«Элькуновидение 2016» вожвылъяськонлэн йылпумъян люкетэз азьын азьпала потӥз Можга ёрос

Удмурт кырӟанъя «Элькуновидение 2016» вожвылъяськонлэн йылпумъян люкетэз азьын азьпала потӥз Можга ёросысь Мария Гроздова «Кизилиед» кырӟанэн (крезьгурез Влад Зверевлэн но Мария Гроздовалэн, кылъёсыз Мария Мамонтовалэн). Витетӥез улосвыл конкурс 22-тӥ коньывуонэ Ижкарысь лулчеберетъя «Аксион» дворецын ортчиз.

Сцена вылэ потӥзы Удмуртиысь, озьы ик Татарстанысь но Башкортостанысь 20 кырӟасьёс но коллективъёс. Вожвылъяськон-концертын кырӟанъёсты дунъязы ёросъёсысь ик ыстэм муртъёслэсь кылдытэм жюри. Тужгес трос баллъёс (118) люказ Можга ёросысь Мария Гроздова.

«Ми ум ик малпаське вал нырысетӥ чурын луыны. Туж шумпотӥськомы, тросэзлы милям кырӟанмы яраз шуыса. Оскиськомы, милемлы азьланяз но дурбасьтозы шуыса. <…> Зэмзэ вераса, кырӟанэз ми одӥг нуналскын гожтӥмы. Нырысь ик, мынам Машаез (Мамонтоваез — ред.) поттэме потэ вал, мон тодӥсько, солэн туж трос чебер кылбуръёсыз. Озьы ик ми тодмо Владэн (Зверевен — ред.), мон тодӥсько, со крезьгуръёс гожъя, мынам соосты огазеяны малпанэ кылдӥз. <…> Та ӵектос — творчествоя бадӟым праздник. Туж кулэ удмурт лулчеберетлы юрттон, удмурт кылэз азинтон понна. Милям возьматэммы потӥз, ми но асьме Удмуртимес, асьме лулчеберетмес яратӥськомы шуыса», — вераз иворъёсъя «Удмуртия» агентстволэн корреспондентэзлы Мария Гроздова.

Вожвылъяськон-концертын озьы ик тросгес баллъёс люказы Ижкарысь Первомай ёрос (90), Глаз кар (80) но Шаркан ёрос (80). 

«Элькуновиденилэн» йылпумъян люкетэз ортчоз 4-тӥ шуркынмонэ «Мынам Удмуртие» телеканалын. Отчы кыкетӥ люкетын тужгес трос балл люкам кырӟанъёс пыриськозы. Телевизор учкисьёс нимысьтыз висъям дыре СМС-куара сётыны быгатозы. Со куараосты но азьвыл люкам баллъёсты огазеяса, вормись кырӟан ялэмын луоз.

Со сяна, профессиональной жюри устозэ крезьгурез но кылбурез пусъёз.