Ижкар+1 °C
13 -тӥ оштолэзь 2021 Пуксён
18+

«Театральное Приволжье» округъя фестивальлы йылпумъянъёс лэсьтӥзы Удмуртиын

  • 627
  • 0
Ижкар / Удмуртия
«Театральное Приволжье» округъя фестивальлы йылпумъянъёс лэсьтӥзы Удмуртиын
Туспуктэм: Удмуртиысь тӧролэн но кивалтэтлэн пресс-службазы

27-тӥ южтолэзе Удмуртиысь кун филармониын «Театральное Приволжье» округъя фестивальлы йылпумъянъёс лэсьтӥзы. Устоосыз луон понна Приволжск федерал округысь 14 улосвылъёсысь дышетскисьёслэн но студентъёслэн 28 коллективъёссы нюръяськизы. Ужрад онлайн амалэн ортчиз, ивортэ элькун тӧролэн но кивалтэтлэн пресс-службазы.

Удмуртиысь вожвылъяськонэ кык коллективъёс пыриськизы. «Детские театральные коллективы и студии» категориын - Сарапулысь Театр искусствоя «Точкин дом» центрысь «Точка» театр, «Молодёжные театральные коллективы и студии» категориын – Воткаысь «Юбилейный» культура дворецысь «Золотой ключик» экспериментальной театр-студия

Удмуртилэн кивалтэтэзлэн тӧроез Ярослав Семёнов 2019-тӥ арын Росси азьмуртлэн Приволжск федерал округъя ужоскето муртэныз Игорь Комаровен кичӧлтэм фестиваль туж умой кутскон луиз шуыса пусйиз.

Фестиваль вылӥ планка пуктӥз, озьы ке но вожвылъяськонэ пыриськисьёслэн лыдзы арысь аре йылоз шуыса оскисько. Кун театръёслы юрттэт сямен ик, таӵе театръёслы но юрттэт туж кулэ. Тон аслад карад, аслад ёросад гинэ уд, быдэс округ, быдэс кун азьын астэ возьматыны быгатӥськод
Ярослав Семёнов, Удмуртилэн кивалтэтэзлэн тӧроез

Трансляция дыръя котькуд улосвылысь жюри аслэсьтыз йылпумъянъёссэ ялӥз. Ас улосчиоссы понна соос куаразэс сётыны ӧз быгатэ. Вормисьёсты вань улосъёслэсь баллъёссэс ватсаса шараязы.

«Лучший детский спектакль» номинациын Самара улосвылысь пичи актёрлэн образцовой мунё театрезлэн «Шинель» спектаклез вормиз. Егитъёслэн театръёссы пӧлын Чувашиысь «Абрикосовый сад» театр коллективлэн «Страна слепых» ужез нырысетӥ луиз.

Режиссёръёслэн вожвылъяськоназы но верам ужъёсты висъязы: вормизы Виктор Михайловен пуктэм «Шинель» но Дмитрий Мироновен дасям «Страна слепых».

Нылпиос пӧлын устоез актёр но актриса Денис Бахолдин (Пенза улосвыл, «Будь здоров, школяр!») но Дарья Фомина (Чувашия, «Оскар и Розовая дама») луизы. Егитъёс пӧлын – Александр Чернов но Кристина Никифорова (Чувашия, «Страна слепых»).

2020-тӥ ар Буре ваён но данлык арен ялэмын вал, солы сӥзьыса, «Лучший спектакль раскрывающий тематику года» ватсаса номинация ялӥзы. Вормисе Ульяновск улосвылысь «У Лукоморья» театр-студилэн «В списках не значился» спектаклез но Марий Элысь Пинал учкисьлэн «Маска» калык театрезлэн «У войны не женское лицо» спектаклез потӥзы.

Афиша суреданъя конкурсын Киров улосвылысь Софья Подгурская но Полина Тарасова вормизы.

2020-тӥ арын пандемиен сэрен улосвыл люкетъёс онлайн амалэн ортчизы. Озьы ке но, конкурсэ 416 коллективъёс пыриськизы - оглом 4 сюрс 753 пиналъёс но егитъёс

Вормисьёсты сӥё-дано пусъён ужрад Удмуртиын оштолэзе ортчоз. Призёръёс синпель пусъёс но выль спектакль пуктыны грантъёс басьтозы. 



Наверх
Вниз