Ижкар+18 °C
9 -тӥ куартолэзь 2021 Воскресенье
18+

«Кулэм потон уй» удмурт йылолэн тодматӥзы дышетскисьёсты Башкириын

  • 517
  • 0
Татышлы / Россия
«Кулэм потон уй» удмурт йылолэн тодматӥзы дышетскисьёсты Башкириын
Туспуктэм: Дом дружбы народов и Ассамблея народов РБ

Башкириысь Татышлы ёросысь Выль Татышлы черкогуртысь пиналъёсты «Кулэм потон уй» удмурт йылолэн тодматӥзы. Со Быдӟымнунал азьын вирнуналысь покчиарняе потон уе ортчылӥз. Сям-йылол но солэн пуштросэз сярысь ивортодэтъя «Удмуртия» агентстволы Башкириысь Удмуртъёслэн историяя но лулчеберетъя центрысьтызы валтӥсь ӧнерчи Ирина Самигулова вераз.

Солэн кылъёсызъя, вашкалаос кулэм потон уез мистической йылолэн лыдьяло вал. Башкириысь Татышлы ёросысь удмурт гуртъёсын сое али но быдэсъяло.

Йылол удмуртъёслэн вирнуналысь покчиарняе потон уе кулэмъёс пото шуыса осконэнызы герӟаськемын. Кулэмъёс но мукет убиръёс, висёнъёс адямилы но, пудо-животлы но урод карыны вуо шуыса лыдъяло вал. Та нуналозь удмуртъёс одно ик юртсэс миськизы-утялтӥзы, нош вазь ӵукна нюлэскы палэзьпу вайёслы ветлылӥзы. Бӧрысь нуназе бере мунчо эстылӥзы. Веникен пырыкузы кулэмъёсты буре вайылӥзы, «азяды мед усёз, таза но гумыро каре милемыз» шуыса вераллязы. Мисьтӥськемзы бере ваньзэ чылкытсэ дӥсяллязы но палэзь вайёсты тырылӥзы.

Палэзь вайёсты ӧс янак вылэ тырыса потӥськом. Малы ке шуоно уйшор бере кулэмьёс пото, ветлыны кутско. Корка пушкы пырыса, уродлык медаз вае шуыса, палэзь вай тыриськом. Со утет выллем луэ. Пудоосты но мед утёз шуыса, гидэ пырон ӧс вылэ тыриськом
Ирина Самигулова, Башкириысь Удмуртъёслэн историяя но лулчеберетъя центрысьтызы валтӥсь ӧнерчи

Корка, гид ӧсъёс вылэ сяна, палэзь вайёсты капка вылэ но понылӥзы.

Ирина Самигулова верамезъя, песяез палэзьлэн утись кужымез туж зол шуылӥз. Сое одно ик кыдёкысь нюлэскысь вайыны кулэ вал. Кулэм потон уе гуртысь пуны утэм куараос медам кылӥське шуыса чаклаллязы. Со сяна, уйшор бере педло потанлэсь алылӥзы.

Песяе тазьы шуэ вал: «Кулэмьёс потӥзы, дыр, эн ветлэ ни»
Ирина Самигулова, Башкириысь Удмуртъёслэн историяя но лулчеберетъя центрысьтызы валтӥсь ӧнерчи

Пиналъёсты туж тунсыко вал та йылолэн тодматскыны. Соос ӧнерчиосты сак кылзӥзы, вань верамзэс йыразы кельтӥзы.

Ми вераськом, доразы анайзы, бабушьёссы лэсьто на шуыса, соос адӟо но тодазы кельто. Валанзы лыктэ, вань на улонысь кошкемьёс но шуыса, мукет измерение. Нош Быдӟымнунал - со трос действиосты огазея шуыса
Ирина Самигулова, Башкириысь Удмуртъёслэн историяя но лулчеберетъя центрысьтызы валтӥсь ӧнерчи

Тодэ вайытом, кемалась ик ӧвӧл, Башкириысь удмуртъёс 2021-тӥ арын «Чеберинаез» шараязы.



Наверх
Вниз