӥг радын вамышъяны кулэ.

Озьы ик книгае Иван Яковлевлэн «Удмурт калыклы гожтэм» но «Удмуртъёслы гожтэм гожтэт» кык статьяосыз пыризы. Ӵапак соосъя ик книгалы ним но сётӥзы.

Соослэн одӥг сюлмаськонзы – удмурт калык бырыны кулэ ӧвӧл. Удмурт калык азьланьтыны кулэ кылэз но, лулчеберетэз но, историез но. <…> Со (Иван Яковлев – ред.) котькудӥз сямен пусъе, ӟуч кылтэк азьлань мыныны уз луы. Озьыен, соку ик сюлмасько ни вылэм, удмурт но, ӟуч но кыл огъя, ӵош мед мынозы шуыса. Одӥгез но со ышыны кулэ ӧвӧл, школаын но, лулчеберет улонын но, мер улонын но
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Вератэк кельтыны уг луы Максим Прокопьевез но. Георгий Грязевлэн кылъёсызъя, со удмурт автономиез кылдытон бордын туж трос ужаз ке но, автономиез адӟытэк кылиз, малы ке шуоно бырыны шедиз.

Кызьы шуо тодосчиос, асьмеос туннэ нуналлы Максим Прокопьевез тодӥськом солэн одӥг гинэ книгаезъя - «Максимлэн гожтэмез». Со поттэмын вал юри удмурт калык пӧлын валэктон уж нуон пумысен. Малы удмуртъёслы нимаз автономия кылдытоно, малы башкиръёс пӧлы но, бигеръёс пӧлы но пыроно ӧвӧл
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Асьме дорозь «Максимлэн гожтэмез» книга одӥг экземплярен гинэ вуиз на. Ӵапак со книгаысь статьяос «Удмурт калыклы гожтэт» книгае но сюризы.

Нош книгалэн ньылетӥ люкетэз туала вакытэн тодматэ ини. Отын верамын, мар лэсьтэмын удмурт движениен, кыӵе гимназиос ужало, кыӵе вормонъёс вань, кызьы удмурт кылэз дышето, лулчеберетэз азинто но мар эшшо лэсьтоно на.

Тӥни сыӵе экскурс лэсьтӥськом вашкалаысен туннэ нуналозь. Сыӵе огъя кульчо кадь со луэ. Малпасько, вань мар бордын ужаны «Удмурт Кенешлы» но, котькуд удмуртлы но, малпаськыны, мар верамын вал соосын, мар лэсьтэмын туннэ нуналлы
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Георгий Грязевлэн кылъёсызъя, книгае материалъёсты люканы ар ӵоже тыршизы. Отчы ог 30 пала литература источникъёс пыризы. Бадӟым юрттэт луиз Александр Шкляевлэн «Ӵашьем нимъёс» книгаез.

Малпасько, талэн луыны кулэ на, дыр, продолжениез, малы ке шуоно татчы 14 гинэ автор пыриз, нош ужасез Удмуртия кылдытон бордын трос вал. Соин ик утчано на, копано на, шедьтоно на. Соос выль нимъёс мед луозы, малы ке шуоно татчы ӧз пыре тросэз со авторъёс, кудъёсыз СОФИН ужъя сюризы, шуом, Степан Бурбуров, Кедра Митрей, мукет дано адямиос. Соин ик та книгалэн, мон малпасько, азьланез вань
Георгий Грязев, «Удмуртия» книгапоттоннилэн валтӥсь редакторез, книгаез люкась-радъясь

Книга 2 сюрс экземплярен потӥз. Ӧжытэзтэк ваньмыз со элькунысьтымы муниципал библиотекаосы келямын луоз. 

Тодэ вайытом, кемалась ик ӧвӧл издательствоын вашкала алангасаръёслэн музъем вылазы улӥсьёслы сӥзем книга потӥз



Наверх
Вниз