Ижкар-24 °C
6 -тӥ толсур 2021 Вордӥськон
18+

Ольга Камашевалэн «Вай кидэ» кылбур бичетэныз тодматон ортчиз Ижкарын

  • 286
  • 0
Ижкар / Удмуртия
Ольга Камашевалэн «Вай кидэ» кылбур бичетэныз тодматон ортчиз Ижкарын
Туспуктэм: Анжелика Тихонова

13-тӥ гудырикошконэ Ижкарысь Н. А. Некрасов нимо лыдӟетъюртын егит удмурт кылбурчиен Ольга Камашеваен но солэн «Вай кидэ» нимо нырысетӥ кылбур бичетэныз тодматскон ортчиз. Ужрадэ ивортодэтъя «Удмуртия» агентстволэн корреспондентэз но вуылӥз.

Нырысетӥ кылбурзэ Ольга Камашева 2-тӥ классын дышетскыкуз гожтӥз. Дышетӥсез Ираида Галеева удмурт яке ӟуч кылын кылбур малпаны дорысь уж сётӥз вал. Озьы нылашлэн «Италмас» нимо нырысетӥ ужез вордӥськиз.

Анае-атае нырысь ик ӧз оскелэ аслам кылбур чуръёсы со шуыса, но ӝытпалгес мон быгатӥ соослы валэктыны, со аслам ик шуыса, но басьтыны соослэсь ушъян кылъёссэс
Ольга Камашева, кылбурчи

Озьы солы гожъяськон дуннее сюрес усьтӥськиз. Бӧрысь кыӵе гинэ ӧрын ассэ ӧз утча: проза но, выжыкылъёс но гожъяны кутскылӥз, но кылбурет дунне матынгес ик луиз. Трос пол гинэ «Шундыкар» лагере но вуылӥз, ёрос но элькун газет-журналъёсы гожъяськылӥз.

Дас одӥгетӥ классын дышетскыкуз Ольга кылосбурлы яке журналистикалы дышетскыны пырыны ӧдъя вал. Но дышетскон ар шорын малпанэз шуак воштӥськиз – эмчи луыны мылкыд кариз. Озьы Ижкарысь кун эм академие дышетскыны пыриз. Кызьы озьы пӧрмиз, ачим но уг валаськы, шуэ нылаш. Но аслаз тодэ ваемезъя, пичи дыръяз, оло, вань шудонъёсыз эм удысэн герӟаськемын вал. Со сяна, агаез но эмчи-хирург луыса ужа. Ваньмыз со мылкыд сётӥз, луоз.

Дышетскон туж секытэн сётӥськиз, вера Ольга. Тужгес но нырысетӥ арез. Соку кылбур чуръёс но гожъяны ӧз быгатылы. Йырыз быдэсак дышетсконэ выемын вал. Но ар ортчыса, капчигес луиз кадь, нош ик кылбур чуръёсыз вордӥськыны кутскизы. Соку нылаш валаз, кылбурет солы дышетсконлэсь шутэтскыны луонлык сётэ шуыса, солы капчигес луэ. Озьы нош ик гожъяськыны кутскиз.

Троссэ чуръёссэ инкуазьлы сӥзьыса, сое малпаса, вешаса кадь гожтылӥз.

Туж тросаз кылбурам адӟиське инкуазьлэн интыез. Сӥземын ке но со яратонлы, шуг-секытъёс пыр потонлы, инкуазь бадӟым инты басьтэ со кылбур чуръёсам
Ольга Камашева, кылбурчи

Инкуазьлы яратон нылашлы анай-атаез пыӵатӥзы. Пичи дыръяз соос ялан юаллязы, учкы ай, кыӵе пилемъёс, марлы соос кельшо, учкы ай кыӵе шепъёс, кызьы соос тулкымъясько, кыӵе писпу, кыӵе сяська шуыса.

Али Ольга Камашевалэн кылбуръёсызъя кырӟанъёс но гожъяло. Нырысетӥез соос пӧлысь, «Шунды ныл» кылбурезъя, нылаш пичи дыръя ай кылдӥз. Сое со юромо Анастасия сузэрезлы кырӟаны шуыса гожтӥз, нош крезьгурзэ дышетӥсез Александр Галеев малпаз. Табере солэн кылъёсызъя кырӟанъёссэс Мария Даниц, Павел Александров но мукетъёсыз быдэсъяло ни. Ольга солы туж шумпотэ: бурдъятэ, шуэ.

Кылбурчиен тодматскон ужрадэ трос гинэ калык люкаськиз: ӵыжы-выжыосыз, дышетӥсьёсыз, эшъёсыз но творчествоеныз тунсыкъяськисьёс. Пӧлазы удмурт гожъяськись, кылысь-кылэ берыктӥсь Владимир Котков но вал. Ӵапак со ик Ольгалы кылбур бичетсэ поттыны дэмлаз. Озьы, атаез но агаез юрттэмен, 100 экземплярзэ поттӥзы.

Тодматскон ӝыт улсын егит кылбурчилы трос гинэ ӟеч кылъёс веразы, азинсконъёс сӥзизы, кылбуръёссэ но лыдӟизы, кырӟанъёссэ но быдэстӥзы.

Тодэ вайытом, «Вай кидэ» кылбур бичетаз 35 ужъёсыз пыризы.

Ивортодэтъя «Удмуртия» агентство ужрадысь меӵак возьматон нуиз





Наверх
Вниз