Ижкар+20 °C
24 гудырикошкон 2019 Кӧснунал
16+

Финн-угор роклэн сюлэмыз жугиськиз Ижкарын Goore Fest фестивальын

  • 1401
  • 0
Ижкар / Удмуртия
Финн-угор роклэн сюлэмыз жугиськиз Ижкарын Goore Fest фестивальын
Фото: Григорий Фомин

11-тӥ шуркынмонэ Ижкарын кыкетӥз «Goore Fest» финн-угор рок-фестиваль ортчиз. Удмурт группаос сяна, отчы Карелилэн шоркарысьтыз Петрозаводскысь вепсъёслэн «Noid» группазы пыриськиз. Со сярысь ивортэ «Удмуртия» агентстволэн корреспондентэз.

Удмурт крезьгурет удысын ӟеч тодмо луись «Garuda» группаен нош ик пумиськем сяна, матысьгес тодматскыны кылдӥз выль огазеяськонъёсын — «Peace Pu», «Огназкион» но «Малыми».

«Туж умой пумитазы. Но туннэ ӧжытгес кырӟамы, малы ке шуоно составмы кӧня ке воштӥськиз… Бас-гитаристмы ваньзэ дышетыса ӧз вутты на, соин ӧжытгес. А так золгес сётысалмы», — веразы «Garuda» группаысь кырӟась Светлана Беляева но арганэн шудӥсь Владимир Глушков.

«GARUDA» группа «Goore Fest» финн-угор рок-фестивальын

 

Нош «Огназкион» — Татарстанысь Микаль но Николай Михайловъёс — чылкак выль коллектив. Сцена вылэ соос нырысьсэ ӵошен потӥзы. Кырӟанъёсты гожъя Микаль, со лэчыт кылбуръёссэ но лыдӟыны вуттӥз.

«Peace Pu» группа удмурт егитъёслэн «Шунды» огазеяськонзылэн «Куарагур» ӵектосэз улсын ар но ӝыны ар талэсь азьло гинэ кылдӥз. Вакчи дыр куспын трос адямиез синмаськытыны быгатӥзы, крезьгуро клип лэсьтыны вуттӥзы. Но та фестивальын сцена вылэ потэмзы берпуметӥез вал шуизы. Озьы ке, но, крезьгурасьёс уз ыше, вылды. Пӧлысьтызы одӥгзэ — гитараен шудӥсез Влад Степановез «Малыми» группаысь но адӟыны луиз.

 

«Goore Fest» финн-угор рок-фестивальын «Огназкион» но «Peace Pu»


«Малыми» азьвыл тодмо «Amiso Wott» группаысь потэмын. Нош гитаристсы Владимир Жуйков «Silent Woo Goor» группаын но шудӥз. Кырӟасьсэс Богдан Анфиногеновез тодӥсьтэмез туннэ ӧвӧл ни, дыр, со пӧртэм ӵектосъёсы пыриське. Озьы ик группаын шудо Чудья Жени но Евгений Уткин.

«Нырысь ик вал «Amiso wott», ӟуч сямен — а вот и мы, али кыӵе ке выль этап: малы ми. Озьы кулэ. Али трос кырӟанъёс «Amiso wott» группалэсь, но вань авторской кырӟанъёс, кудъёссэ гожтӥз Женя Бикузин но мон кӧня ке кылъёсты. Со «Малы ми, озьы кулэ» кырӟан, «Нюлэс кузё» но эшшо. <…> Милемлы со туж кельше, туж умой али пӧрме ваньмыз, репетициосы ветлӥськом ӟыртыт мылкыдын. Мон малпасько, кемагес мед луоз та группа. <…> Мон нырысь ик «Amiso wott» группаын вал солист. Нырысь ик вал рок, собере «попса», собере рэп, али нош ик рок-крезьгур», — вераз Богдан Анфиногенов.

«Малыми» группа «Goore Fest» финн-угор рок-фестивалын


Петрозаводскысь вепсъёслэн «Noid» группазы Ижкаре нырысьсэ вуиз. Асьсэдыз соос вепс кылын кырӟась этно-электрон проект нимало.

