Ижкар+2 °C
28 -тӥ коньывуон 2021 Покчиарня
18+

Татарстанысь удмуртъёс доры калыктодос экспедицие потазы Удмуртиысь ӧнерчиос

  • 262
  • 0
Кукмор / Россия
Татарстанысь удмуртъёс доры калыктодос экспедицие потазы Удмуртиысь ӧнерчиос
Туспуктэм: Россиысь тодосъя академилэн Урал ёзэтысьтыз Эскеронъёсъя удмурт федерал центрлэн пресс-службаез

Удмуртиысь ӧнерчиос Татарстанысь Кукмор ёросысь удмуртъёс доры калыктодос экспедицие потазы. Со сярысь ивортодэтъя «Удмуртия» агентстволэн корреспондентэзлы Ижкарысь Калык творчествоя элькун юртысь киужъёсъя ёзэтысь валтӥсь методист Наталья Прокопьева вераз.

Экспедицие вить адями пыриськиз: Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтаз ужасьёс Игорь Поздеев но Денис Корнилов, Калык творчествоя элькун юртысь ӧнерчиос Елена Байкова но Наталья Прокопьева но Кузебай Герд нимо йӧскалык гимназиысь дышетӥсь Ольга Перевозчикова.

Соос арня ӵоже Кукмор ёросысь Вужча гуртэ, Сутэр починкае, Выль Канисар, Дьӧльвыж гуртъёсы, Нӧръя черкогуртэ, Горд Сяська, Починька, Вылын Кузмес гуртъёсы, Киня, Куйык черкогуртъёсы, Кумор, Алышгурт, Улынгурт, Вужгурт, Тыло гуртъёсы вуылӥзы. Гурт калыкен, тужгес но пересьёсын, вераськизы, туспуктэмъёс лэсьтӥзы, видео, куаразэс гожтӥзы.

Ваньмыз туж умой радъямын вал, гурт калык милемыз пумитаны дась вал. Отын али но туж трос дӥськутъёс, кырӟанъёссы, эктонъёссы кылемын на. <…> Ми отысь туж бадӟым материал вайим асьмелы азьланяз ужаны
Наталья Прокопьева, Калык творчествоя элькун юртысь киужъёсъя ёзэтысь валтӥсь методист

Наталья Прокопьевалэн кылъёсызъя, Кукмор ёросысь удмуртъёслэн дӥсьсы но, эктонъёссы но, кырӟанъёссы но висъясько.

Соослэн кылемын на сыӵе эктонъёссы, кудъёсыз сюанъёс дыръя вал. Шуом, чабата. Нимыз бигер, бигерысь со потэмын. Чабата – со кут. Со эктонэз экто вал кутэн, кудӥзлэн улаз понэмын вал пичи пулъёс. Бигерын улӥсь мукет удмуртъёслэн но сыӵегес ик эктонзы вал, но таос асьсэ сямен экто сое, аспӧртэмлыкез солэн вань
Наталья Прокопьева, Калык творчествоя элькун юртысь киужъёсъя ёзэтысь валтӥсь методист

Ӧнерчи пусйиз, Кукмор ёросын удмурт сямъёсты, эктонъёсты, кырӟанъёсты пинал калыклы но пыӵато. Лулчеберет юртын ужасьёс одно ик пересьёслэсь визь-кенешсэс юало, бӧрысь егитъёсын, нылпиосын кырӟанъёс, эктонъёс дышето. Озьы удмурт лулчеберетсэс утё.

Балды-Кня (удмурт сямен Починька гурт – ред.) гуртын потӥзы, возьматӥзы милемлы эктонъёссэс, кырӟанъёссэс. Школьникъёс но отын вал, собере егитъёс, быдэ вуэм калык но пересьёс. Воксё-воксё пересьёсыз но вал. Соос ваньзы экто, кырӟало. Ваньзы ӵош. Бӧрдэм ик потэ соос шоры учкыса, шумпотыса
Наталья Прокопьева, Калык творчествоя элькун юртысь киужъёсъя ёзэтысь валтӥсь методист

Калык творчествоя элькун юртын ужасьёс, киуж бордын тыршо бере, бадӟым саклык дӥськутсылы, текстильзылы, вандон, куиськон, вурон амалъёссылы висъязы. Наталья Прокопьевалэн верамезъя, Кукмор ёросысь удмуртъёслэн вашкала дӥськутъёссы тросаз гуртъёсазы, школа музейёсазы, клубысь музейёсазы вань на. Кылсярысь, сюлыкъёс, сюан дӥськутъёс, камзолъёс, нылъёслэн такъяоссы но мукет.

Милемлы туж тунсыко вал учкыны, кызьы со дӥсь ужа. Не кызьы со музейын ошиськыса улэ, а адямиос вылын. Кыӵе обрядъёсы со пыриське, шуом. Сюан дыръя кызьы соос дӥсясько
Наталья Прокопьева, Калык творчествоя элькун юртысь киужъёсъя ёзэтысь валтӥсь методист

Соин ик та экспедиция туж кулэ вал. Ӵапак солы луыса, азьланяз Кукмор ёросысь удмуртъёслэсь костюмзэс кылдытон бордын ужалозы, уго Татарстанысь Балтаси, Бавлы ёросъёсысь костюмъёссы бичетазы вал ини, нош Кукмор палъёсысь ӧй вал на. Со сяна, люкам материалзэс Историяя, кылъя но литературая удмурт институтлэн но, Кузебай Герд нимо йӧскалык гимназилэн но ужазы кутозы, статья поттозы.

Озьы ик материалзэс Татарстанысь Тодосъя академиысь кылъя, литературая но искусствоя Г. Ибрагимов нимо институтэ келялозы. Уго Россиысь тодосъя академилэн Урал ёзэтысьтыз Эскеронъёсъя удмурт федерал центрлэн Историяя, кылъя но литературая удмурт институтэз та экспедициез ӵапак соослэн куронзыя радъяз.

Пусъём, экспедици улсын Удмуртиысь ӧнерчиос Кукмор ёросысь библиотекаосы но школаосы тодосъя книгаос вуттӥзы. Соос пӧлын ӟуч-удмурт кыллюкам, историяя, калыктодосъя, фольклоръя, удмурт кылъя но литературая книгаос. Бигерысь удмуртъёс кузьымъёсты туж шуныт пумитазы.

Тодэ вайытом, Татарстанысь Набережные Челны карын удмурт дӥськутэн но чеберлыко киужъёсын адӟытон ужа



Наверх
Вниз