Ижкар+1 °C
13 -тӥ оштолэзь 2021 Пуксён
18+

Бӧдья позумент бурдъятэ: ёросысь кибашлыос вашкала пужыятскон амалэз улӟыто

  • 609
  • 0
Якшур-Бӧдья / Удмуртия
Бӧдья позумент бурдъятэ: ёросысь кибашлыос вашкала пужыятскон амалэз улӟыто
Туспуктэм: «Ошмес» газет (Вера Вахрушева)

Якшур-Бӧдьяысь Кибашлыослэн центразы ужась ӧнерчиос та вакытэ «Бӧдья позумент» проектэз улонэ пыӵатон бордын ужало. Позумент амалэн пужыятсконэз 2000-тӥ аръёсы улӟытӥз кибашлы ӧнерчи Людмила Щинова, нош кылем арын центрлэн кивалтӥсез Ангелина Исаева ӵектос (проект) гожтӥз, та аспӧртэм пужыятскон амалэз ёросамы улӥсь нылкышноос пӧлын эшшо паськытгес вӧлмытон понна.

Пужыятскон уж туала дыре туж ик вӧлмемын ӧвӧл ни, угось со туж чыры-пыры уж, синъёсты жадьытӥсь но саклыкез курись удыс. Соин ик проектсэ гожтыкуз, вера Ангелина Дмитриевна, вань ужасьёсыныз вераськыса, трос материалъёс лыдӟыса, лыдэ басьтыны тыршиз ваньзэ, ма кулэ луоз нылкышноослэсь ужзэс капчиятон понна. Озьы проект чотын пӧртэм кулэ луись арбериос басьтэмын: яркыт лампаос, лупаос но йыр вылэ дӥсяськись очкиос, со сяна, веньёс, сӥньысъёс, качыос, пӧртэм басмаос, эскизъёсты суреданы альбомъёс но карандашъёс, басмаез думылон понна бадӟым рамкаос но котырес пачкатонъёс (пяльцы).

Позумент амалэн пужыятскыны дышетон

10 фото

Арнялы кык пол Якшур-Бӧдьяысь но гуртъёсын улӥсь 40 пала адями - пӧртэм удысъёсын ужась нылкышноос, пенсие потэм кышномуртъёс, школаын дышетскись нылъёс - ёрос клубе пужыятскыны ветло. Дышето соосты ӧнерчиос Людмила Щинова но Светлана Широбокова.

Нимысьтыз верано, котькуд пужылэн аслаз пуштросэз, мур валанэз. Кудзэ ке яра мӧля вылэ пужыятыны, мукетсэ - саесэ яке дэрем сӧзые гинэ. Озьы нылкышноос вашкала валанъёсын но тодматско, пичи дыръязы дышетэм ужез но тодазы ваё. Проектлэн пумаз котькуд пыриськись одно ик аслэсьтыз киужзэ быдэстыны кулэ. Дась ужъёсын адӟытон радъяськоз.

Якшур-Бӧдьяысь Татьяна Сидорова шумпотыса ветлэ та пумиськонъёсы.

Ужан удысэ лыдпусъёсты эскерон-лыдъянэн герӟаськемын вал, соин мон али сыӵе шутэтскисько! Ваньмон дырме пайдаё ортчытыны тыршисько, одно ик мар ке выльзэ тодыны, аслым усьтыны тыршисько. Мыным туж яра али пужыятскыны! Кин тодэ вал, озьы луоз шуыса? Мынам удмурт дэреме вань ини, сое Кибашлыослэн центрысьтызы ӧнерчиос ик вуризы-куизы вал, табере бордаз ас киосыным чеберъян лэсьто – укотуг яке налобной повязка
Татьяна Сидорова, киужлы дышетскись

Искусствоосъя школаысь вуриськонъя дышетӥсь Татьяна Кулябина куать дышетскисьёсыныз ӵош пужыятскыны ветлэ.

Нылъёсын ми олокыӵе но удмурт шӧмо костюмъёс вурылӥськомы. Азьланяз нош ик выль коллекция дасяны малпаськомы, дэремъёсты позумент пужыосын чеберъямы ке, солэн дунлыкез туж вылӥ луоз, асьмелы но пайда ваёз
Татьяна Кулябина, киужлы дышетскись

Ушъяськон кадь медам луы, но туж вераме потэ ас мылкыдме но, угось позумент амалэн пужыятскыны ачим но ветлыны кутски.

Киужен вашкала дыръёсы ялан выризы нылъёс, нылкышноос, песянайёс. Со зэмос нылкышно уж. Пичи дыръям монэ мамае нырысь ик киужлы дышетӥз, со шоры учкыса, мон вуриськыны, керттӥськыны, пужыятскыны кутски... Али Людмила Щиновалэн дышетэмезъя ваньмыз со тодам лыктӥз, нош ик пичи дырам вуи кадь, куке мамае шакрес киосыныз (соку со фермаын ужа вал) мыным гань-гань валэктылӥз, кызьы созэ, я тазэ вурысэз лэсьтоно... Секыт ужам бере со милемлы но дыр одно ик шедьтылӥз, угось валалляз, со ке ӧз дышеты, ми номыр лэсьтыны ум быгатэ.

Милемлы капчигес, анайёсынымы ӵошатыса: фермаын, бусы гыронын, тэль коранын, сюрес ӝутонын ум ужаське. Туала дыре йыр висён ӵемгес кутэ, озьы ке но, сюлмад пырем киужен выриськод ке, тросэз сюлмаськонъёс но жадён палэнэ кошко. Бӧдья позумент но бурдъятэ…

Вера Вахрушева, туспуктэмъёс авторлэн

Ивортон Якшур-Бӧдья ёросысь «Ошмес» газетын («Рассвет» газетлэн ватсэтэз) потӥз. Ивортодэтъя «Удмуртия» агентстволэн но Удмуртиысь печатья но калыке ивортодэт вӧлмытонъя агентстволэн валче ӵектоссы. 



Наверх
Вниз