«Noid вепс кылысь берыктӥське ведӥн шуыса. Татын но кӧня ке веднаськимы! Кырӟанъёсмы вепсъёслэн улон-вылонзы, яратон, инкуазь сярысь. Котькудаз быдэс улон возьматӥське кадь: тани лобӟиз тылобурдо, со нылашлы укша, нош кыӵе улонэз пӧрмоз со нылашлэн», — валэктӥз группаын кырӟась Алина Картынен.

«Таӵе фестивальёсты одно ик ортчытъяно. Соос выль творчестволы, выль малпанъёслы кужым сёто. Крезьгурасьёс пумисько, верасько. Со туж умой. Татын вал команда, кудӥз сыӵе ӝуатӥсь фолк шудӥз («Garuda» — ред.), фолк-метал. Арганэн со туж «меӵ» вал. Оглом, вань командаос, вань крезьгур тунсыко, уката ик со финн-угор кылъёсын, анай кылын ке», — ватсаз «Noid» группалэн кивалтӥсез Владимир Соловьёв.

Петрозаводскысь «NOID» группа «Goore Fest» финн-угор рок-фестивале пыриськиз


Учкисьёс таяз радэ сокем трос ӧй вал. Оло, шӧдӥськиз карлэн шорызлэсь палэныныгес ортчемез но. Нош лыктэм калык умой мылкыдын кошкиз.

«Оглом туж умой. Малпаськомы вуоно аре нош луоз «Goore Fest», ми яратӥськомы рок- крезьгурез, милемлы туж кельше эктыны. Но туэ со кутскиз туж вазь, туж жаль, калык ӧжыт вал шуыса. Мон сӥзьтысал радъясьёслы, мед вуоно аре соос мед быгатозы выльысь ортчытыны таӵе ужрадэз, но тросгес удмурт калык мед лыктоз… Карелиысь куноос туж тунсыко крезьгур шудо. «Малыми» бере уж гань-гань кылзыны», — вераз рок-крезьгурез яратӥсь нылаш.

«Али та течение, рок течение, туж тунсыко, малы ке шуоно со выль удмурт (лулчеберетын — ред.), али кылдэмын, соин ӧжытгес, оло, тунсыкъяськисьёс. Радъясьёслы сӥзьыны кулэ тросгес реклама карыны. <…> Возьматоно адямиослы, кыӵе милям вань группаосмы. Нош та ужрад вал туж тунсыко: эшъёсын пумиськон, выль группаосын тодматскон. Ку ми тодматскысалмы на Карелиысь рок-группаен?! Со туж кулэ, туж тунсыко, тросгес удмурт рок-группаос мед кылдысалзы», — итӥськиз эшез борды мукетыз учкись.

Фото: Григорий Фомин

Нырысетӥез «Goore Fest» рок-фестиваль 2015-тӥ арын ортчиз, соку отчы удмурт группаос гинэ пыриськизы. Нош вуонозэ фестивалез гужем, инкуазьын ортчытыны мылкыдзы вань. Солэсь бадӟым малпанъёссы но вань.

«Милям бадӟым ужпуммы — турттӥськом фестивалез бадӟымгес карыны. Поволжьеын, Уралын, быдэс Россиын карыны сыӵе нырысетӥ фестиваль. Милям фестивальёсмы таӵе порма ӧвӧл. Вань ке, но кыӵе ке фестивальёс, кудъёссэ Ижкарын ортчыто, соос «ксерокопия» шуод-а мар-а, ваньзы одӥг кадесь соос, кыӵе ке но аспӧртэмлыкез ӧвӧл. Милям малпанмы сэре вуонозяз, шуом, кыӵе но финн-угор группаез ӧтьыны, со Финляндиысь ик, соосын вераськыны озьы, кырӟанзылэсь одӥг куплетсэ ке но мед кырӟалозы удмурт кылын, мукетсэ асьсэ кылын. Калыклы кельшоз со», — вераз фестивалез радъясьёс пӧлысь одӥгез Денис Антонов.

«Goore Fest-2016» финн-угор рок-фестиваль

12 фото

Наши партнеры

Наверх
Вниз