Ижкар+9 °C
16 -тӥ куарусён 2021 Покчиарня
18+

Куинь лулчеберет юртъёсты усьтӥзы Удмуртиын тупатъян ужъёс бере

  • 206
  • 0
Юнда / Удмуртия
Куинь лулчеберет юртъёсты усьтӥзы Удмуртиын тупатъян ужъёс бере
Туспуктэм: vk.com (Сельский дом культуры "Кияикский")

Удмуртиысь Балезино но Дэри ёросысь куинь лулчеберет юртъёсты тупатъян ужъёс бере усьтӥзы. Ужъюртъёсты «Культура малой Родины» ӵектос улсын выльдӥзы. Со сярысь элькунысь лулчеберетъя министр Владимир Соловьёв «ВКонтакте» мерлыко вотэсысь бамаз ивортӥз.

Балезино ёросысь Юнда черкогуртын культура юртлэсь липетсэ лэсьтӥзы. Со понна ужъюртлы 1 миллион манетлэсь трос коньдон висъязы. Нош азьланяз, шыръям уксёзылы луыса, вӧлдэтсэс но укнооссэс выльдозы.

Пусъём, Юндаысь лулчеберет юрт «Культура малой Родины» ӵектосэ 2018-тӥ арысен пыриське ини. Озьы, отын сценалэсь дӥсьсэ воштӥзы, югдытӥсь тӥрлык, крезьгуро инструментъёс басьтӥзы. Культура юрт бесерман лулчеберетъя центр луэ. Отын «Азвесь крезь» тодмо ансамбль ужа.

Кыкетӥез лулчеберет юрт Кестым гуртын усьтӥськиз. Ужъюрт федерал ӵектосэ кыкетӥ арзэ пыриське. Со дыр ӵоже ужасьёслы но калыклы шутэтскыны но пӧртэм занятиосы пыриськыны ӟеч луонлыкъёс кылдытӥзы. Туэ ужъюртэ пыронэз тупатъязы.

Кестымысь культура юрт Балезино ёросын бигер лулчеберетъя центр луэ. Арлы быдэ отын 200-лэсь ятыр ужрадъёс ортчо, 26 клубъёс ужало.

Озьы ик тупатъян ужъёс бере Дэри ёросысь Кияик черкогуртысь лулчеберетъя огъет усьтӥськиз. Сое тупатъян понна оглом 2,5 миллион манет висъязы. Озьы, сценазэ выльдӥзы, ӧсъёссэ, шуныт вуттӥсь сӧзнэтсэ но тылпу потон сярысь ивортӥсь тӥрлыксэ воштӥзы. Со сяна, юртлэсь вылзэ шуныт каризы но выльдӥзы, тазалыксыя ӧжыт луонлыкъем адямиослы пандус пуктӥзы, пыронзэ лэсьтӥзы.

Пусъём, 2021-тӥ арын «Культура малой Родины» ӵектос улсын оглом 25 культура юртъёсты выльдозы. Нош Грак но Дэбес ёросъёсын выль ужъюртъёс кылдозы

Тодэ вайытом, Сарапулын виртуальной концерт зал усьтӥзы



Наверх
Вниз