Ижкар+11 °C
18 -тӥ коньывуон 2021 Вордӥськон
18+

Куинь дипломен бертӥз «Удмуртия» издательство «Красная площадь» книга фестивальысь

  • 757
  • 0
Ижкар / Удмуртия
Куинь дипломен бертӥз «Удмуртия» издательство «Красная площадь» книга фестивальысь
Туспуктэм: Константин Вознесенских

Москваын 17-20 инвожое ортчем «Красная площадь» VII книга фестивальысь «Удмуртия» издательство куинь дипломен бертӥз. Кыксэ Россиысь книга поттӥсьёслэн ассоциациенызы ортчытэм «Лучшая книга года» вожвылъяськонын басьтӥзы, одӥгзэ Росотрудничество сётӥз. Со сярысь ивортодэтъя «Удмуртия» агентстволы издательстволэн валтӥсь редакторез Георгий Грязев вераз.

Кык дипломен кык ужъёсмы пусъемын – со «Удмуртская народная кухня» но «Удмурты. На земле древних алангасаров». Со нимысьтыз пусъемын вал, что именно национальной культураез, калык сямъёсты возьыны быгатэммы понна, сое чебер сётэммы понна
Георгий Грязев, «Удмуртия» издательстволэн валтӥсь редакторез

Россотрудничестволэсь данъетсэ нырысьсэ басьтӥзы, со «Секреты удмуртских мастеров» книгаез пусйиз. Федерал агентство кылем арын ик диплом сётыны малпа ни вылэм, но коронавирусэн сюбегатонъёсын валче диплом туэ вуиз.

Пусъемын соин, та книгаез, пе, возьматыны луоз мукет кунъёсын, СНГ-ысь улӥсьёслы, мукет странаосын улӥсь ӟучьёслы но, мед тунсыкъяськозы Россиын улӥсь мукет калыкъёслэн но чебер культураенызы
Георгий Грязев, «Удмуртия» издательстволэн валтӥсь редакторез

Георгий Грязевлэн кылъёсызъя, пандемиен сэрен шуг-секытъёс ваньмызлэн вал ке но, ваньмыз зол издательствоос, издательёс фестивале люкаськизы. Книгаослэн тиражъёссы кулэсмизы ке но, ӟечлыксы ӧз усьы. Улосвыл книгапоттонниослы вожвылъяськыны пумен секытгес луэ.

Ми учкыса ветлӥмы но валамы, что секыт но секыт луэ ини аслэсьтыд тустэ возьматыны, тынэсьтыд книгаостэ, ужъёстэ мед адӟозы шуыса. <…> Куке но вунэтэм, лябгес издательствоос кыстӥсько золъёсыз доры, сое возьматӥзы «Красной площадьын» ортчытэм конкурсъёс но. Таяз валтӥсь номинациын ми вормыны ӧм быгатэ, кылем арын ми вормим вал. Таре отын улосвыл издательствоос пӧлын одӥгаз гинэ конкурсын Татарстанысь издательство
Георгий Грязев, «Удмуртия» издательстволэн валтӥсь редакторез

Котьма ке но вожвылъяськонъёсы, фестивальёсы пыриськон азинскыны юрттэ, пусъе Георгий Грязев. «Красная площадь» ужрадын издательство азяз куинь ужпум пуктэ: дышетскон - угось отчы вань устоосыз издательствоос тужгес ӟеч ужъёссэс ваё; аслэсьтыз продукцизэ возьматон, вузкарон; конкурсъёсы пыриськыса, аслэсьтыз кужымзэ эскерон.

Туэ фестивале калыкез азьвыл пусйиськыса, нимысьтыз дыр висъяса гинэ лэзьылӥзы. Озьы ке но, тунсыкъяськисьёс, книга басьтӥсьёс трос вал, пусйиз Георгий Грязев.

Калык (удмуртъёсты, Москваын улӥсьёсты али уг басьтӥськы) тунсыкъяське удмурт выжыкылъёсын, мифъёсын, легендаосын, удмурт кухняен но удмурт калыклэн историеныз. Куинь сыӵе валтӥсь направление, тазэ басьто ваньмыз
Георгий Грязев, «Удмуртия» издательстволэн валтӥсь редакторез

Котьку сямен фестивальын тунсыко учыръёс но луыло. Георгий Грязев соосты но вератэк ӧз кельты. Одӥг нуналэ книгаосын бугыръяськон куспаз удмурт сямен вазись луиз, соку ик валамтэ но, соин верасько шуыса.

Ӟечбуресь, пе. Учкисько но, кык китаецъёс сыло – нылаш но пияш. Ӟечбуресь, шуисько. Соос нош ик «ӟечбуресь», шуо. Тӥ, шуисько, удмурт кылэз-а дышетӥськоды. «Ноу, ноу, ноу», шуо. Сэре нылаш вӧзысьтызы, переводчиксы со, мон, пе, Ижевскысь ачим, соосты, пе, юри дышетӥ, хоть одӥг кыл удмурт кылын мед вералозы шуыса
Георгий Грязев, «Удмуртия» издательстволэн валтӥсь редакторез

Китайысь студентъёс яке туристъёс издательстволэн ялан басьяськисьёсыз луизы ни. Георгий Грязев тодаз вайиз, валля арын ӵапак шундыӝужанпал кунысь куноослы книгазэс нырысьсэ валютаен вузазы.

Озьы ик возьмамтэ шорысь удмурт кылын вазем пеймыталэс куо пиосмурт.

Учкисько шораз, тон, шуисько, Европаысь ӧвӧл-а кытысь ке, грек яке испан выжыед ӧвӧл-а? «Ӧвӧл», шуэ, нош ик удмурт сямен. Мыным воксё паймымон потӥз. Тон удмурт ӧвӧл ведь, шуисько. «Ӧвӧл», шуэ! <…> Мон, пе, дышетӥсько удмурт кылэз, курсъёсы ветлӥсько Постпредствое Ольга Урасинова доры. Адями шалтыр вераське. Малы, шуисько, удмурт кылэз бырйид? Туж, пе, интересно потӥз: туж, пе, небыт, умой, француз кыл кадь туж небыт
Георгий Грязев, «Удмуртия» издательстволэн валтӥсь редакторез

Пиосмурт удмурт кылын книга басьтыны лыктэм. Вашкала алангасаръёслэн музъем вылазы улӥсьёслы сӥзем книгаез басьтэм.

Сыӵе учыръёс возьмато: не только удмуртъёс тунсыкъясько, мукет калыкъёс но. Соин ик книгаосмы кошкизы
Георгий Грязев, «Удмуртия» издательстволэн валтӥсь редакторез

Тодэ вайытом, кылем арын «Удмуртия» издательстволэн книгаосыз улосвыл но шаертодонъя литературая «Малая Родина - 2020» огъяросси вожвылъяськонысь дипломъёс вайизы.



Наверх
Вниз