Ижкар+13 °C
13 -тӥ куартолэзь 2021 Покчиарня
18+

Кутскись гожъясьёслэн литературая конкурсазы вормисьёсты пусйизы Удмуртиын

  • 794
  • 0
Ижкар / Удмуртия
Кутскись гожъясьёслэн литературая конкурсазы вормисьёсты пусйизы Удмуртиын
Туспуктэм: vk.com (Литературный музей-квартира Г. Д. Красильникова)

28-тӥ оштолэзе Ижкарын Г. Д. Красильниковлэн музей-квартираяз «Будӥсь писательлэн ӝӧк сьӧраз» литературая VIII элькун вожвылъяськонэ пыриськисьёсты но вормисьёсты пусйизы. Ужрадэ ивортодэтъя «Удмуртия» агентстволэн редакторез вуылӥз.

Кызьы вераз вожвылъяськонэз радъясь музейлэн кивалтӥсез, кылосбур тодосъя кандидат Мария Ившина, 2021-тӥ арын вожвылъяськонэ 17 ёросъёсысь но ньыль каръёсысь 89 адями пыриськиз. 53 мурт кылбурзэ ыстӥз, 36-ез – проза. Удмурт кылын 38 ужъёс гожтэмын. Пыриськисьёс пӧлын тросгес пиналъёс вал.

Конкурс ялэмын вал нырысь ик пиналъёслы, но гожъяськыны ведь кутско не только пиналъёс. Куд-огез бадӟым будыса ини кутско гожъяськыны. Соин ик ми берло аръёсы турттӥськом, мед ваньзы пыриськозы та конкурсамы
Мария Ившина, Г. Д. Красильниковлэн музей-квартираеныз кивалтӥсь

Пичи Пурга ёросысь Уром школаын дышетскись Екатерина Аркова музейлэн вожвылъяськоназ кыкетӥзэ пыриське ни, кык ар талэсь азьвыл 1-тӥ инты басьтӥз вал.

Мон гожтӥ нылпиос сярысь верос. Соос выпускнойысь мынӥзы оже но ваньмыз кулӥзы отын. Секыт тема, ы-ы, но мон туж яратӥсько та темаез, мон туж трос со сярысь верасько. Мон малпасько, пичи пиналъёс но кулэ тодыны сое, малы ке шуоно милям трос адямиос быризы отын
Екатерина Аркова, вожвылъяськонэ пыриськись

Грак ёросысь Елизавета Гуртаева 4-тӥ классын дышетске. Со понна ваньмыз нырысьсэ: вожвылъяськон но, тодмо удмурт гожъясьлэн музееныз тодматскон но.

Бадяр куар сярысь выжыкыл. Со вераське мукет будосъёсын, сэре олокытӥ лобаз. Вуиз толалтэ но, сое кельыт лымы шобыртӥз. Тулыс нош ик лобан кутскиз, сэре ачиз ӧз вала ни кытчы со вуиз
Елизавета Гуртаева, вожвылъяськонэ пыриськись

Ужъёсты пыриськисьёслэн арлыдзыя ньыль категориын эскеризы: 1-4, классын, 5-7 классын, 8-11 классын дышетскисьёс, бадӟымъёс. Елизавета Гуртаева ас ёзъёсыз пӧлын кыкетӥ инты басьтӥз.

Оглом, конкурсын 26 адями вормисьёс но призёръёс пӧлы шедиз

Вожвылъяськонэ вуэм ужъёсты кӧня ке ар ӵоже ини дунъяло Россиысь гожъясьёслэн огазеяськонзылэн ёзчиез Ульфат Бадретдинов (проза) но Удмуртиысь гожъясьёслэн огазеяськонзылэн кивалтӥсез Пётр Захаров (кылбурет).

Ульфат Бадретдиновлэн верамезъя, берло кужмоесьгес ужъёс вуыны кутскизы, озьы ик тросгес жанръёсын гожъяськыны кутскизы. Со Балезино ёросысь Ушур гуртысь Надежда Перевощиковалэсь но Дэри ёросысь Якшур гуртысь Виталий Морозовлэсь удмурт кылын гожтэм веросъёссэс пусйиз (бадӟымъёс пӧлын соос нырысетӥ но куинетӥ инты басьтӥзы).

Мед пыриськысалзы тросгес удмурт пиналъёс но, асьсэлэсь кужымзэс мед эскерысалзы, малы ке шуоно та выллем конкурсъёс ӧжыт. Котькыӵе темалы луэ гожтыны, со ласянь эрик сётэмын, котькыӵе югдурез, ужпумез ӝутыны луэ
Ульфат Бадретдинов, проза ӧрысь ужъёсты дунъясь

Озьы ик со вераз, мар бордын авторъёслы тросгес ужаны кулэ на. Ульфат Бадретдиновлэн кылъёсызъя, тросэз верослы тунсыко учыр бырйыны уг быгато на.

Вань татын очеркъёс но тани. Очеркъёсы адямиос но умой быръемын кадь. Но адямилэсь сямзэ, шуом, улон-вылонзэ усьтон понна тоже учыр кулэ. Озьы луыса потэ, соос асьсэос гинэ верало со сярысь, со кӧсыт луэ. Со ласянь ужаны кулэ на, шуом, дышетӥсьёслы но, асьсэлы но лыдӟылоно со очеркъёсты
Ульфат Бадретдинов, проза ӧрысь ужъёсты дунъясь

Удмурт кылын гожтэм ужъёсты басьтоно ке, кыл бордын но ужаны кулэ, лыдъя Россиысь гожъясьёслэн огазеяськонзылэн ёзчиез. Куд-огезлэн ӟуч сямен малпаськемзы шӧдӥське. Со сяна, литература произведениез чебергес карысалзы интыысь вераськемъёс (диалект кылъёс).

Геройлэн вераськоназ асьсэлэсь диалектной кылъёссэс соос пыртысалзы ке, со валамон луысал, соку ик лыдӟисьлы тодмо луысал: кытысь та, кудпалась, кызьы верасько – уйпалась, шор ёросысь-а, лымшор палась-а яке палэнысь. Сое пыртыны уггес быгато на али
Ульфат Бадретдинов, проза ӧрысь ужъёсты дунъясь

«Будӥсь писательлэн ӝӧк сьӧраз» вожвылъяськонэ вань пыриськисьёслы сертификатъёс сётӥзы. Нош вормисьёсты пусъён ужрадэ лыктӥсьёсты кылбурчи, крезьгурась Игорь Вылегжанин аслаз кырӟанъёсыныз шулдыртӥз.

Тодэ вайытом, 2020-тӥ арын конкурсэ 152 адями пыриськиз

*Туспуктэм вылын вожвылъяськонын вормись Надежда Перевощикова но музей-квартираен кивалтӥсь Мария Ившина



Наверх
Вниз