Ижкар-24 °C
6 -тӥ толсур 2021 Вордӥськон
18+

«Учкы мынэсьтым дэремме» фестиваль ортчиз Пичи Пургаын

  • 350
  • 0
Пичи Пурга / Удмуртия
«Учкы мынэсьтым дэремме» фестиваль ортчиз Пичи Пургаын
Туспуктэм: vk.com (Фестиваль "Оцените моё платье" 27-28 августа)

27-28 гудырикошконэ Пичи Пурга ёросын витетӥзэ «Учкы мынэсьтым дэремме» фестиваль ортчиз. Со сярысь ивортодэтъя «Удмуртия» агентстволэн корреспондентэзлы радъясез, басмая реставратор, дизайнер, «Дэрем» студилэн кивалтӥсез Татьяна Москвина вераз.

Туэ нырысьсэ фестиваль кык нунал ӵоже мынӥз.

Азьло одӥг нуналэн гинэ чаляк-чаляк ортчытӥськом вал. Нош табере кык нуналлы люким, вераськонэз кемагес мед луоз шуыса. Со сяна, нырысьсэ open air форматэн радъям
Татьяна Москвина, фестивальлэн радъясез

Нырысетӥ нуналэз Пичи Пургаын ортчиз. Отын панельной дискуссия радъяськиз, кытын лекциоссэс Татьяна Москвина, истори тодосъя доктор Ирина Косарева, кылосбур тодосъя доктор Татьяна Владыкина но искусствоведение тодосъя кандидат Людмила Молчанова лыдӟизы.

Бӧрысь люкаськемъёс пӧртэм площадкаосъя люкиськыса ужазы. Кылсярысь, мылкыд карисьёс чыртывесьлэн историеныз тодматскизы, калык дӥсь сярысь тросгес тодӥзы но мукет.

Со сяна, фестивальлэн нырысетӥ нуналаз мастер-классъёс ортчизы. Озьы куноосты куролэсь арбериос лэсьтыны, куиськыны, кызьпу туен ужаны но мукетызлы дышетӥзы.

Нош кыкетӥ нуналаз калыкез ёросысь ик Яган черкогурт вӧзын интыяськем «Тюрагай» туризмъя центрын пумитазы. Отын ини дизайнеръёслэн вожвылъяськонзы ортчиз, кытчы Удмуртиысь сяна, Башкириысь но Комиысь 12 модельеръёс пыриськизы. Пӧлазы кыкетӥ но, куинетӥ но арзэ ветлӥсьёс вал ини, нош кин ке нырысьсэ вуиз.

Татьяна Москвиналэн кылъёсызъя, «Учкы мынэсьтым дэремме» фестиваль зэмос калык дӥсь сярысь. Нош модельеръёслэн ужъёссы сярысь верано ке, соос дизайнерской дӥсьёслы матынгес луо. Озьы ке но, арысь аре вуриськисьёслэн будэмзы, калык дӥсьлэсь пуштроссэ валамзы йылэ но йылэ шуыса адӟиське.

Дизайнеръёслэсь ужъёссэс нимысьтыз дасям подиум вылын возьматӥзы.

Мон калык дӥськутэн вырисько бере, калык дӥськут со калыкын луыны кулэ ук, соин ик та ужрадэз вылӥ подиум каронтэм вылысь, мынам кемалась мылкыды вал ини, модалиос турын вылтӥ яке выжлёгет вылтӥ мед ветлозы шуыса
Татьяна Москвина, фестивальлэн радъясез

Туэ кибашлылэн малпанэз быдэсмиз. Модалиос яркыт буёло, гожмо, вашкала удмурт выжлёгетъёс вылтӥ ветлӥзы. Нош ветлэмзыя «Шулдыр ӝыт» ансамбльысь егитъёс кырӟазы.

Модалиос сярысь но вератэк кельтыны уг луы. Татьяна Москвиналэн верамезъя, калык дӥсез возьматонын 90х60х90 огъя кутэм параметръёс луыны уг быгато. Уго ваньмыз адямиос пӧртэмесь. Ӵапак сыӵеесь вал туэ дизайнерлэсь ужъёссэ возьматӥсьёс но – Пичи Пурга ёросысь Баграш-Бигра гуртысь нылкышноос. Та ужрадлы соос куинь толэзь ӵоже нимысьтыз дасяськизы.

