Ижкар-24 °C
6 -тӥ толсур 2021 Вордӥськон
18+

Петрозаводскысь «NOID» группа Ижкарын рок-фестивальын гудыртоз

  • 844
  • 0
Ижкар / Удмуртия
Петрозаводскысь «NOID» группа Ижкарын рок-фестивальын гудыртоз
Фото: vepsnoid.com

Петрозаводскысь «NOID» группа Ижкарын рок-фестивальын гудыртоз. Соос вепс кылын кырӟанъёсты быдэстозы. Иворъёсъя «Удмуртия» агентстволы со сярысь вераз группалэн кивалтӥсез Владимир Соловьёв.

«GOORE FEST-2016» калыккуспо фин-угор рок-фестиваль 10-тӥ шуркынмонэ Ижкарысь «Петровский» вузкарон но шутэтскон центрын «Пинта» барын ортчоз.

Группалэн кивалтӥсез верамъя, соос Ижкаре нырысьсэ вуо. Асьсэдыз вепс кылын кырӟась этно-электрон проект нимало. Отчы пырисько Владимир Соловьёв — клавишной арбериосын шудӥсь, эффектъёсты тупатъясь, Александр Шашин — бас-гитараен шудӥсь, эффектъёс бордын тыршись но Алина Картынен — кырӟась.

«Группамы 2007-тӥ арын вордскиз. Ми зэмлыко вепс калык кырӟанъёсты туала аранжировкаен быдэсъяны малпаськом вал. Кутским фолк амалысен — аккордеон, контрабас, перкуссия, шулан. Борысь контрабасэз бас-гитараен воштӥм, перкуссиез — барабанъёсын», — вера Владимир Соловьёв.

Солэн кылъёсызъя, берло аръёс ӵоже учконъёссы эшшо но воштӥськизы. Табере соос ужазы электрон крезьгуро арбериосты куто, кырӟанъёсты быдэсъясьсылэсь куаразэ но эффектъёсын процессор пыр тупатъяло. Ваньмыз сямен кырӟанъёссы пӧртэм амалэн лэсьтэмын — вань dub, ambient, disco, chill.

«Аранжировкамы яке быдэстон амалмы вошъяське ке но, крезьгурмылэн инъетэз одӥг кыле — калык кырӟан. Со сяна ми соосты тодманы луоно кельтыны тыршиськом — крезьгурзэ ӧжыт гинэ тупатъяськом», — валэктэ группаен кивалтӥсь.

Noid - Ištub neižne randan rӧunal (live-set)

Ижкаре «NOID» группаез ӧтиз фестивалез огез радъясь Денис Антонов. Азьвыл со вераз вал «фестиваль зэмзэ но паськытгес луыны кулэ, рок-крезьгурен тунсыкъяськыны мылкыд карисьёс трос» шуыса.

Владимир Соловьёвлэн верамезъя, соос пӧртэм ужрадъёсы ялан ветлыны тыршо.

«Арысь аре ми одӥг яке кык бадӟым фестивальёсы пыриськиськом. Араз кӧня ке пол кунгож сьӧры потаськом. Карелилэсь палэнын ӵемгес выступать кариськом. Кӧня ке арня талэсь азьло Финляндиысь вуим, Тампере но Турку каръёсын концерт сётӥм, солэсь азьвыл Москвае «Оберег» фестивале вуылӥм. Ижкаре кемалась вуылэммы потэ вал ни, ми но фин-угор калыкъёс ук. Татын милям эшъёсмы но вань — «Silent Woo Goor» группа. Соосын ми нырысьсэ тодматским Петрозаводскын «Крезьгуро инкубатор» проектын (сое «Nuori Karjala» огазеяськон радъя вал). Бӧрысь пумиським Италиын. Отын милям группаосмы Россилэсь данзэ «Liet international» конкурсын утизы», — вераз Владимир Соловьёв.

«NOID» группалэн тросэз кырӟанъёсыз калык кырӟанъёс луо, но пӧлазы вань вепс кылбурчиослэн кылъёссыя гожтэмъёсыз но.

«Фестивальын ми выль программамес шудом. Паськыт учконо ке, амалмес этно-электроника ниманы луоз. Со 1 но ӝыны час кыстӥське», — ватсаз Соловьёв.

Рок-фестивальын озьы ик пыриськозы «Garuda», «Peace Pu», «Малыми» (Ex — Amiso Wott), Огназкион. 



Наверх
Вниз