Ижкар-4 °C
5 -тӥ толсур 2021 Воскресенье
18+

Удмурт йӧскалык театрысь артистъёс Оренбурге гастрольёсы потазы

  • 316
  • 0
Ижкар / Удмуртия
Удмурт йӧскалык театрысь артистъёс Оренбурге гастрольёсы потазы
Туспуктэм: Удмуртиысь йӧскалык театрлэн пресс-службаез

Удмуртиысь йӧскалык театрысь артистъёс «Большие гастроли» федерал ӵектос улсын Оренбурге ветлӥзы. М. Файзи нимо драмая бигер кун театрлэн сцена вылаз «Васьлей» (18+), «Горе от ума» (12+) но «Суперзаяц» (0+) спектакльёссэс шудӥзы. Журналистъёслы мынон-ветлонзы сярысь Ижкарын ортчем пресс-конференциын веразы.

Спектакльёсмы трос пӧртэм улосвылъёсын возьматэмын ини, малпасько, татын но со калыклы сюлмаз кылиз. Со милям обкатанной материал, тодӥськом ини ми сое. Малпаськом, уродзэ ум нуиське, умойзэ нуиськом. Асьмелэсь быгатонлыкъёсмес но ымнырмес возьматон понна
Алексей Ложкин, Удмурт йӧскалык театрлэн валтӥсь режиссёрез

Удмурт йӧскалык театрлэн кивалтӥсез Андрей Ураськин пусйиз, та нырысетӥез тюрк театр, кытчы соос ас спектакльёссэс возьматыны ветлӥзы.

Артистъёсмылэн верамзыя, туж умой, туж шуныт пумитазы. Удмуртъёс Оренбургын но вань шуыса оскисько. Наушниктэк учкисьёс, пе, вал, пырыкузы но веразы, пе, мыным наушник кулэ ӧвӧл шуыса
Андрей Ураськин, Удмурт йӧскалык театрлэн кивалтӥсез

Ужъёссы яразы шуыса Оренбургысь театрлэн чеберлыкъя кивалтӥсез Растам Абдуллаев но вераз.

Кепырасько, но мон та дырозь удмурт театрлэсь ужъёссэ ӧй на адӟылы вал. Нош тани учки но, мынам туж умой малпанъёсы кылӥзы, мыным соиз но, таиз но спектакльёсты туж яразы. Мон малпасько, тӥледлы ми доры ветлоно, малы ке шуоно учкисьёслы но туж кельшиз
Растам Абдуллаев, Оренбургысь М. Файзи нимо драмая бигер кун театрысь чеберлыкъя кивалтӥсь

Удмуртиысь артистъёс «Большие гастроли» федерал программае 2017-тӥ арысен пырисько ини. Таиз гастрользы соос понна куатетӥез луиз.

Пӧртэм-пӧртэм улосвылъёсы ветлылӥм ини. Нырысь ик ветлыны тыршиськомы ӵыжы-выжыосмы доры. Тани карелъёс доры, поръёс доры, комиос доры, коми-пермякъёс доры ветлӥм ини. Табере ӟуч улосвылын кызьы бигеръёс уло адӟеммы потӥз
Алексей Ложкин, Удмурт йӧскалык театрлэн валтӥсь режиссёрез

Андрей Ураськилэн кылъёсызъя, ӵектос театръёслы туж бадӟым пайда вае. Со пӧлын учкисьлы но. Ку ай палэнысь учкись, юри Удмуртие лыктыса, удмурт спектаклен тодматскысал, нош татын театр ачиз со доры мынэ. Озьы ик мукет улосвылысь театр удмурт учкись доры лыктэ.

Солы луыса быдэс Россиын театр сообщество вырӟиз, театръёс мылысь-кыдысь пӧртэм улосвылъёсы ветлыны кутскизы. Та гастрольёслы луыса, ми пӧртэм регионъёсысь пӧртэм-пӧртэм театръёслэсь ужамзэс учкиськом: кызьы ужало соос, кыӵегес спектакльёс пукто, соослэн кыӵе юртъеръёссы, кыӵе учкисьсы
Андрей Ураськин, Удмурт йӧскалык театрлэн кивалтӥсез

Кивалтӥсь пусйиз, артистъёс но та гастрольёсы шумпотыса пото, угось со выль эшъёс сётэ.

Ми со гастрольёс бере, ог-огмы доры ветлыса, бадӟымесь эшъёс кадь кылиськом. Финн-угор театръёсын ми азьло но эшъёс кадь ик вал, тодмаськом вал ог-огмес, что артистъёс, что ужасьёс, что, ми, кивалтӥсьёс. Но тани Алтае ветлӥм. Алтайёсын туж бадӟым эшъёс луимы
Андрей Ураськин, Удмурт йӧскалык театрлэн кивалтӥсез

Ӵектос туж кулэ шуыса удмурт йӧскалык театрлэн валтӥсь режиссёрез Алексей Ложкин но вераз. Со ужъюлтошъёслэсь ужан амалъёссэс адӟыны, мар ке выльзэ, пӧртэмзэ синйылтыны луонлык сётэ. 

Ас интыяд пӧзьыса уд улӥськы, пӧртэм улосвылъёсысь адӟиськод, кызьы калык ужа тынад уж дорад. Соин ик тани али мон учко, дунъяло, кытысь ке маиз ке кельшиз ке, басьто. Соос, оло, милесьтым марзэ ке шедьтозы-басьтозы
Алексей Ложкин, Удмурт йӧскалык театрлэн валтӥсь режиссёрез

Пусъём, Удмуртиысь йӧскалык театр Оренбурге ветлэм бере, шаерысьтымы учкисьёс доры Оренбургысь артистъёс но вуылӥзы. Соос, озьы ик, куинь ужзэс возьматӥзы

Тодэ вайытом, Удмуртиысь йӧскалык театр Алтай Элькунэ 2019-тӥ арын ветлӥз, соку ик отысь артистъёс Ижкаре вуылӥзы. 2018-тӥ арын Карелиысь йӧскалык театрен вошъяськон гастрольёс ортчытӥзы.

Нялтас вераса, 2021-тӥ арын Удмуртиысь фольклор кырӟанъя но эктонъя «Айкай» театр но «Большие гастроли» федерал программае шедиз



Наверх
Вниз