Ижкар+2 °C
28 -тӥ коньывуон 2021 Покчиарня
18+

«Чёртова яма» моноспектаклен тодматон ортчиз Ижкарын

  • 857
  • 0
Ижкар / Удмуртия
«Чёртова яма» моноспектаклен тодматон ортчиз Ижкарын
Туспуктэм: Константин Вознесенских

Удмурт йӧскалык театрысь артист Максим Григорьев Виктор Астафьевлэн «Прокляты и убиты» романэзлэн нырысетӥ люкетэзъя дасям «Чёртова яма» моноспектакленыз тодматӥз. Отчы театрын ужасьёс но ӧтем куноос пыриськизы. Ужрадэ ивортодэтъя «Удмуртия» агентстволэн корреспондентэз но вуылӥз.

Тём-тём пеймыт пичи зал калыкен быдэсак тыр. Учкисьёс спектакль кутскемез возьмало. Ваньмыз дась кадь. Сцена вылын декорациос. Пель сьӧрын поезд кошкем куара кылӥське: чу-чух-чу-чух-чу-чух. Малпамтэ шорысь огез кыллись «манекен» вырыны, берыкъяськыны ӧдъяз. Собере веранзэ мытӥз. Спектакль кутскиз.

Максим Григорьев учкисьёссэ кык часлэсь кемалы Быдӟым Атыкай ож аръёсы кезьыт Сибырын луэм учыръёсы зымтытӥз: кызьы 1942-тӥ арын сӥзьыл но 1943-тӥ арын толалтэ Бердск кар вӧзысь запасной 21-тӥ стрелковой полкын али гинэ быдэ вуэм, тросэз дышетскымтэ, катэз тӥяллям пӧртэм-пӧртэм егит пиосты оже келяны дасязы, кыӵе шуг-секытъёсын соос пумиськылӥзы, мар дӥсязы, мар сиизы.

«Чёртова яма» моноспектакль

12 фото

Артист учкисьёсты синвуаськытӥз но, серекъятӥз но, жалян, сюлмаськон, куректон мылкыдъёсты ӝутӥз. Огназ даслэсь трос рольёсты шудӥз-возьматӥз. Абдраса учконо, кызьы гинэ одӥг геройзэ мукетызлэсь висъяса, куаразэ, мылкыдзэ, тусбуйзэ воштыса вуэ.

Таиз ини нимаське уж. Ужаськом котькуд нунал соин. Мон со адямиез соку ик син азям пуктӥсько, <…> со адямиез адӟыны кулэ, сое адӟиськод ке, тон соку ик быгатод сое кутыны
Максим Григорьев, Удмуртиысь йӧскалык театрысь артист

Спектакль бере тросэз учкисьёс синкылиоссэс лушкем ӵушыса потӥзы. Йыразы трос гинэ малпанъёс бергазы, луоз.

Максим (режиссёр сямен но, актёр сямен но) учкисьсэ чик уг жаля - спектаклез туж секыт учкыны. Залысь потэм бере но син азяд пуктӥськод куд-ог сценаосты, нош ик куректӥськод, малпаськиськод соос сярысь. Мыным потэ, спектакль бере котькуд адями кӧня ке воштӥськыса потэ, мукет синъёсын учке война шоры
Алёна, учкись

Театрысь пуктӥсь режиссёр Леонид Романов котьку но спектакльлэсь умоен быремзэ возьмасько шуыса пусйиз. Озьы ке но, спектакль кулэ шуыса вераз.

История вал ведь сыӵе. Оло, ӧжыт будэтысагес но отын гожтэмын, но ведь сыӵе дыръёс вал ук. Историез вунэтыны уг яра. Малы уг яра? Азьланяз ноку но повториться медаз каре сыӵе урод учыръёс
Леонид Романов, Удмуртиысь йӧскалык театрысь пуктӥсь режиссёр

Спектакль ортчем бере ачиз Максим Григорьев малпам ужез пӧрмиз шуиз. Мар вераны-возьматыны тыршиз - быгатӥз. Нош учкисьёс мылкыдзэс кема кичабонъёсын веразы.

Спектакльлэн премьераез Удмуртиысь кун йӧскалык театрын 18-тӥ но 19-тӥ южтолэзе луоз.

Тодэ вайытом, азьвылгес Максим Григорьев ивортодэтъя «Удмуртия» агентстволэн корреспондентэзлы вераз вал, малы та произведениез басьтӥз. 



Наверх
Вниз