Ижкар+9 °C
16 -тӥ куарусён 2021 Покчиарня
18+

Алнаш ёросысь гурт 2022-тӥ арлы Финн-угор дуннелэн лулчеберет шоркарез луиз

  • 2508
  • 0
Байтэрек / Удмуртия
Алнаш ёросысь гурт 2022-тӥ арлы Финн-угор дуннелэн лулчеберет шоркарез луиз
Туспуктэм: vk.com (Виталий Тарасов)

2022-тӥ арын Финн-угор дуннелэн лулчеберет шоркарез Алнаш ёросысь Байтэрек гурт луоз. Дано ним понна вожвылъяськонын вормисез 18-тӥ инвожое Тартуын Финн-угор калыкъёслэн тямысэтӥ конгрессазы ялӥзы. Озьы, вуоно арын Байтэрекын ӧжытсэ 12 ужрадъёс ортчозы. Со сярысь ивортодэтъя «Удмуртия» агентстволы гуртысь лулчеберетъя центрлэн кивалтӥсез Виталий Тарасов вераз.

Та конкурслэн сыӵе куронэз вань – 12 ужрад ортчытоно, солэсь ӧжыт уг яра. Тӥни дас кыксэ гожтӥм но, тужгес бадӟымез - со «Бай-Тэрек» калыккуспо фестиваль. Одӥгез – «Пукро гуръёс», таиз улосвылкуспо фестиваль ортчоз. Удмурт кылэз дышетонлыгес сӥземын милям, удмурт ужъя ортчозы мастер-классъёс – турынэн но куиськозы, сӥньысэн но куиськозы. Со удмурт кыллы дышетонэн луоз, пиналъёслы но, бадӟымъёслы но
Виталий Тарасов, Байтэрекысь лулчеберетъя центрлэн кивалтӥсез

Со сяна, Алнаш ёросысь Варали но Татарстанысь Ильнеть пор гуртъёсын удмурт сиён-юонъёслы сӥзем арня ортчытыны малпало. Озьы ик бигер элькунысь Варклед-Бодья гуртэ удмурт гуртэ эшъёссы доры потаны чаклало. Оглом, матысь Агрыз, Менделеевск ёросъёсысь поръёс но удмуртъёс понна ужрадъёс учкемын.

Но тужгес трос ужрадъёс Байтэрек гуртын гинэ ортчозы. Виталий Тарасовлэн верамезъя, ваньмыз удмурт кылэз азинтон понна пиналъёсын ужанлы сӥземын луозы: пӧранъя, киужъёсъя, кырӟанъя мастер-классъёс но мукетыз.

Финн-угор дуннелэсь шоркарзэ сӥё-дано усьтон ужрадэз толшоре, Ымусьтон фестивален валче ортчытыны малпало. Соку вань финн-угор калыкъёслэсь куншетъёссэс ӝутозы. Коронавирус вӧлмонэн югдур тупатскиз ке, ужрадэ пӧртэм улосвылъёсысь куноос вуозы шуыса оско.

Ми оскиськом ӟечезлы. Малпаськом, быгатозы, дыр, шуыса. Эшъёсмы милям туж трос Россиысь пӧртэм регионъёсын, лыктэмзы потэ. Мон малпасько, Мордваысь, Ленинград областысь эшъёсмы лыктозы, Псков областьын трос эшъёсмы, сетуос но. Усьтӥськиз ке граница, Эстониысь эстон калык но, сету калыкъёс но лыктозы малпаськом
Виталий Тарасов, Байтэрекысь лулчеберетъя центрлэн кивалтӥсез

Кӧня куноос вуозы, ваньзэсты интыяны быгатом, шуиз Виталий Тарасов. Соос 3-5 нуналъем фестивальёс ортчытъяны дышемын ни. Сьӧрлось лыктэм пыриськисьёсты Байтэрекын но бускель гуртъёсын улӥсьёс доразы возё, со сяна, кунокуаос но вань.

Виталий Тарасовлэн мылкыдыз лӧптэмын. Угось финн-угор дуннелэн шоркарез луон сярысь малпанэн соос 2014-тӥ арысен, со нимаз Шаркан ёросысь Быгы гурт басьтэм дырысен улӥзы. Но матысь ньыль аръёсы Удмуртия вожвылъяськонэ пыриськыны уг быгатӥ ни вал, собере асьсэос но вожвылъяськыны ӧз дӥсьтэ. Кужымзэс шӧдӥзы Быгыысь но Обиницаысь (2015-тӥ ар понна шоркар) кивалтӥсьёс индылэм, мылкыд сётэм бере гинэ.

Ми туж шумпотӥськом, вормимы шуыса. Ми отчы туж кема дасяським ини
Виталий Тарасов, Байтэрекысь лулчеберетъя центрлэн кивалтӥсез

Тодэ вайытом, Финн-угор дуннелэн лулчеберет шоркарез луоз понна Байтэрек сяна, Марий Элысь Горномарийской ёросысь Еласы (Йоласал) черкогурт вожвылъяськиз. Нош 2021-тӥ арын дано нимез Эстониысь Абья-Палуоя кар нуллэ



Наверх
Вниз