Ижкар+9 °C
16 -тӥ куарусён 2021 Покчиарня
18+

«Удмуртия» книгапоттоннилэн кык ужез Россиысь 50 устоосыз книгаос пӧлы пыриз

  • 223
  • 0
Ижкар / Удмуртия
«Удмуртия» книгапоттоннилэн кык ужез Россиысь 50 устоосыз книгаос пӧлы пыриз
Туспуктэм: Анжелика Тихонова

«Удмуртия» книгапоттоннилэн кык ужез 2020-тӥ арлы йылпумъянъёсъя улосвыл издательствоослэн 50 устоосыз книгаоссы пӧлы пыриз. Лыдметэз Россиысь книга поттӥсьёслэн ассоциацизылэн «Лучшие книги года» вожвылъяськонэз улсын кылдытӥзы. Со сярысь ивортодэтъя «Удмуртия» агентстволы элькунысь издательствоысь валтӥсь редактор Георгий Грязев вераз.

50 устоосыз пӧлы «Возрождённые ремёсла рода Тукля» (12+) книга (авторез Геннадий Сидоров) но «Удмурты. На земле древних Алангасаров» (12+) книга (радъясез Георгий Грязев) сюризы

Ми шумпотӥськом, кык книгамы сюриз шуыса. Со кыӵе ке бурдъя но кадь. Берло дыре таӵе конкурсъёсын, огъяросси конкурсъёсын, ӵошатскыны, вылаз ик вормыны туж секыт луиз ини. Малы ке шуоно мукет эшъёсмы но сьӧрамы уйисько, соос но чебер, йӧно книгаос потто. Соин ик куке тынэсьтыд пусъё, тонэ адӟо на сюрс книгаос пӧлысь, со эшшо умойгес
Георгий Грязев, «Удмуртия» книгапоттонниысь валтӥсь редактор

Геннадий Сидоровлэн «Возрождённые ремёсла рода Тукля» книгаяз Ува ёросысь Узей-Тукляысь Кибашлыослэн юртазы лэсьтӥськись киужъёс пыризы. Георгий Грязевлэн верамезъя, книга бордын соос куинь ар пала тыршизы. Куинь сюрс пала туспуктэмъёс лэсьтӥзы. Соос пӧлысь тужгес устооссэ бырйыса, книгае пыртӥзы.

Та книгаен мыным ужаны но туж тунсыко вал, малы ке шуоно татын тунсыко вал ачиз авторез но – кибашлы, кудӥз шӧдэ удмуртлыкез, пыӵатэ сое аслаз ужъёсаз. Адями ачиз висе вал та книгаез поттон пумысен
Георгий Грязев, «Удмуртия» книгапоттонниысь валтӥсь редактор

Книгаез Москваын адӟытонын но синйылтӥзы.

Отын тросэз паймо вал, кыӵе чебер лэсьтэмын та книгады шуыса. Нош ми шуиськом, та одӥг Тукля выжылэн гинэ узырлыкез, милям, шуиськом, выжыосмы 70 пала. Таӵе центръёс, шуисько, Кибашлыослэн юртъёссы, ужало котькуд ёросын кадь ик. Соин тросэз туж паймыса учкылӥзы
Георгий Грязев, «Удмуртия» книгапоттонниысь валтӥсь редактор

Лыдметэ сюрем кыкетӥяз книгае – «Удмурты. На земле древних Алангасаров» – удмурт калыклэн выжыез, кытысь потэмзы, дано удмурт адямиос, удмуръёсты данъям муртъёс сярысь гожтосъёс пыризы. Книга куинь кылын гожтэмын: удмурт, ӟуч, но англи. Кызьы пусйиз Георгий Грязев, солэн инъетэз Владимир Владыкинлэн «Ӟечесь-буресь! Ми – удмуртъёс» книгаез луиз.

Сое выльдэмын, мукет сямен сётэмын, суредъёсыз, туспуктэмъёсыз мукетэсь, статьяос но выльдэмын, туала нуналлы матэ карыса, туннэ учкисьлы выль синмын усьтэмын со книга
Георгий Грязев, «Удмуртия» книгапоттонниысь валтӥсь редактор

Пусъём, 50 устоосыз пӧлы пырон понна конкурсэ 46 улосвылъёсысь 89 издательствоослэн но книга поттӥсь огазеяськонъёслэн сюрс пала книгаоссы пыриськизы. «Удмуртия» книгапоттонни вожвылъяськонэ куинь ужзэ ысъяз.

Тодэ вайытом, кылем арын та лыдметэ книгапоттоннилэн куинь ужез сюриз вал. Кемалась ик ӧвӧл, издательство кык книга поттыны грантъёс утӥз



Наверх
Вниз