Малы мон соослы синмаськи? Со егит нылъёс, егит но соосты уд шуы, кын куртчон вакыт. Соослэн «Мылкыд» семья клубзы вань. Соос асьсэ понна улыны быгато, ульчазэс тупато, ӝук сиён ортчыто, походэ ветло. <…> Соослэн пӧртэм мугорзы. Но соос сокем мыло-кыдо басьтӥськизы та ужрад борды, сокем асьсэзыз радъязы, одӥг репетициез но ӧз кельтэ
Татьяна Москвина, фестивальлэн радъясез

Нылкышноосты, Татьяна Москвиналэн вазиськемезъя, «Мылкыд» семья клублэн кивалтӥсезлэн юрттӥсез, «Маяк» ёрос газетлэн валтӥсь редакторез Надежда Городилова люказ. Эшъёсызлы малпан туж яраз. Соглаш луизы. Озьы 12 кузя бичаськизы: 10 кышномуртъёс но кык дышетскисьёс – клубазы ветлӥсьёслэн ик нылъёссы.

Куинь толэзь ӵоже арнялы быдэ клубе репетицие ветлӥськом вал. <…> Репетициосы ветлыкумы олокыӵе но идеяос йырамы лыктӥзы. Оло, быдэстом ай соосты. Но таӵе ужрадъёсы пыриськыны азьлань но мылкыдмы вань
Надежда Городилова, «Мылкыд» семья клублэн кивалтӥсезлэн юрттӥсез

Нылкышноос троссы нырысьсэ сцена вылэ потӥзы, туж сюлмаськизы, тулкымъяськизы, озьы ке но, пуктэм ужпумзэс рос-прос быдэстыны быгатӥзы.

Ми ведь профессиональной модельёс ӧвӧл, тросэзлэн сцена вылэ но нырысьсэ потэмзы ай. Озьы ке но, пӧрмытӥм. Огпол но ӧм янгышалэ. Кышет но шонер керттыны асьмеос дышим
Надежда Городилова, «Мылкыд» семья клублэн кивалтӥсезлэн юрттӥсез

Татьяна Москвина пусйиз, фестиваль пӧрмиз. Ваньмыз ас ужзэс рос-прос, тыро-пыдо лэсьтӥзы. Экспертъёслэн ӧризы но синмаськымон ужаз, ваньзэ вераса, валэктыса.

Озьы, туэ номинациосъя 1 степенё дипломъёс басьтӥзы:

  • «Реконструкция народного костюма» номинациын – «Муресазь» уж, авторъёсыз Флорид Вахитов но Зульфия Краснова, Башкирия, Туймазы кар;
  • «Элементы одежды в народном стиле» номинациын – «AZVES» коллекция, авторез Галина Матвеева, Ижкар;
  • «Проектирование одежды с народными элементами» номинациын – «МичАнь» коллекция, авторез Лана Ваховская, Коми, Выльгорт черкогурт.

Учкисьёслы кельшымон луэмзы понна кузьымъёс басьтӥзы:

  • «Яркий дебют» номинациын – «Брусничный цвет» коллекция, авторъёсыз Арина Беляева но Катерина Сиразутдинова, Ижкар;
  • «Лучшая презентация» номинациын – «Сказы Кенеровая» коллекция, авторез Елена Бабушкина, Якшур-Бӧдья ёрос, Кенеровай гурт.

«Лучший образ фестиваля» нимез Татьяна Ситникова но Елена Дектерева басьтӥзы. Нош «ВКонтакте» мерлыко вотэсын туспуктэмъёсъя конкурсын Нина Мусагитова вормиз.

Пусъём, вуоно арын фестиваль дышем сямъя уз луы. Но Пичи Пурга ёросын ортчоно «Гербер» элькун шулдыръяськон улсын «Учкы мынэсьтым дэремме» фестивальлэн бадӟым площадкаез ужалоз шуыса чаклало. 

Тодэ вайытом, кемалась ик ӧвӧл, Лудорвайын «ГуртFEST» улосвылкуспо фестиваль но Чечы спас ортчизы.





Наверх
Вниз