Ижкар+18 °C
9 -тӥ куартолэзь 2021 Воскресенье
18+

Удмуртиысь пинал арганчиос но крезьчиос калыккуспо фестиваль-вожвылъяськонлэн лауреатъёсыз луизы

  • 602
  • 0
Уча / Удмуртия
Удмуртиысь пинал арганчиос но крезьчиос калыккуспо фестиваль-вожвылъяськонлэн лауреатъёсыз луизы
Туспуктэм: Григорий Фомин

Удмуртиысь Вавожысь В. П. Винокуров нимо искусствоосъя нылпи школаысь но Можга ёросысь Уча черкогуртысь искусствоосъя нылпи школаысь пиналъёс «Весенняя феерия талантов» калыккуспо фестиваль-вожвылъяськонлэн лауреатъёсыз луизы. Краснодарын ортчись конкурс туэ кыкетӥзэ радъяськиз но заочной амалэн ортчиз. Со сярысь ивортодэтъя «Удмуртия» агентстволы пиналъёслэн калык инструментъёсын шудонъя дышетӥсьсы Елена Вальд вераз.

Вожвылъяськонэ быдэс Россиысь, СНГ-е пырись кунъёсысь но Китайысь крезьгуро инструментъёсын шудӥсьёс пыриськизы. Удмуртиысь тямыс пиналъёслэсь ужъёссэс ысъязы. Соос «Калык инструментъёс» номинациын арганэн но крезен шудыны быгатэмзэс возьматӥзы.

Озьы, крезен шудӥсь вить нылъёс дипломъёс басьтӥзы. 13-15 аресъемъёс пӧлын I степенё лауреат Ксения Шубина луиз (Вавож). 7-9 аресъемъёс пӧлын II степенё лауреатъёс - Надежда Вичужанина но Анна Вахрушева (Вавож). 10-12 аресъемъёс пӧлын II степенё лауреатъёс - Ангелина Копысова (Вавож) но Софья Санникова (Уча).

Куинь диплом арганчиос басьтӥзы. 7-9 аресъемъёс пӧлын II степенё лауреат Илья Зорин луиз (Уча), 10-12 аресъемъёс пӧлын III степенё лауреат - Василий Бурков (Вавож). Озьы ик 10-12 аресъемъёс пӧлын I степенё дипломен Вавожысь Диана Антипинаез пусйизы.

Дышетӥсь пусъе, соос котькыӵе вожвылъяськонъёсы пыриськыны тыршо. Уката но элькун инлыкен ортчисьёсаз, уго соос вылӥгес дунъясько. Со дыре ик палэнын ортчись конкурсъёсыз но уг кельто. Али тросэз соос онлайн амалэн ортчо, но азьланяз, пандемиен сэрен сюбегатонъёсты куштӥзы ке, крезьгурасьёс сьӧрло но ветлыны дасесь.

Ми нылпиос но анай-атайёс понна тыршиськом. Мылкыдзы мед луоз, мылысь-кыдысь мед тыршозы. Валамон ини, конкурсъёс – со нылпилэсь быгатонлыкъёссэ одӥгез возьматон амал
Елена Вальд, калык инструментъёсын шудонъя дышетӥсь

Вераны кулэ, Елена Вальд ачиз но конкурсэ арганэн но крезен шудыса пыриськиз. Кыкезъя ик I степенё лауреат луиз.

Тодэ вайытом, Кизнерын ортчем «Зарни крезь» элькун вожвылъяськонын но Елена Вальд но солэн дышетскисьёсыз асьсэзыз вылӥын возьматӥзы. 



Наверх
Вниз