Ижкар+1 °C
13 -тӥ оштолэзь 2021 Пуксён
18+

Нылпиослы «Лул Писпу» ӵектосэз улонэ пыӵатозы Алнаш ёросын

  • 326
  • 0
Алнаш / Удмуртия
Нылпиослы «Лул Писпу» ӵектосэз улонэ пыӵатозы Алнаш ёросын
Туспуктэм: vk.com (Алексей Семёнов)

Алнаш ёрос лыдӟетъюртын ужасьёс нылпиослы «Лул Писпу» ӵектоссэс улонэ пыӵатозы. Со «Культурная мозаика Удмуртии: партнёрская сеть» улосвыл вожвылъяськонын вормисьёс пӧлы пыриз. Со сярысь ивортодэтъя «Удмуртия» агентстволэн корреспондентэзлы Алнаш ёрос лыдӟетъюртлэн кивалтӥсез Анастасия Васильева вераз.

Конкурс «Культурная мозаика Удмуртии - 2020» ӵектосын вормисьёс пӧлын ортчиз. Отчы проектъёссэс умой быдэстэм но ас интыоссэс эшшо азинтыны дась луись огазеяськонъёс пыриськизы.

Алнаш ёрос лыдӟетъюртын ужасьёс кылем арын быдэстэм ӵектоссэс азинтӥсь ужзэс келязы.

Нырысь милям вал «Выжыкыл песьтэр» нимо ӵектосмы. Со улсын Кибашлыослэн юртазы ужасьёсмы милемлы песьтэръёс лэсьтӥзы. Со песьтэръёсы ми проектъя басьтӥмы удмурт книгаос но пӧртэм канцтоваръёс. Песьтэр кошкиз садикъёсы. Алнаш ёрос черкогуртамы гинэ со вал
Анастасия Васильева, Алнаш ёрос лыдӟетъюртэн кивалтӥсь

Нылпи садэ ветлӥсь пиналъёс со песьтэръёсты арнялы доразы басьтылӥзы, анай-атайёсынызы ӵош книгаосты учкылӥзы но соосъя киуж лэсьтыса берен берыктылӥзы.

Милям вал Лопшо Педунь. Лопшо Педунь ветлӥз нылпи садъёстӥ со песьтэрен, книгаосын тодматыса. Нылпиослэн котькудзылэн со песьтэрез басьтэмзы потэ вал, доразы нуэмзы потэ вал. Нош анай-атайёсын вал шуггес, малы ке шуоно соослэн котьку но дырзы ӧвӧл
Анастасия Васильева, Алнаш ёрос лыдӟетъюртэн кивалтӥсь

Ӵектосэз йылпумъяса, Алнашын фестиваль радъязы. Отын пӧртэм номинациосъя вормисьёсты ялӥзы. Ужрадэ пыриськем вань семьяосты удмурт книгаосын, канцелярской вузъёсын но мукет кузьымъёсын пусйизы.

Нош туэ библиотекаын ужасьёс «Культурная мозаика Удмуртии: партнёрская сеть» конкурсын вормемзылы луыса «Выжыкыл песьтэрез» азинтӥсь «Лул Писпу» ӵектоссэс улонэ пыӵатозы.

Ми малпамы песьтэръёсмес ёростӥ лэзьыны, ёрос садикъёсы, гуртъёсы. Удмурт книгаосмы вань ини, отчы милемлы кулэ луоз канцтоваръёс басьтыны. Соос (ёросысь пиналъёс – ред.) но мед быгатозы мар ке но лэсьтыны шуыса
Анастасия Васильева, Алнаш ёрос лыдӟетъюртэн кивалтӥсь

Со сяна, ӵектос улсын Алнаш ёрос лыдӟетъюрт сьӧрысь интывылэз выльдыны ӧдъяло. Анастасия Васильевалэн кылъёсызъя, отын лэчыранъёс, берганъёс сыло ини. Нош туэ, грантлы луыса, отчы гужем сцена лэсьтозы, пуконъёс пуктозы.

Отчы ик пуктыны турттӥськом писпу. Со луоз кортлэсь сыӵе символ. Милям Алнашысь туж трос гожъясьёс потэмын. Соин ик милям нырысетӥ ӵектосъя лэсьтэмын вал писпу кадь «ролл ап» (рекламаен яке мукет иворен стенд – ред.), кытын кыӵе гуртысь кыӵе гожъяськись потэмын шуыса гожтэмын вал. Табере ми со писпуэз лэсьтыны турттӥськом кортлэсь
Анастасия Васильева, Алнаш ёрос лыдӟетъюртэн кивалтӥсь

Писпу вӧзы QR-код пуктозы. Соя мылкыд карисьёс лыдӟетъюртлэн нимлыко сайтаз сюрозы но Алнаш ёросысь гожъяськисьёс сярысь тодыны быгатозы.

Озьы ик писпу котыре Алнаш ёросысь гожъяськисьёслы сӥзьыса пичияк аллея мерттозы.

Нялтас вераса, «Культурная мозаика Удмуртии: партнёрская сеть» вожвылъяськонэ элькунысьтымы ёросъёсысь но пичи каръёсысь 19 ӵектосъёс пыриськизы. Соос пӧлысь укмысэз вормисе потӥзы:

  • «Творческие люди», Сарапул ёрос;
  • «ВыжыКыл: в поисках Мелодии небесной росы» лулчеберетъя но дышетонъя ӵектос, Пичи Пурга ёрос;
  • «Лул Писпу», Алнаш ёрос;
  • творчестволы сӥзем «Дети и мы» инклюзивной инты, Эгра ёрос;
  • «Шольинская роспись», Камбарка;
  • Быдэ вуымтэослы но егитъёслы туризмъя «Семеро смелых» ёроскуспо фестиваль, Кизнер ёрос;
  • «Куделюшка», Эгра ёрос;
  • «По коням!», Кез ёрос;
  • «Новая Якшурка», Якшур-Бӧдья ёрос.

Ӵектосъёсты 2021-тӥ арын оштолэзьысен 2022-тӥ арын тулыспалозь быдэстозы. Котькудзэ быдэстон понна шор лыдын 350 сюрс манет висъялозы. 

Пусъём, вожвылъяськонэз Елена но Геннадий Тимченкоослэн Ӟечлэсьтон фондзы, Удмуртиысь лулчеберетъя министерство но элькун кивалтэт юрттэт улсын ортчыто.



Наверх
Вниз